1 Bosate itɔ̃me ɔba me sɔ, 2 "Ɔturi awune ɔbi, su fɔ anɔ sɔ̃ ma Amonse iso si aɖikanya ata aya i ma iso. 3 Ɣere ma Amonse sɔ, 'Minɔ Bosate Wɔ Nsiguso itɔ̃me. Nnɛgbe i Bosate Wɔ Nsiguso to ɔɣɛ ne: Ala miɣɛ sɔ "Ɛɣɛɛ̃!" i wũ isɔrɛyo iso ku ɔwi wɔ mapia ne ɔgu gu i Israel iso ku ɔwi wɔ manina ma karɔ̃ gu i Yuda maturi iso ku ɔwi wɔ makɛlɛ kafɔrɔ̃ iso, 4 ɔso ne nto loasu mi lotã kuɣɛ̃kabɔrɛkɔ̃ maturi lɛ ma ira. Mato maabara ma nsɛkɔ̃ fiɛ maabara ma akpayo i mi ndɛ̃. Mato maaɖe mi araɖea fiɛ maanɛ mi mabɔi inyɛndu. 5 Nto loakpesera Raba ɔmagɛ̃siare kupuapɔngɔ sikuakaɖekɔ̃ fiɛ Amon karɔ̃ aakpese ngbegɔ i masɛrɛ aawarã. Iyɔ mito miatsue sɔ Mme nɖe Bosate ne. 6 Ala nnɛgbe i Bosate Wɔ Nsiguso to ɔɣɛ sɔ: Mipɛ arɔ̃kpasa fiɛ mitutuĩ mi ngba i karɔ̃ fiɛ milɛlɛ ku aranyanyariã ɔɖuɖu wa miba i mi ɔtu ame, mita miɣɛ i Israel karɔ̃ iso. 7 Ne ɔso ne nto loanabarã wũ kɔrɔ̃ lota loya i mi iso fiɛ loasu mi lotã nɖebi lɛ kakpãramɔɛã. Loto loaɖi mi i nɖebi ndɛ̃ fiɛ loawɔra mi loɖi i nrɔ̃ ame. Nto loawɔra mi, ne mito miatsue sɔ Mme nɖe Bosate.' "

8 "Nnɛgbe i Bosate Wɔ Nsiguso to ɔɣɛ sɔ, 'Ala ma Moabse gu Seirise ɔɣɛ sɔ, "Nyɔ, Yuda kaɖe ɔɔkpese lɛ nɖebi mama ɔɖuɖu." 9 Ne ɔso nto loaɖi ma Moabse kume losɛ kpawee, ita i simagɛ̃ dzɛ mpia i kume kɔrɛ - Bet Yesimot, Baal Meon gu Kiriataim - karɔ̃ gamɔ iso kulɛ simagɛ̃. 10 Loto loasu Moab ku ma Amonse lotã kuɣɛ̃kabɔrɛkɔ̃ maturi lɛ ma ira, si maisibanyigi ma Amonse i nɖebi ndɛ̃. 11 Ne loakpadzɛ̃ ma Moabse kutsue. Iyɔ mato maatsue sɔ Mme nɖe Bosate.' "

12 "Nnɛgbe i Bosate Wɔ Nsiguso to ɔɣɛ sɔ, ' Edom maturi ɔbara Yuda iyo matikuso ɔso ne maɣɛrɛ gbaã gɔ mabara ne. 13 Ne ɔso nnɛgbe i Bosate Wɔ Nsiguso to ɔɣɛ sɔ: Loto loanabarã wũ kɔrɔ̃ lota loya i Edom iso, loɖue ɔ̃ marɛrɛ̃ gu ma mabɔi. Loto loanina karɔ̃ fiɛ ita i Teman ikɛlɛ Dedan ne, mato maarɔ̃ i ipɛmi kanya. 14 Loto loabara Edom lotikuso iki i wũ maturi Israel iso fiɛ mato maabara Edom i wũ sikpã gu sikpã teterea kanya. Mato maatsue wũ ibaraitikuso, Bosate Wɔ Nsiguso loɣɛ.' "

15 "Nnɛgbe i Bosate Wɔ Nsiguso to ɔɣɛ sɔ, 'Ma Filistise ɔɔbara matikuso fiɛ mabara ne ku aranyanyariã i ɔtu ame fiɛ ala katsiri siare ɔso mabie sɔ maawɔra Yuda. 16 Ne ɔso ne Bosate Wɔ Nsiguso sɔ: Ka nto loba loanabarã wũ kɔrɔ̃ lota loya i ma Filistise iso. Ne loawɔra ma Keretse fiɛ loawɔra mma lokuti i ɔpokpokpo kuruɛ. 17 Nto loabara ibaraitikuso siare i ma iso fiɛ loakpadzɛ̃ ma kutsue i wũ sikpã teterea ame. Iyɔ mato maatsue sɔ Mme nɖe Bosate si lobara ma lotikuso.' "