1 Bosate itɔ̃me ɔba me sɔ, 2 "Igbã nɛ maturi sɛ mapɛ ise i Israel karɔ̃ iso karɔ̃ ɣɛɛ?

" 'Mase sɛ maɖe akutu nyagbala,

ne mabi anyɛ nsɛ abara kpaã.'

3 "Bosate Wɔ Nsiguso ɔkã sɔ ayi kumɛgɔ lopia ngbã ne, miisibapɛ igbã nɛgbe i Israel. 4 Alasɔ ɔturi biara ngbã ɖe wũ mire, ɔse gu ɔbi mɛrɛ̃ - aka anyɔ ɔɖuɖu ɖe wũ ɔkpɛ. Ɔturi wɔ nsɛ ɔbara ikpi nɖe nwɔ loakpi.

5 "Su sɔ ɔturi bɔlɔlɔa ɔwɛ̃ pia,

nwɔ nsɛ ɔbara isɛɛ gu nnɛ loya.

6 Ɔ̃isɛ ɔɖe ara i abe iso kuɣɔka

ɣee ɔ̃isɛ ɔsia anɔ i Israel kaɖe arapɔa iso.

Ɔ̃isɛ ɔrɛgu ɔ̃ ɔnyii ɔre

ɣee ɔ̃isɛ ɔrɛgu ɔrɔ̃go wɔ lopɛ kukpa i karɔ̃.

7 Ɔ̃isɛ ɔyika kuwɛ̃ ɔbɔkarɔ̃,

ɣɛɛ si ɔnyɛ kuso ɔtã ɔturi ne, ɔsɛ ɔkpesera ayaikama ira ɔtã.

Ɔ̃isɛ ɔyukayu

ɣɛɛ ɔsɛ ɔsu ɔ̃ aɖera ɔtã mma kukã to

fiɛ ɔsɛ ɔtã mma nsɛ isɔ̃ arapia.

8 Ɔ̃isɛ ɔnyɛ kuso ɔtã ɔturi ku kusia

ɣee ɔ̃isɛ ɔfɔ kusia gbodzoo i kuso iso.

Ɔ̃isɛ ɔpia arɔĩ i ira lalaa ibara ame

fiɛ ɔsɛ ɔɣɛ itɔ̃me ku ɔnukuare i maturi inyɔ ndɛ̃.

9 Ɔsɛ ɔbara i wũ asɛ̃ra iso

fiɛ ɔsɛ ɔbara i wũ mmara iso ku ɔnukuare.

Ɔrɛrɛ̃ wɔmɔ nse bɔlɔlɔ.

Gbaã ne ɔto ɔ̃asɛ ngbã,

Bosate Wɔ Nsiguso loɣɛ.

10 "Su sɔ ɔrɛrɛ̃ wɔmɔ ba ɔbibirɛrɛĩ ku amumuɣɔ, nwɔ nsɛ ɔɖue maturi ɣee ɔsɛ ɔbara aranyanyariã wagbe amama irere 11 (atoasɔ ɔ̃ ɔse iibara wã kuiwɛ̃):

"Ɔ̃ ɔbibirɛrɛĩ ne, ɔsɛ ɔɖe ara i abe kuɣɔka.

Ɔsɛ ɔrɛgu ɔ̃ ɔnyii ɔre.

12 Ɔsɛ ɔyika mawɛrɛba gu maɣiãni ɔbɔkarɔ.

Ɔsɛ ɔyukayu.

Ɔ̃isɛ ɔkpesera ayaikama wa ɔfɔ i kuso iti ɔtã.

Ɔsɛ ɔsia anɔ i arapɔa iso.

Ɔsɛ ɔbara anyanya kubarara.

13 Ɔsɛ ɔnyɛ kuso ɔtã ku kusia fiɛ kusia sɛ kufe isi.

Ɔturi wɔgbe igbã aasɛ ngbã? Ɔ̃ibasɛ ngbã! Ala ɔ̃ɔbara aranyanyariã wagbe ɔso ne, mato maaɖue wũ fiɛ ɔ̃ ima aasia i ɔ̃ mɔmɔ iti iso.

14 "Ɣɛɛ su sɔ ɔbi wɔgbe ba ɔbibirɛrɛĩ wɔ nsɛ ɔnya ara nyanyariã ɔɖuɖu wa i ɔ̃ ɔse sɛ ɔbara, atoasɔ ɔsɛ ɔnya wã ne, ɔ̃isɛ ɔbara wã igbã ne:

15 "Ɔ̃isɛ ɔɖe ara i abe iso kuɣɔka

ɣee ɔ̃isɛ ɔsia anɔ i Israel kaɖe arapɔa iso.

Ɔ̃isɛ ɔrɛgu ɔ̃ ɔnyii ɔre.

16 Ɔ̃isɛ ɔyika kuwɛ̃ ɔbɔkarɔ̃

ɣee ɔ̃isɛ ɔfɔ kuira ɔsɛ i kuso gɔ ɔnyɛ ɔtã iti.

Ɔ̃isɛ ɔyukayu

ɣɛɛ ɔsɛ ɔsu ɔ̃ aɖera ɔtã mma kukã to

fiɛ ɔsɛ ɔtã mma nsɛ isɔ̃ arapia.

17 Ɔ̃isɛ ɔpia kɔrɔ̃ i ikpi ame

fiɛ ɔ̃isɛ ɔfɔ kusia kukuwɛ̃ ɣee ɔ̃isɛ ɔfɔ kusia ɔfe isi kukuwɛ̃ si ɔnyɛ kuso ɔtã.

Ɔsɛ ɔbara i wũ mmara iso fiɛ ɔsɛ ɔsiai wũ asɛ̃ra.

Gbaã ne ɔto ɔ̃asɛ ngbã, ɔ̃ibakpi i ɔ̃ ɔse akpi iti. 18 Ɣɛɛ ɔ̃ ɔse to ɔ̃akpi i ɔ̃ mɔmɔ akpi iti, alasɔ ɔɖe maturi amumu, ɔyu ɔ̃ ɔnyii ne ɔbara aranyanyariã i ɔ̃ maturi ndɛ̃.

19 "Ɣɛɛ mito mikarɛ sɔ, 'Be ɔso i ɔbibirɛrɛĩ iisɛ ɔfɔ kuso ala ɔ̃ ɔse iɣɛrɛ iti?' Gɔ i ɔbi ɔɔbara nnɛ loya gu isɛɛ fiɛ ɔpia kubɛ ɔmɔɛ̃ wũ asɛ̃ra ɔɖuɖu ɔla ne, gbaã ne ɔto ɔ̃asɛ ngbã. 20 Ɔturi wɔ lobara ikpi ne, ɔ̃ loakpi ne. Ɔbibirɛrɛĩ iibafɔ ɔ̃ ɔse iɣɛrɛ kuso, ɣee ɔse iibafɔ ɔ̃ ɔbi iɣɛrɛ kuso. Ɔturi bɔlɔlɔa sibɔlɔlɔ ɖe ɔ̃ ɔkpɛ, fiɛ ɔtilese ne ɔ̃ ɔtile loaɖe nnɛ iso mabara wũ itɔ̃me.

21 "Ɣɛɛ si ɔtilese ɔfirki i ɔ̃ akpi ɔɖuɖu wa ɔ̃ɔbara ame, ne ɔmɔɛ̃ wũ asɛ̃ra ɔɖuɖu ɔla, ne ɔbara nnɛ loya gu isɛɛ ne, gbaã ne ɔto ɔ̃asɛ ngbã, ɔ̃ibakpi. 22 Maibanyigi ɔ̃ akpi ɔɖuɖu kuiwɛ̃ i nwa ɔ̃ɔbara ɔfegu ame. Ala ara bɔlɔlɔa wa ɔ̃ɔbara ɔso ne, ɔto ɔ̃asɛ ngbã. 23 Bosate Wɔ Nsiguso sɔ: Loisɛ loɖuɛ sɔ ɔtilese si ɔkpi. Bowũ ne nsɛ lona isoɣɔ si mafiriki i ma siri iso si mawe ngbã.

24 "Ɣɛɛ si ɔturi bɔlɔlɔa ɔfirki i ɔ̃ sibɔlɔlɔ ame ne ɔbara aranyanyariã wa ame i ɔtilese sɛ ɔbara ne, ɔto ɔ̃asɛ ngbã? Maisibanyigi ɔ̃ ara bɔlɔlɔa wa ɔ̃ɔbara kuiwɛ̃. Ɔto ɔ̃akpi ala ɔnukuare idaaɖe gu akpi wa ɔ̃ɔbara fiɛ ɔɣɛrɛ ɔso.

25 "Ɣɛɛ misɛ miɣɛ sɔ, ' Sate ɔri iisɛ ɔya.' Mi, Israel kaɖe minɔ lo: Wũ ɔri loisɛ ɔya ɣɛɛ? Iiɖe mi siri bowũ loisɛ siya ɣɛɛ? 26 Si ɔturi bɔlɔlɔa ɔfiriki i ɔ̃ sibɔlɔlɔ ame ne ɔbara ikpi, ɔto ɔ̃akpi i ne iti. Ɔ̃to ɔ̃akpi ala ikpi nɛ ɔbara ɔso. 27 Ɣɛɛ si ɔtilese ɔfiriki i ɔ̃ ɔtile ame ne ɔsɛ ɔbara nnɛ loya gu isɛɛ ne, ɔto ɔ̃aɖi ɔ̃ ngbã. 28 Ala ɔtilese sɛ ɔdzuĩ aɣɛrɛ ɔɖuɖu wa ɔ̃ɔbara fiɛ ɔsɛ ɔfiriki ɔbɔrɛ i wã ame ɔso, gbaã ne ɔto ɔ̃asɛ ngbã, ɔ̃ibakpi. 29 Ɣɛɛ Israel kaɖe sɛ maɣɛ sɔ, ' Sate ɔri iisɛ ɔya.' O Israel kaɖe, wũ siri loisɛ siya ɣɛɛ? Iiɖe mi siri bowũ loisɛ siya ɣɛɛ?

30 Bosate Wɔ Nsiguso nto ɔɣɛ sɔ, "Ne ɔso, Israel kaɖe, nto loaɣɛgu mi ɔbiara atɔ̃me i nnɛ ɔbara kanya lo. Mifiriki! Mifiriki mibɔrɛ i mi aɣɛrɛ ɔɖuɖu ame, iyɔ ikpi iibatã mirɔ̃. 31 Minyua akpi ɔɖuɖu wa mito mibara ɔbara, si mifirikira mi adzuni gu situ mibara siɣɛtɛ. O Israel kaɖe, be ɔso miakpi? 32 Bosate Wɔ Nsiguso sɔ, Ala kuwɛ̃ kukpi iisɛ kupia me isoɣɔ ɔso, mifiriki si misɛ ngbã!