1 Bosate itɔ̃me ɔba me sɔ, 2 "Ɔturi awune ɔbi, nnɛgbe i Bosate Wɔ Nsiguso to ɔɣere Israel karɔ̃ ne: Kawirikɔ̃! Kawirikɔ̃ ɔɔba i karɔ̃ siɣokã ana iso. 3 Kawirikɔ̃ ɔɔba i mi iso fiɛ nto loaɖi wũ sikpã lofere i mi iso. Nto loaɣɛgu mi itɔ̃me i mi nsɛgbai kanya fiɛ loati mi kuso i mi anyanya kubarara ɔɖuɖu iti. 4 Loito loanyɔ mi nnya ɣee lonyua mi, gbaã nto loabara mi lotikuso i mi nsɛgbai iti gu i anyanya kubarara gɔ i mi ndɛ̃ iti. Iyɔ mito miatsue sɔ Mme nɖe Bosate.

5 "Nnɛgbe i Bosate Wɔ Nsiguso to ɔɣɛ ne: Kukpakpi! Ngɔ mainɔ - manɔ, kukpakpi to kuba. 6 Kawirikɔ̃ ɔɔba! Kawirikɔ̃ ɔɔba! Kaɔtara so kaɣɛ-ɔ iso. Kaɔba! 7 Kukpakpi ɔɔba i mi iso - mi ma nsi i karɔ̃ iso. Ɔwi ɔɔba, iyi ɔɔbore ibo, ifɔ̃ mpia i abe iso, iiɖe isoɣɔ. 8 Ka nto loba loaɖi wũ sikpã teterea kayi i mi iso fiɛ loasia sikpã i mi iso. Loto loaɣɛgu mi itɔ̃me i mi nsɛgbai kanya fiɛ nto loabara mi lotikuso i mi anyanya kubarara ɔɖuɖu iti. 9 Loibanyɔ mi nnya ɣee lonyua mi. Nto loabara mi lotikuso i mi nsɛgbai kanya gu i anyanya kubarara gɔ i mi ndɛ̃. Iyɔ mito miatsue sɔ Mme Bosate mme nsɛ lowuĩ mi ikama.

10 "Iyi ka ipia i ngbe! Iɔba!. Kukpakpi ɔbiɛ kufere, ɔdziri ɔɔre anɔmi, iteso ɔɔɣɔ̃ aɣɔ̃la! 11 Amumuɣɔ ɔɔmɔ akpese ibɔradziri wɔ loakpadzɛ̃ ɔtile kutsue, ɔturi kuwɛ̃ iibabɔrɛ i kame, kuwɛ̃ i iturikuri ame iibabɔrɛ i kame - karana kukawɛ̃, kuira nɛ lofɔkuɣa iibabɔrɛ i kame. 12 Ɔwi ɔɔɣo, iyi ɔɔba iabo. Midaatã nwɔ loɣa ara si ɔna isoɣɔ ɣee nwɔ lorɔdɛ̃ ara si ɔmararã so, alasɔ sikpã teterea kasisia i iturikuri ɔɖuɖu iso. 13 Nwɔ lorɔdɛ̃ karɔ̃ iibafɔ kã ayi kumɛgɔ i ma inyɔ ɔɖuɖu pia ngbã, alasɔ kaɖikate ise i iturikuri ɔɖuɖu iso iibakpese kama. Ala ma akpi iti ɔso ne kuwɛ̃ iibana ngbã i ma ndɛ̃. 14 Atoasɔ masɛ mafɛ̃ kadadã fiɛ masɛ maledza ara matã kakpã ne, kuwɛ̃ iisɛ ɔkɛlɛ kakpã alasɔ wũ sikpã teterea sia i iturikuri ɔɖuɖu iso.

15 "Ipɛmi pia i inyamɔ fiɛ inyɛpɛ̃ gu kukãsiare to i ayo ame. Mma i karɔ̃ ame to maakpi i ipɛmi kanya, ne mma i ɔmagɛ̃siare ame to maakpi ala kukãsiare gu inyɛ̃pɛ̃ iti. 16 Mma ɔɖuɖu lona ngbã fiɛ matere ne, mato maawe i abe iso. Mato maatɔrɛ̃ lɛ kugbolomi ame mabɔrɔnuma, ɔbiara ala ɔ̃ akpi ɔso. 17 Kɔrɔ̃ biara to kuafɛ̃, ne igɛgɛ̃ biara to iati lɛ ndu. 18 Mato maapia ipundusikoto fiɛ maapia itiikpakpa lɛ arapia. Kunuarɛ to kuafu i ma ntɔ̃ fiɛ maakparɛ̃ ma ati. 19 Mato maafuĩdza ma sikãfudza masɛ i sivurã iso, ne ma sikãrɛtɛa aakpese ira nɛ loisekele. Ma sikãrɛtɛa gu sikãfudza iibaɖi ma ku Bosate sikpã teterea iyi. Maibawo ma kukã ɔnidza ɣee mayira ma ayiri alasɔ iɔtã ma marɔ̃ mabo i ikpi iso. 20 Mate so ku ma akɛrɛra wa nto alɛnyɔ fiɛ masu wã mabara arapɔa nyanyariã gu kumiamia. Ne ɔso nto loafirikira nwagbe ira nɛ loisekele lotã ma. 21 Nto loasu wã lotã mafɔ lɛ kakpãramɔɛã gu lɛ ara wa mayu lotã karɔ̃ iso matilese, ne mato maapukutura wã. 22 Loto loapɛ wũ anɔmi lofirikira i ma iso, ne mato maapia wũ kasɛkɔ̃ nyaa ɔgu. Mayukukpe to maabo i ne ame mapia ne ɔgu.

23 "Miledza kugbagɔrɔĩ misɛ, alasɔ karɔ̃ ɔyigu ima fiɛ ɔmagɛ̃siare ɔyigu amumuɣɔ. 24 Nto loakpadzɛ̃ nɖebi maturi ma nɖe matilese maɖo lobɔ si mafɔ ma ayo. Loto loatuĩdza masiare iteso, ne maapukutura ma kusumukɔ̃. 25 Si itiikpakpa ɔba ne, mato maabie isobuɛ ɣɛɛ maibana kuiwɛ̃. 26 Kukpakpi i kukpakpi iso to kuaba, ɔwiri ame atɔ̃me i ɔwiri ame atɔ̃me iso to aaba. Mato maapia kubɛ si mana kaɖikate mabɔrɛgu i Ɣaa kanyaɖidze kɔrɛ, sɔrɛdze mmara ite to iayu, lɛ kumɛgɔ i makpakpa kuka itã to kuayu. 27 Igara to ɔ̃amararã so, igarabirɛrɛĩ to ɔ̃ayu ɔriinyɔ. Ne karɔ̃ iso maturi nrɔɔ̃ to miati mikpakpa. Nto loabara ma i ma nsɛgbai kanya fiɛ i ma mɔmɔ asɛra kanya loaɣɛgu ma atɔ̃me. Iyɔ ne mato maatsue sɔ Mme nɖe Bosate."