1 I ikɔ kɔdzɛva ame i ma Yudase kuwa ruva iyi iweova iso ne, Israel matɔ̃ɖedze mawɛ̃ ɔba i wũ kɔrɛ si makarɛ ira manɔ i Bosate kɔrɛ. Ne makpase masɛ i wũ katɔ̃.

2 Kere ne Bosate itɔ̃me ɔba me sɔ, 3 "Ɔturi awune ɔbi, ɖe Israel makpakpa ika si aɣere ma sɔ, ' Bosate Wɔ Nsiguso sɔ: Ɔba miɔba sɔ miakarɛ ira minɔ i wũ kɔrɛ? Lokã sɔ ayi kumɛgɔ lopia ngbã ne, loibatã ɔri sɔ mikarɛ me ira minɔ, Bosate Wɔ Nsiguso loɣɛ.'

4 "Ato aaɣɛgu ma itɔ̃me? Ato aaɣɛgu ma itɔ̃me ɔturi awune ɔbi? Iyɔ nyigira ma i anyanya kubarara gɔ i ma mawa ɔbara 5 si aɣere ma sɔ, ' Bosate Wɔ Nsiguso sɔ: Iyi nɛ loɖi Israel ne, lokã ku wũ kɔrɔ̃ i kato lotã Yakob iyo ɔkparɛ ne loɖi so lote ma i Egipte karɔ̃ iso. Ku kɔrɔ̃ i kato ne lokã loɣere ma sɔ, "Mme nɖe Bosate mi Ɣaa ne." 6 Iyi nɛmɔ ne lokã lotã ma sɔ nto loaɖi ma lobɔrɛgu i Egipte karɔ̃ iso, lobɔ i karɔ̃ ga loɔɖi losɛ ma, karɔ̃ sɛɛ ku iɖa iso, nga nto kalɛnyɔ kaɖo i nrɔ̃ ɔɖuɖu ame. 7 Ne loɣere ma sɔ, "Mi ɔbiara si ɔnyua aranyanyariã kumiamia wa misu anɔ minya. Midaapukutura so ku Egipte arapɔa. Mme nɖe Bosate mi Ɣaa."

8 " 'Ɣɛɛ mata maya me iso ne maikã me atsue. Mainyua aranyanyariã kumiamia wa maɔnya fiɛ maisɛ̃ Egipte arapɔa isumu ana. Ne ɔso loɣɛ sɔ nto loakpadzɛ̃ wũ sikpã teterea lofere i ma iso, ne loanagu ma sikpã i Egipte. 9 Ɣɛɛ ala wũ iyere iti ne, lobara nnɛ loatã sɔ iibakpese kunuarɛ i nɖebi mɛ ndɛ̃ masɛ anɔmi ame. Mmagbe anɔmi ame loɔɖi so lote Israel kaɖe, iki i kumɛgɔ loɖi ma lobɔrɛgu i Egipte karɔ̃ iso ne. 10 Ne ɔso lokɔ ma lobɔrɛgu i Egipte karɔ̃ iso ne lobɔ ma i fafuĩ ame. 11 Lotã ma wũ asɛ̃ra ne lotã matsue wũ mmara, alasɔ ɔturi wɔ nsɛ ɔwarɛ mmara to ɔ̃asɛ ngbã iki i me iso. 12 Ana ne lotã ma wũ Awarãyi lɛ ikparĩ i bo gu ma ndɛ̃, si maatsue sɔ Mme Bosate lobara ma sekelee.

13 " 'Ɣɛɛ Israel mabi ɔta maya me iso i fafuĩ ame. Maisiai wũ asɛ̃ra ɣɛɛ masɛ̃ wũ mmara - atoasɔ ɔturi wɔ nsɛ ɔwarɛ mmara sɛ ɔsɛ ngbã iki i me iso - ne mapukutura wũ Awarãyi. Ne ɔso loɣɛ sɔ loakpadzɛ̃ wũ sikpã teterea lofere i ma iso, lowɔra ma i fafuĩ ame. 14 Ɣɛɛ ala wũ iyere iti ne, lobara nnɛ loatã iibakpese kunuarɛ, i nɖebi mɛ anɔmi ame loɔkɔ Israel mabi lobɔrɛgu. 15 Ana ne ku kɔrɔ̃ i kato, lokã lotã ma i fafuĩ ame sɔ loibakɔ ma lobɔ i karɔ̃ ga loɔtã ma iso - karɔ̃ sɛɛ ku iɖa, nga nto kalɛnyɔ kaɖo i nrɔ̃ ɔɖuɖu ame. 16 Loɣɛ nnɛgbe alasɔ masɛ̃ wũ mmara fiɛ maisiai wũ asɛ̃ra, ne mapia wũ Awarãyi ɔgu. Ala ma situ ɔsia i ma arapɔa iso. 17 Ɣɛɛ lonyɔ ma ku nnya ne loiwɔra ma ɣee loinidza ma i fafuĩ ame. 18 Loɣere ma mabi i fafuĩ ame sɔ, "Midaasiai mi mase nsɛgbai ɣee midaabara i ma mmara iso ɣee midaapukutura so ku ma arapɔa. 19 Mme nɖe Bosate mi Ɣaa, misiai wũ asɛ̃ra si mibara i wũ mmara iso kukaakɔ. 20 Mibara wũ Awarãyi sekelee, si aaɖe ikparĩ i bo gu mi ndɛ̃. Iyɔ mito miatsue sɔ Mme nɖe Bosate mi Ɣaa ne."

21 " 'Ɣɛɛ mabi ɔta maya me iso: Maisiai wũ asɛ̃ra, maimɔɛ̃ wũ mmara mala kukaakɔ - atoasɔ ɔturi wɔ nsɛ ɔmɔɛ̃ mmara ɔla sɛ ɔsɛ ngbã i me iso. - Ne mapia wũ Awarãyi ɔgu. Ne ɔso loɣɛ sɔ loakpadzɛ̃ wũ sikpã teterea lofere i ma iso. Ne losiaita sɔ loakpadzɛ̃ ma kutsue i fafuĩ ame. 22 Ɣɛɛ losɛgu wũ kɔrɔ̃ kama, ne ala wũ iyere iti ne, lobara nnɛ loatã sɔ iibaɖe kunuarɛ, i nɖebi mɛ anɔmi ame loɔkɔ ma lobɔrɛgu.

23 Ana ne ku wũ kɔrɔ̃ i kato, lokã lotã ma i fafuĩ ame sɔ, loasamera ma lopia i nɖebi ndɛ̃ fiɛ loasa ma lopia i nrɔ̃ ɔɖuɖu ame. 24 Ala maiwarɛ wũ mmara ɣɛɛ maɔsɛ̃ wũ asɛ̃ra fiɛ mapia wũ Awarãyi ɔgu, ne ma anɔmi ɔsia i ma mawa arapɔa iso ɔso. 25 Ana ne, lonyua ma lotã mmara mɛ loilɛ gu mmɛ loisɛ mikɔ ɔturi ɔna ngbã. 26 Lotã mapukutura so iki i ma karatã - ɔbiɖeakatɔ̃ biara isɔrɛ - si loasu itiikpakpa ku ifɔ̃ lopia i ma ame, si maatsue sɔ Mme nɖe Bosate.'

27 "Ne ɔso, ɔturi awune ɔbi, ɣere Israel maturi sɔ, 'Bosate Wɔ Nsiguso sɔ: I nnɛgbe ame ana ne mi mawa ɔsɛ̃ me fiɛ matia me. 28 Ɔwi wɔ lokɔ ma lobɔ i karɔ̃ ga loɔkã sɔ loatã ma iso ne, si manya kabemi karere ɣee kudziri ku ayata kurere ne, mmɔ masɔrɛ ma ara ne. Ne masɔrɛ ara masu mapia me sikpã, masɔrɛ kuakɔrɔ̃kɔrɔã fiɛ mafere ma aranɛa asɔrɛ i karɔ̃. 29 Kere ne loɣere ma sɔ: Be nɖe kasɔrɛkɔ̃ ga mito misɛ?' " (Masɛ marɔ̃ kã sɔ Bama* ipɛ nɔme.)

30 "Ne ɔso ɣere Israel kaɖe sɔ, ' Bosate Wɔ Nsiguso to ɔkarɛ sɔ: Mito miapukutura so i ɔri wɔ iso i mi mawa ɔbara fiɛ miasiai i ma kumiamia nyanyariã kama? 31 Gɔ mito mitã mi karatã - ne mito misɔrɛ mi mabi i ɔtɔ ame - ne mitogu so ipukutura ku mi arapɔa ɔɖuɖu ipɛ nɔme ne. O Israel kaɖe, nto loatã sɔ miakarɛ ira minɔ i wũ kɔrɛ? Bosate Wɔ Nsiguso ɔkã sɔ ayi kumɛgɔ lopia ngbã ne, loibatã mikarɛ me ira minɔ.

32 " 'Misɛ miɣɛ sɔ, "Boto bobie sɔ boase lɛ nɖebi, lɛ kayiiso maturi ma nsɛ masɔrɛ ata gu adziri." Ɣɛɛ nnɛ miba i adzuni ame iibaba i kame.

33 Bosate Wɔ Nsiguso ɔkã sɔ, ayi kumɛgɔ lopia ngbã ne, nto loaɖe mi iso ku kɔrɔ̃ ɔle siare. Loto lokɔlɛ kɔrɔ̃ siare kato gu sikpã teterea losia i mi iso. 34 Loto loasa mi kanya - ku kɔrɔ̃ ɔle gu kɔrɔ̃ siare ikɔlɛ kato ku sikpã teterea, lobɔrɛgu i nɖebi gu nrɔ̃ mɛ ame miɔsame mipia. 35 Nto loakɔ mi lobɔ i nɖebi mɛ i fafuĩ ame, ne loatã mi ipɔ anɔ ku anɔ i mmɔ. 36 Bosate Wɔ Nsiguso nto ɔɣɛ sɔ: Loto loakpadzɛ̃ mi kutsue lɛ lobara mi mawa i Egipte fafuĩ karɔ̃ iso. 37 Loto loanyɔ mi losɛ ikpo kukaakɔ gɔ mito miki i kutseikpadzɛ̃ ame fiɛ loabɔ mi i ndamu mɛ lobara asɛra kayirinɔ. 38 Loto loaɖi mma lota maya me iso ku ikpi ise i mi matsɔra iso. Atoasɔ nto loakɔ ma lobɔrɛgu i ngbegɔ i karɔ̃ ga ame masi ɣɛɛ ne, maibabo i Israel karɔ̃ iso. Iyɔ mito miatsue sɔ Mme nɖe Bosate.

39 " ' Bosate Wɔ Nsiguso sɔ, O Israel kaɖe, mi ne, mi ɔbiara si mikɛlɛ miasumu mi arapɔa! Ɣɛɛ ne kama ne, gbaã mito miakã me atsue fiɛ mianyua kunuarɛ ibɔ i wũ iyere sekelea iwarɛ iso ku mi karatã itã arapɔa. 40 Bosate Wɔ Nsiguso sɔ: Ala i wũ kube sekelea, Israel kube kɔlɛa iso ne, mmɔ i karɔ̃ ame ne, Israel maturi ɔɖuɖu to maasumu me iyi iwɛ̃, ne loafɔ ma lopia. Mmɔ loabie sɔ mibɔ me mi asɔrɛ gu mi karatã sɛɛ si misɔrɛ ku mi asɔrɛ sekelea ɔɖuɖu. 41 Loto loafɔ mi lopia lɛ kuakɔrɔ̃kɔrɔã, si losa mi kanya loɖi mi lobɔrɛgu, i nɖebi gu i nrɔ̃ mɛ ame miɔsame mipia. Ne loaɖi so lote sɔ lose sekelee i mi ndɛ̃ i nɖebi anɔmi ame ne. 42 Iyɔ mito miatsue sɔ Mme nɖe Bosate, si lokɔ mi lobɔ i Israel karɔ̃ ame, karɔ̃ ga loɔkɔlɛ kɔrɔ̃ kato lokã sɔ loto loatã mi mawa. 43 Mmɔ mito mianyigi mi nsɛgbai gu ara wa miɔbara misu mipukutura so. Ne ito iabo mi so ala aranyanyariã ɔɖuɖu wa miɔbara iti. 44 Bosate Wɔ Nsiguso sɔ: Israel kaɖe, mito miatsue sɔ Mme nɖe Bosate lo, si lokpadzɛ̃ mi kutsue ala wũ iyere iti. Ne iiɖe mi siri nyanyariã gu mi ɔtile kurabarara gu i mi kubarara gɔ minina so ala iti.' "

45 Bosate itɔ̃me ɔba me sɔ, 46 "Ɔturi awune ɔbi, su fɔ anɔ nyɔ kagbalɔ. Ɣɛ itɔ̃me si aɖikanya ata aya i kagbalɔ karɔ̃ ipo iso. 47 Ɣere kagbalɔ ipo sɔ, 'Nɔ Bosate itɔ̃me. Nnɛgbe i Bosate Wɔ Nsiguso to ɔɣɛ ne: Ka nto loba loapia-ɔ ɔtɔ, ne ɔ̃atsuedza fɔ adziri ɔɖuɖu, ayuɛ gu akorea pelepele. Ɔtɔ wɔ lowara ɔto ɔtsue ne, ɔ̃ibanyi ne irabiara ita i kagbalɔ ikɛlɛ katikpe to iatsue. 48 Ɔbiara to ɔ̃anya sɔ Mme Bosate Mme loɔpia ɔtɔ, ɔ̃ibanyi.' "

49 Kere ne loɣɛ sɔ, "Ao Bosate Wɔ Nsiguso! Mato maɣɛ i wũ iso sɔ, 'Iiɖe agbã kere ɔto ɔpɛ ɣɛɛ?' "