1 Bosate sɔ, "Kiniɔ ne, ɔturi awune ɔbi, su ipɛmi nɛ mba ɔbe si abara ne iso karabara lɛ tikparɛ̃dze siwɛrɛ̃ ikparɛ̃ra si akparɛ̃ fɔ iti gu fɔ ɔkore. Su siwɛrɛ̃ dzɛ akparɛ̃ sia i akerera iso si aɣɛ sɛ̃ apia aka atɛ̃ ame. 2 Ɔwi wɔ i fɔ itɛ̃ipia ayi ɔwiri ne, tsuedza siwɛrɛ̃ ika iwɛ̃ i ɔtɔ ame i ɔmagɛ̃siare ame. Su ika iwɛ̃ si awuĩ ne ku ipɛmi aki alɔ ɔmagɛ̃siare. Si asa ika iwɛ̃ afere i ɔwiri ame. Ala nto loatere losiai ma ku ipɛmi. 3 Ɣɛɛ ɖi siwɛrɛ̃ siwɛ̃ si asu ama apia i fɔ arapia sitsueti dzɛ mafɛ̃ masia ame. 4 Ana ne, su sɛ̃ siwɛ̃ dzɛgbe si afuĩdza apia i ɔtɔ ame atsuedza. Ɔtɔ to ɔ̃aɣele ɔbɔrɛ i mmɔ ɔfɔ Israel kaɖe ɔɖuɖu.

5 "Nnɛgbe i Bosate Wɔ Nsiguso to ɔɣɛ ne: Yerusalem i ngbe ne, nwɔ loɣedza i nɖebi ndɛndɛ̃, gɔ nrɔ̃ ɔki milɔ wũ pelepele. 6 Ɣɛɛ i ɔ̃ ɔtile ame ne ɔ̃ɔta ɔya i wũ mmara gu asɛ̃ra iso ɔɖo nɖebi gu nrɔ̃ mɛ loki milɔ wũ. Ɔ̃ɔsɛ̃ wũ mmara fiɛ ɔ̃isiai wũ asɛ̃ra.

7 "Ne ɔso Bosate Wɔ Nsiguso sɔ: Ɔɔbara atsuele aɖo nɖebi mɛ loki milɔ-ɔ fiɛ aisiai wũ asɛ̃ra ɣee aimɔɛ̃ wũ mmara ala. Kɔraa ne aisɛ ngbã abo i nɖebi mɛ loki milɔ asɛra kanya.

8 "Ne ɔso Bosate Wɔ Nsiguso sɔ: Mme, wũ mɔmɔ ka loɔta loɣɛ-ɔ iso Yerusalem, fiɛ nto loakpadzɛ̃-ɔ kutsue i nɖebi anɔmi ame. 9 Ala fɔ anyanya arapɔa ɔso ne, nto loabara-ɔ nnɛ loibara lonya kuiyikuiyi fiɛ loisibabara ne kuiyikuiyi ana. 10 Ne ɔso i fɔ ame ne, mase to maawe ma mabi fiɛ mabi to maawe ma mase. Nto loakpadzɛ̃-ɔ kutsue fiɛ loasamera mma ɔɖuɖu lokuti mapia ngbã lopia i kasɛ biara. 11 Ne ɔso Bosate Wɔ Nsiguso to ɔkã sɔ ayi kumɛgɔ lopia ngbã ne, ala mipukutura wũ isɔrɛyo ku mi aranyanyariã kumiamia ɔɖuɖu gu kubarara nyanyariã ɔso ne, Mme wũ mɔmɔ loarera wũ kayiribielea kama. Loibanyɔ mi nnya fiɛ loakpadzɛ̃ mi ɔɖuɖu kutsue. 12 Fɔ maturi ikatɛa to maakpi ala kukpakpi ɔso ɣee maawɔ i fɔ ame ala kukãsiare iti. Ikatɛa mama to marɔ̃ kakpa i ma matsirise ipɛmi kanya i fɔ abere kama. Ne loasemera ikatɛa ana lopia i kasɛ biara fiɛ loatere losiai ma ku ipɛmi.

13 "Iyɔ wũ sikpã aɣɔ me fiɛ wũ sikpã teterea aaba karɔ̃ i ma iso, iyɔ ne loɔbara lotikuso. Ne si loɔɖi wũ sikpã teterea losia i ma iso ne, mato maatsue sɔ Mme Bosate ne loɖeika ku wũ kubie teteree.

14 "Nto loabara-ɔ ikpakpi gu simaira i nɖebi mɛ loki milɔ kɔrɛ, i mma ɔɖuɖu loaki mafe anɔmi ame. 15 Ato aakpese ira nɛ maabara aɣiãra gu atɔ̃me wa loapia-ɔ sikpã. Ato aaɖe ira nɛ loaɖe isɛ̃itã gu ifɔ̃ra atã nɖebi mɛ loki milɔ-ɔ si lokpadzɛ̃-ɔ kutsue i sikpã gu i sikpã teterea gu inyagalagu nɛ loabo-ɔ ame. Mme Bosate loɔɖeika. 16 Si losese kukãsiare lɛ mirɛ̃ mɛ loɖue fiɛ miwɔra ira awe ne, loapɛ me si lowɔra mi. Nto loakpadzɛ̃ kukãsiare lobɔ loledza ibɔ i mi iso fiɛ loatuĩdza mi araɖea ina siri. 17 Loto loasese kukãsiare gu kuputubɔi nyanyariã i fɔ iso fiɛ maabara-ɔ aisibawe ɔbi. Kukpakpi gu imaiferekarɔ̃ aaba-ɔ iso fiɛ loakpadzɛ̃ ipɛmi losia-ɔ iso. Mme Bosate loɔɖeika."