1 Ne ɔɣere me sɔ, "Ɔturi awune ɔbi, ɖe nnɛ nse-ɔ i katɔ̃, we ɔko wɔgbe. Iyɔ si asɛ aaɖe Israel kaɖe ika." 2 Ne ɔso lobusi kanya ne ɔsu ɔko ɔtã me lowe.

3 Kere ne ɔɣere me sɔ, "Ɔturi awune ɔbi, we ɔko wɔ nto lotã-ɔ i ngbe si amidza fɔ iyiri ku wũ." Ne ɔso lowe wũ, ne iwe ɔmɛrɛ̃ lɛ maɣendu awe i wũ kanya ame.

4 Kere ne ka ɔɣere me sɔ, "Ɔturi awune ɔbi, kiniɔ ne, ka kɛlɛ Israel kaɖe kɔrɛ si asɛ aaɣere ma wũ atɔ̃me. 5 Loito losese-ɔ maturi ma siɖe aibanɔ ɣee mma siɖe mba ɔle kɔrɛ, ɣɛɛ Israel kaɖe kɔrɛ - 6 nto losese-ɔ maturi ma siɖe aanɔkarɔ̃, mma siɖe nna ɔle fiɛ aanɔ ma atɔ̃me karɔ̃. Gbaã ne, si ɔsese losese-ɔ i maturi ma siɖe mba ɔle ku karɔ̃inɔ kɔrɛ ne, tee maɔkã-ɔ atsue. 7 Ɣɛɛ Israel kaɖe iito maakã-ɔ atsue alasɔ maisɛ mabie sɔ maakã me atsue. Ala Israel kaɖe ɔɖuɖu ba ɔtu gbogboroa fiɛ maisɛ manɔ ara. 8 Ɣɛɛ nto loabara-ɔ sɔ aibatã iti fiɛ aawe ɔle lɛ kumɛgɔ awe mase. 9 Nto loabara fɔ anɔ ɔwe ɔle lɛ ita nɛ lokpokporo iɖo, ikore iɖo itoreta. Daanigã ma ɣee ati akpakpa ala ma ɔso, atoasɔ kaɖe ga mba atsuele maɖe."

10 Ne ɔɣere me sɔ, "Ɔturi awune ɔbi, kã atɔ̃me ɔɖuɖu wa nto loɣere-ɔ atsue kukaakɔ si amɔɛ̃ wã apia i fɔ ɔtu ame. 11 Kɛlɛ fɔ manyiibi ma i kafɔrɔ̃ ame kɔrɛ, si aɖe ma ika. Ɣere ma sɔ, 'Nnɛgbe i Bosate Wɔ Nsiguso to ɔɣɛ ne,' si mato mabie sɔ maakã atsue ɣee maito mabie sɔ makãatsue."

12 Kere ne siwarã ɔkɔlɛ me kato ne lonɔ iwuwũti silɔ teteree i wũ kama sɔ - Si maale Bosate ikpawaĩ i ɔ̃ kawekɔ̃! 13 Lonɔ ara wa mba ngbã abue silɔ gɔ ato abobore so iso, ne lonɔ kukai gɔ i wã ababa silɔ, iɖe iwuwũti teteree. 14 Siwarã ɔkɔlɛ me kato ne sikɔ me siruigu. Lowe i kaɖo gu sikpã i wũ ame, ɣɛɛ Bosate ɔmɔɛ̃ me ɔla teteree ku ɔ̃ kɔrɔ̃. 15 Kere ne loba mafɔrɔĩ ma nsi i Tel Abib i Kebar Ɔwore kɔrɛ. Mmɔ, i ngbegɔ masɛ ne, lobɔdzo losɛ i ma ndɛ̃ ayi akɔdzɛ - lokpɔkpɔtɔ.

16 Ayi akɔdzɛ kawirikɔ̃ ne Bosate itɔ̃me ɔba me sɔ, 17 "Ɔturi awune ɔbi, loɔbara-ɔ dzuɛ̃se lotã Israel kaɖe, ne ɔso nɔ itɔ̃me nɛ nto loɣɛ si asu wũ isɛ̃itã atã ma. 18 Si loɣere ɔtilese sɔ, 'Gbaã ne ato aakpi,' fiɛ aisɛ̃ atã wũ ɣee aika wũ sɔ ɔnyua nsɛgbai nyanyariã si ɔ̃aɖi ɔ̃ ngbã ne, ɔtilese wɔmɔ to ɔ̃akpi ala ɔ̃ ikpi iti, iyɔ nto loakarɛ ɔ̃ ima lobɔrɛ i fɔ nrɔɔ̃ ame. 19 Ɣɛɛ si asɛ̃ atã ɔtilese fiɛ ɔ̃ifiriki i ɔ̃ nsɛgbai nyanyariã ame ɣee ɔ̃ifiriki i ɔtile ame ne, ɔto ɔ̃akpi i ɔ̃ ikpi iti ɣɛɛ ne ɔɔɖi fɔ mɔmɔ ngbã.

20 "Ana ne si ɔturi bɔlɔlɔa ɔfiriki i ɔ̃ sibɔlɔ ame fiɛ ɔbara iranyanyariã, fiɛ lotã ara lalaa ɔba i ɔ̃ iso ne ɔto ɔ̃akpi. Ala aisɛ̃ atã wũ ɔso ɔto ɔ̃akpi i ɔ̃ ikpi iti. Ara bɔlɔlɔa wa ɔ̃ɔbara ne maisibanyigi wã, fiɛ loakarɛ ɔ̃ ima iti i fɔ nrɔɔ̃ ame. 21 Ɣɛɛ si asɛ̃ atã ɔturi bɔlɔlɔa sɔ ɔdaabara ikpi fiɛ ɔ̃ibara ikpi ne, gbaã ne ɔto ɔ̃asɛ ngbã ala ɔfɔ isɛ̃itã ɔpia i kame, iyɔ ɔɔɖi so."

22 Bosate kɔrɔ̃ ɔsia me iso i mmɔ, ne ɔɣere me sɔ, "Ta ya si akɛlɛ katɛfɛkɔ̃ mmɔ loaɖe-ɔ ika ne." 23 Ne ɔso lota ne lokɛlɛ katɛfɛkɔ̃. Ne Bosate ikpawaĩ ɔya i mmɔ. Ise lɛ ikpawaĩ nɛ loɔnya i Kebar Ɔwore kuruɛ ne loturi lofu anɔ i karɔ̃.

24 Kere ne Siwarã ɔba i wũ ame sitara me siɣedza i wũ ngba iso. Ɔɖe me ika ɔɣɛ sɔ, "Kɛlɛ, si asɛ̃ so apia i fɔ iyo ame. 25 Ɔturi awune ɔbi, fɔ ne mato maanyi-ɔ ku siwɛ̃; maanyi-ɔ gɔ aibawo ɔbɔrɛ akɛlɛ maturi ndɛ̃. 26 Nto loatã fɔ ɔnyagɛmi ɔpɛ ɔmatã i fɔ kanyato sɔ aalokanana aibawo ma ɔnyagalagu, atoasɔ maɖe atsuele kaɖe. 27 Ɣɛɛ si loɖe-ɔ ika ne, nto loabusi fɔ kanya fiɛ aaɣere ma sɔ, ' Bosate Wɔ Nsiguso sɔ,' Ɔrere wɔ loakãatsue ne, mitã si ɔkãatsue, si ɔrere wɔ loasɛ̃ atsueikã ne, si mitã ɔsɛ̃. Ala atsuele kaɖe maɖe ɔso."