1 Ɔwi wɔ i David ɔɔfe kube itititɛ̃ kɛkɛĩ ne, Ziba wɔ lonyɔ Mefiboset ara iso ɔya ɔsia sɔ ɔ̃asarɛgu wũ. Ɔsɛgu mafirimu gbodzoo ma losore boɖoboɖo akuri alafa anyɔ, wainabikorea akpano kulafa gu aboi akpano kulafa gu ndã kabui.

2 Ne igara ɔkarɛ Ziba sɔ, "Be ɔso abɔ ara wagbe?"

Ne Ziba ɔtã mmuai sɔ, "Lobɔ mafirimu sɔ igara iyomaturi si masɛ iso, boɖoboɖo gu adziribi ana ne si makpakpɛ̃dze aaɖe, si misu ndã mitã mma iaɖa i fafuĩ ame si mana ɔle."

3 Ne igara ɔkarɛ sɔ, "Ne i ɖe fɔ ɔkɔse ɔwabirɛrɛĩ?"

Ziba ɔtã wũ mmuai sɔ, "Ɔpia i Yerusalem alasɔ ɔbu sɔ, 'Nɔme Israel kaɖe to maakpesera wũ ɔwa sigarakaɖekɔ̃ matã me.' "

4 Kere ne igara ɔɣere Ziba sɔ, "Nnɛ ɔɖuɖu nɖe Mefiboset ire ɔɔkpese fɔ ɔkpɛ kiniɔ."

Ne Ziba ɔɣɛ sɔ, "Lobɔitikarɔ̃ lotã-ɔ lo, tã wũ ara si abo wũ ɔkɔse igara anɔ."

5 Gɔ ame i Igara David to ɔbore ɔbo Baxurim ne, ɔrɛrɛ̃ ɔwɛ̃ wɔ lobɔrɛ i Saul kalɛ gu i ɔ̃ iyo ame ɔba ɔ̃atu wũ i mmɔ. Ɔ̃ iyere loɖe Simei, Gera ɔbibirɛrɛĩ ne. Ɔbɔrɛ i ɔmagɛ̃ ame ɔto ɔgbarĩ David mɛrɛ̃. 6 Ɔto ɔpɛ igara gu ɔ̃ makpakpa ata atoasɔ igara makpakpɛ̃dze ɔɖuɖu gu isomadzuɛ̃se igbãɔ ɔsɛgu David i kuɖearɔ̃ gu kubena iso. 7 Gɔ ɔto ɔgbarĩ David ne, Simei ɔɣɛ sɔ, "Bɔrɛ fe, bɔrɛ fe, fɔ turiɖoese gu katuripɛmi! 8 Bosate ɔɔtã-ɔ kuso i Saul iyomaturi ima ɔɖuɖu nɛ afere i karɔ̃ fiɛ ato aɖe sigara i ɔ̃ kanya. Bosate ɔɔsu fɔ sigarakaɖekɔ̃ ɔpia i fɔ ɔbibirɛrɛĩ Absalom nrɔɔ̃ ame. Ɔɔkpase awɔ ala turiɖoese aɖe ɔso!"

9 Kere ne Abisai, Zeruya ɔbibirɛrɛĩ ɔkarɛ igara sɔ, "Be ɔso i kpɛkpɛkpia wɔgbe aabgarĩ wũ ɔkɔse igara? Tã lokɛlɛ loatu wũ iti."

10 Ɣɛɛ igara ɔɣere wũ sɔ, "Be i nnɛgbe ɔsu mi i mmɔ, Zeruya mabibirɛrɛĩ? Si ɔto ɔgbarĩ alasɔ Bosate ɔɣere wũ sɔ, 'Gbarĩ David ' ne, nna loakarɛ sɔ, 'Be ɔso ato abara ngbɔ?' "

11 Ne David ɔɣere Abisai gu ɔ̃ makpakpa ɔɖuɖu sɔ, "Wũ mɔmɔ ɔbi, wũ sina gu ima to ɔbie sɔ ɔɖoe me. Ne iyɔ Benyaminse wɔgbe ɣɛɛ! Minyua wũ; mitã ɔgbarĩ me, ala Bosate lopia wũ sɔ ɔbara kumɛɔ. 12 Siainyɔ Bosate to ɔ̃anyɔ wũ imɔrɛ̃ ɔkpesera me ɔpia i ɔ̃ ndamu kusɛkusɛ ame ala Simei sigbarĩ dzɛgbe nɔme ɔso."

13 Ne ɔso David gu ɔ̃ maturi ɔsɛ i ɔri iso fiɛ Simei ana ɔsɛ i kabemi isɛ isɛ i ma kanɔsɔ̃ isɛ, ɔto ɔgbarĩ David ne ɔpɛ wũ ata ne ɔsa aku ɔfere wũ i ɔwiri ame. 14 Igara gu ɔ̃ maturi ɔɖuɖu ɔsɛ maabo ma kabokɔ̃ ku isotu. Mmɔ ka ɔwe ɔwarã ne.

15 Ɔwi wɔmɔ ame ne, Absalom gu Israel marɛrɛ̃ ɔɖuɖu ɔba maabo Yerusalem, ne Axitofel ɔwegu wũ. 16 Ne Xusai, Arkise wɔ nɖe David ɔlaa ɔkɛlɛ Absalom kɔrɛ ɔɣere wũ sɔ, "Igara si ɔsɛ ngbã dzoroo! Igara si ɔsɛ ngbã dzoroo!"

17 Ne Absalom ɔkarɛ Xusai sɔ, "Kuɖɔɛ gɔgbe aate fɔ ɔlaa ne? Si fɔ ɔlaa ɔɖe ne, be ɔso fiɛ aisiai wũ?"

18 Ne Xusai ɔɣere Absalom sɔ, "Aɔ, nwɔ i Bosate gu kaɖe ɔɖi, fiɛ Israel marɛrɛ̃ ɔɖuɖu siai ne, ɔ̃ loasiai fiɛ ɔ̃ kɔrɛ loawe ne. 19 Ana ne, nna si losumu? Iiɖe ɔbi loasumu ɣɛɛ? Lɛ kumɛgɔ losumu fɔ ɔse ne, ngbɔ loasumu-ɔ ne."

20 Ne Absalom ɔkarɛ Axitofel sɔ, "Tã fɔ adzuni, be si bobara?"

21 Ne Axitofel ɔɣere Absalom sɔ, "Rɛgu fɔ ɔse masɔrɔ̃ ma ɔnyua ɔsɛ sɔ madzuɛ̃ igarayo. Iyɔ Israel ɔɖuɖu aanɔ sɔ mi gu fɔ ɔse ɔɔkɛ ɔkati fiɛ iapia mma ɔɖuɖu mpia i fɔ kɔrɛ ɔle maya teteree." 22 Ne ɔso mapɛ ikpayo i iyo isã matã Absalom ne ɔrɛgu ɔ̃ ɔse masɔrɔ̃ i Israel kaɖe ɔɖuɖu anɔ.

23 Kiniɔ ne i ɔwi wɔmɔ ame ne, David gu Absalom sɛ manyɔ Axitofel adzuni wa ɔsɛ ɔtã lɛ kumɛgɔ i ɔturi aakarɛ ira ɔnɔ i Ɣaa kɔrɛ.