EZEKIEL 24

Ikparĩ i Ibui Nɛ Ame Masɛ Mawa Ara

1 I ikɔ kaiwɛ̃va i ma Yudase kuwa kuweova iyi iweova iso ne, Bosate itɔ̃me ɔba me sɔ, 2 "Ɔturi awune ɔbi, sɛ iyi nɛgbe ikpo, nɔme iyi tutuutu. Ala Babilon igara ɔɔtɛ̃ Yerusalem ɔpia ku nɔme iyi tutuutu ɔso. 3 Pɛ atsuele kaɖe gagbe igbã si aɣere ma sɔ, 'Nnɛgbe i Bosate Wɔ Nsiguso to ɔɣɛ sɔ:

" 'Fere ndu i itubui ame,

si asu asia i ɔtɔ iso.

4 Su sina kusɛi pia i ne ame,

sina sɛɛ kusɛi ɔɖuɖu - kukpa gu imɔiti.

Yira itubui ku mina ku akui sɛɛ wa nlɛ aɖo.

5 Su masɛrɛrerɔ̃ mina sɛɛ kere.

Pia ndɔrɛ̃ i itubui ku mina kayirinɔ.

Tã si ifu

iwa sina ku akui wa i ne ame.

6 " 'Ala nnɛgbe i Bosate Wɔ Nsiguso to ɔɣɛ ne:

" ' Ndzo mitã maturiɖuedze ɔmagɛ̃siare.

Ndzo mitã iwabui nɛ loɔpɛmatɔ,

nnɛ ɔkpiti maibawo ɔfore ɔɖi!

Ɖi sina kasɛi kawɛ̃ kawɛ̃ i ne ame

gɔ aibabara kareremi i mina iso.

7 " 'Ala ima nɛ ɔfere i karɔ̃ pia i ɔ̃ ame ɔso.

Ɔ̃isu ne ɔfere i karɔ̃,

ngbegɔ i sise aafu ne iso.

Ɔfere ne i atasiare wawe iso.

8 Si ɔtara sikpã teterea si mabara matikuso

losu ɔ̃ ima lofere i itasiare wawe iso,

si maibafu ne ara.

9 " 'Ne ɔso nnɛgbe i Bosate Wɔ Nsiguso to ɔɣɛ ne:

" ' Ndzo mitã maturiɖuedze ɔmagɛ̃siare!

Mme wũ, nto loasia ndɔrɛ̃ ikpe ikɔlɛ.

10 Ne ɔso sia ndɔrɛ̃ ikpe

si atsue ɔtɔ apia si ɔmɔɛ̃.

Wa sina kukaakɔ,

si alupu akɔrɔ̃kɔrɔ̃ra ku sina.

Ne si atã akui si atsue.

11 Iyɔ si asu iwabui kunu asia i atɔgirĩ iso

gbɔgbɔɔgbɔ iafe ɔtɔ ne ibɔrarɛtɛa ɔrɛtɛ.

Si ne anyini aawanɛkɛ̃

iyɔ ne ɔkpiti aatsue ɔbɔrɛ.

12 Ne kubɛ ɔɖuɖu ɖe siefe,

maiɖi ne ɔkpiti ku ɔrɔrã,

atoa ɔtɔ kɔraa iiwo ne ɔɖi.

13 " 'Kiniɔ ne fɔ anyini nɖe ininaso. Alasɔ lopia kubɛ sɔ loasekelera-ɔ ɣɛɛ aisekele abɔrɛ i fɔ anyini ame. Aisito aasekele ana gbɔgbɔɔgbɔ wũ sikpã teterea i fɔ iso ɔɔbakarɔ.

14 " 'Mme, Bosate loɔɖeika. Ɔwi ɔɣo me gɔ loabara ira. Loibasɛgu ngba kama, loibanyɔ nnya ɣee loibanyua ne ibara. Mato maaɣɛgu-ɔ itɔ̃me i fɔ nsɛgbai gu fɔ arabarara kanya. Bosate Wɔ Nsiguso loɣɛ.' "

Ezekiel ɔ̃ Ɔre Ɔkpi

15 Bosate itɔ̃me ɔba me sɔ, 16 "Ɔturi awune ɔbi, ka nto loba loawuĩ nnɛ nsɛ ipia fɔ anɔ isoɣɔ ku ikama. Ɣɛɛ daamararã so ɣee daabiɛ kaku ɣee daasora nnɔmɛ kumiwɛ̃. 17 Tɔrɛ̃ pɔkɔsɔɔ, daabiɛ kpise. Daaɖi ndokota i fɔ ngba, daakurisi fɔ itinyira i iti. Daafu fɔ anɔ kala kuira fiɛ daaɖe kukuayo kubarara kanya aɖera."

18 Ne ɔso loɖe maturi ika ku kaya, ne wũ ɔre ɔkpi ku kutsuɛ. Kaɖesɛã kaya ne, lobara lɛ maɔɣere me sɔ lobara.

19 Kere ne maturi ɔkarɛ me sɔ, "Aito aɣere bo kuira i nnɛ i ara wagbe ɔsu i bo iso ɣɛɛ?

20 Ne ɔso loɣere ma sɔ, "Bosate itɔ̃me ɔba me sɔ, 21 Ɣere Israel kaɖe sɔ, ' Bosate Wɔ Nsiguso sɔ: Ka nto loba loapia wũ isɔrɛyo ɔgu - ɔlekasɛkɔ̃ ga misɛ mite so iso, nnɛ nsɛ ipia mi anɔ isoɣɔ, ira nɛ misɛ miɖuɛ. Mabirɛrɛĩ gu mabirɔ̃gomi ma minyua misɛ i kama to maarɔ̃ i ipɛmi kanya. 22 Ne mito miabara lɛ loɔbara awe. Miito miafu mi anɔ kala ara ɣee miibaɖe kukuayo kubarara kanya aɖera. 23 Mi atinyira to aasia i mi ati fiɛ mi ndokota to miawe i mi ngba. Miito miamararã so ɣee miito miabiɛ kaku ɣɛɛ mito mianyɛ miro ala mi akpi gu itɔrɛ̃ i mi ndɛ̃ ɔso. 24 Ezekiel to ɔ̃aɖe ikparĩ ɔtã mi. Mito miabara lɛ ɔ̃ɔbara awe. Si nnɛgbe ɔba ne, mito miatsue sɔ Mme nɖe Bosate Wɔ Nsiguso.'

25 Kere ne Bosate ɔɣere me sɔ, "Ɔturi awune ɔbi, fɔ ne, iyi nɛ losu ma ɔlekasɛkɔ̃, ma isoɣɔ gu kulɛ, nnɛ nsɛ ilɛ ma ɔnyɔ, nnɛ masɛ maɖuɛ ku ɔtu ne, loasu ma mabirɛrɛĩ gu mabirɔ̃gomi ana. 26 Ne iyi nɛmɔ ne nwɔ lorui ɔtere to ɔ̃aba ɔ̃aɣere-ɔ nnɛ loba itɔ̃me. 27 Ɔwi wɔmɔ ne mato maabusi-ɔ kanya, ato aaɖegu wũ ika fiɛ aisibalokanana. Ne ɔso ato aaɖe ikparĩ atã ma, ne mato maatsue sɔ Mme nɖe Bosate."