EZEKIEL 21

Bosate Kutsueikpadzɛ̃ Ipɛmi

1 Bosate itɔ̃me ɔba me sɔ, 2 "Ɔturi awune ɔbi, su anɔ nyɔ Yerusalem si aɣɛ itɔ̃me ita iya i isɔrɛyo iso. Ɖikanya ta ya i Israel karɔ̃ iso 3 si aɣere Israel karɔ̃ sɔ, 'Nnɛgbe i Bosate to ɔɣɛ sɔ: Lota loɣɛ-ɔ iso. Nto loakpadzɛ̃ wũ ipɛmi loɖi i ɔyuɛ ame, lowɔra maturi bɔlɔlɔa gu matilese inyɔ ɔɖuɖu loɖi-ɔ iso. 4 Nto loaɖi wũ ipɛmi i ɔyuɛ ame losia i ɔturi biara iso ita i kagbalɔ ikɛlɛ katikpe, alasɔ nto loba loawɔra maturi bɔlɔlɔa gu matilese inyɔ ɔɖuɖu. 5 Iyɔ maturi ɔɖuɖu to maatsue sɔ Mme Bosate loɔkpadzɛ̃ ɔ̃ ipɛmi ɔɖi i ɔyuɛ ame fiɛ iisibakpese kama ana.'

6 "Ne ɔso ɔturi awune ɔbi tɔrɛ̃! Tɔrɛ̃ i ma anɔ ku isoma ɔtu gu imararãso ku ibɛbɛrɛ. 7 Ne si makarɛ-ɔ sɔ, 'Be ɔso ato atɔtɔrɛ̃ ɣɛɛ?' Si aaɣɛ sɔ, 'Ala itɔ̃me nɛ nto iba ɔso. Ɔtu biara to ɔ̃awanɛkɛ̃ fiɛ kɔrɔ̃ biara aakpa fiɛ ɔbiara to ɔ̃afɛ̃, ne igɛgɛ̃ biara to iafɛ̃ lɛ ndu ɔso .' Ito iba! Gbaã, ito iaba, Bosate Wɔ Nsiguso loɣɛ."

8 Bosate itɔ̃me ɔba me sɔ, 9 Ɔturi awune ɔbi, ɖikanya si aɣɛ sɔ, ' Sate sɔ,

" 'Ipɛmi iwɛ̃, ipɛmiɔ,

maruɛ ne fiɛ mabara ne pɔlɔpɔlɔ -

10 maruɛ ne matã iraiɖue,

mabara ne pɔlɔpɔlɔ si ifiɛ lɛ ɔtɔimama!

" 'Boto boana isoɣɔ i wũ ɔbibirɛrɛĩ Yuda kugarapɛ iso? Ipɛmi sɛ inyɔ ɔdziri biara wɔmɔ igbã pupurii.

11 " 'Maɔɖi ipɛmi masɛ sɔ maabara ne pɔlɔpɔlɔ,

si kɔrɔ̃ aamɔɛ̃ ne ila.

Maɔruɛ ne fiɛ maɔbara ne pɔlɔpɔlɔ,

ka ipia i iledza ame itã nwɔ loawɔra ara.

12 Ɔturi awune ɔbi, biɛ ku isoma si asora nnɔmɛ,

ala ita iɣɛ i wũ maturi iso.

Ita iɣɛ i Israel matɔ̃ɖedze iso.

Mato mafuĩdza ma matã ipɛmi

ku wũ maturi.

Ne ɔso pɛ so igbegbe.

13 Bosate Wɔ Nsiguso to ɔɣɛ sɔ, " 'Gbaã ne ilainyɔ to iaba. Be loaba si Yuda kugarapɛ, ngɔ i ipɛmi sɛ inyɔ pupurii, iisikɛlɛ i katɔ̃?'

14 "Ɔso iyɔ ne, ɔturi awune ɔbi, ɖikanya

si apɛ arɔ̃kpasa.

Tã ipɛmi si iwuĩ ara iledza ara iwuĩ,

iwuĩ kɔraa ikpɛ itɛ.

Iraiɖue ipɛmi iɖe -

ipɛmi itã iraiɖue siare,

ibɔrɛ i kasɛ biara isɛ ito iba i ma iso.

15 Ne ɔso situ to siabiɛ

fiɛ mma loarɔ̃ to maasi.

Loɔɣedza ipɛmi lotã iraiɖue

i ma kuyogodɔ̃ ɔɖuɖu kanya.

Ao! Mabara ne sɔ ifiɛ lɛ ɔtɔimama,

maɔmɔɛ̃ ne matã iraiɖue.

16 Ipɛmi, pia igbɛ kɛlɛgu kuɖearɔ̃ iso,

iyɔ si apia igbɛ i kubena iso,

si apia igbɛ i kakɔi biara ga i fɔ ipɛmi iki lo.

17 Mme wũ nto lopɛ arɔ̃kpasa,

iyɔ wũ sikpã teterea to siabakarɔ̃.

Mme Bosate loɔɖeika."

Babilonia Igara Ipɛmi

18 Bosate itɔ̃me ɔba me sɔ, 19 "Ɔturi awune ɔbi, ta siri inyɔ tã Babilon igara ipɛmi si iaki. Siri inyɔ ɔɖuɖu aasɛkarɔ̃ sibɔrɛ i karɔ̃ kawɛ̃ ame. Bara ikparĩɣedzaa i irikpasa i ngbegɔ i ɔri ɔsɛnɛkɛ̃ ɔki ɔkpa ɔmagɛ̃siare ame. 20 Ta ɔri ɔwɛ̃ wɔ iso i ipɛmi aaki ita iya i ma Amonse ɔmagɛ̃siare Raba iso. Si ata ɔri ɔnyɔare wɔ lota ɔya i Yuda gu Yerusalem wɔ matsue ibere mapia iso. 21 Ala Babilon igara to ɔ̃atuĩ i irikpasa, ngbegɔ i siri inyɔ ɔsakanya, si ɔnya ikparĩ: Ɔto ɔ̃abara kareremi ku mirɛ̃. Ɔto ɔ̃akarɛ ara i ɔ̃ arapɔa kɔrɛ ɔnɔ, fiɛ ɔto ɔ̃adzuĩ kumɛgɔ i kɔkɔ aarɛ si maɖue wũ. 22 Si ikparĩ ɔkɛlɛ kuɖearɔ̃ iso ne ite sɔ Yerusalem. Mmɔ ilɛ sɔ ɔ̃asɛ akpakpɛ̃ra wa masɛ masu mabiɛ ibere i kakpã ame fiɛ silɔ aare sitã kakpã gu ituriɖue. Maaɣedza akpo ara i kuyogodɔ̃ iso, mali akpo i ibere iso si maɣedza itɛ̃ipia ara. 23 Yerusalem maturi to maanyɔ sɔ sila sibɔ siɖe ala kanyakawɛ̃ ga maɔbaragu wũ ɔso. Ɣɛɛ igara to ɔ̃anyigira ma i ma ikpi iso, fiɛ ɔto ɔ̃amɔɛ̃ ma mayorɛdze.

24 "Ne ɔso Bosate Wɔ Nsiguso sɔ, 'Ala mito minyigira me mi ikpi ku mi itaiyaiso kpawee, fiɛ mito mibara ikpi i irabiara nɛ mito mibara ame - ala mibara nnɛgbe ɔso ne, mato maamɔɛ̃ mi mayorɛdze.

25 " 'O Israel ɔɖeisoi ɔtilese gu nwɔ loisekele, nwɔ iyi loɔba, nwɔ kutsueikpadzɛ̃ katsɔrakɔ̃ ɔwi ɔɔɣo, 26 nnɛgbe i Bosate Wɔ Nsiguso to ɔɣɛ ne: Ɖi fɔ itinyira, si asisi igarakoto. Iisibase lɛ ise saa: Mma mabɔkarɔ̃ ka mato maakɔlɛ kato fiɛ mma makɔlɛ kato ka mato maabɔkarɔ̃. 27 Iwɔ! Iwɔ! Loto loabara ne iwɔra! Maisibatara wũ gbɔgbɔɔgbɔ nwɔ ɔkpɛ ikote ɔba, ɔ̃ nto loasu ne lotã ne.'

Ma Amonse Gu Ipɛmi

28 "Ɔturi awune ɔbi, fɔ ne, ɖikanya si aɣɛ sɔ, 'Nnɛgbe i Bosate Wɔ Nsiguso to ɔɣɛ i ma Amonse gu ma sitia iso ne:

" 'Ipɛmi iwɛ̃, ipɛmiɔ,

maɔkpadzɛ̃ ne maɖi i ɔyuɛ ame itã iraiɖue.

Mabara ne iso pɔlɔpɔlɔ gɔ iaɖe ara

fiɛ iafiɛ ifere lɛ ɔtɔimama!

29 Fɔ kanyamaɖidze ɔtã-ɔ kasɔla kuɖikute i fɔ iso,

fiɛ fɔ sibɔmapɛdze ɔɔɣɛ mila ara.

Mato maasu wã mapia i

matilese ma mato maaɖue sime iso,

mma iyi loɔba.

Mma kutsueikpadzɛ̃ ɔwi katsɔrakɔ̃ loɔɣo.

30 Kpesera ipɛmi pia i ne ɔyuɛ ame.

I ngbegɔ mabara-ɔ,

i fɔ mawa mɛrɛ̃ karɔ̃ ame.

Nto loaɣɛgu-ɔ atɔ̃me.

31 Loto loaɖi wũ sikpã teterea lofere-ɔ iso,

fiɛ loawarã wũ sikpã nyanyariã lɛ ɔtɔ lofere-ɔ iso.

Loto loasu-ɔ lopia i matilese nrɔɔ̃ ame,

marɛrɛ̃ ma mba kusɛ̃ i ara iwɔra ame.

32 Ato aakpese ira nɛ masɛ mapia i ɔtɔ.

Mato maafere fɔ ima i fɔ karɔ̃ iso.

Maisibanyigi-ɔ ana,

alasɔ Mme Bosate loɔɖeika.' "