1 Ɔrɛrɛ̃ ɔkpesera me ɔbɔ i isɔrɛyo kabɔrɛnya, ne lonya ndu to mibore mibɔrɛ i isɔrɛyo kukui kayirinɔ, mikɛlɛ kuɣɛ̃kabɔrɛkɔ̃ isɛ (ala isɔrɛyo to inyɔ kuɣɛ̃kabɔrɛkɔ̃ isɛ). Ndu to mibɔrɛ i isɔrɛyo kagbalɔ ibaba kayirinɔ, i isɔrɛkasege kagbalɔ. 2 Kere ne ka ɔkɔ me ɔbɔrɛgu i katikpe kayogodɔ̃, ne ka ɔkɔ me ɔkikigu i kayogodɔ̃ ga nto kanyɔ kuɣɛ̃kabɔrɛkɔ̃ inyamɔ, ne ndu to mibore mibɔrɛ i kagbalɔ ibaba.

3 Gɔ i ɔrɛrɛ̃ to isusuwɛĩ i kɔrɔ̃ ame to ɔkɛlɛ kuɣɛ̃kabɔrɛkɔ̃ isɛ ne, ɔsusu lɛ meta alafa aru (500) ne ɔkɔ me ɔkigu ndu mɛ lowodoro ibo ikpakpokpo. 4 Ɔsusu meta alafa aru ne ɔkɔ me ɔkigu i ndu mɛ lowodoro ibo igɛgɛ̃. Ne ka ɔsusu meta alafa aru mama ne ɔkɔ me ɔkigu i ndu ame ne iwodoro ibo ɔsɔ. 5 Ɔsusu meta alafa aru mama ɣɛɛ kiniɔ ne iɖe ɔwore wɔ loibawo ɔwara, ala ndu ɔɔkɔlɛ fiɛ misi gɔ ka maaɣa - ɔwore wɔ kuwɛ̃ iibawo ɔwara. 6 Ɔkarɛ me sɔ, "Ɔturi awune ɔbi, ato anya nnɛgbe?"

Ne ɔkɔ me ɔkpesegu ɔkɛlɛgu i ɔworekpokpo. 7 Gɔ lobo i mmɔ ne, lonya adziri kusime gbodzoo i ɔwore kasɛ biara iso. 8 Ɔɣere me sɔ, "Ndu mɛgbe to mibore mikɛlɛ kuɣɛ̃kabɔrɛkɔ̃ ibuiti ame ne misɛ miso mikɛlɛ Araba, ngbegɔ misɛ mibo i Ɔpo ame. Si mibo i ɔpo ame ne misɛ mitã ndu ɔse kukaakɔ. 9 Ara wa mba ngbã akuri to aawe i kakɔi karere ga i ɔwore sɛ ɔbore ɔkɛlɛ. Afara kusime gbodzoo to kuawe, ala ndu mɛgbe sɛ mibore mikɛlɛ i mmɔ fiɛ misɛ mibara mma ndu mise kukaakɔ. Ne ɔso kakɔi biara ga i ɔwore sɛ ɔbore ɔkɛlɛ ne irabiara sɛ iwe ngbã. 10 Akpɛmaɖidze to maaya i ɔkpokpo ikɛlɛ, ita i En Gedi ikɛlɛ En Eglayim. Ito iaɖe ngɔi mɛ mapia asabu. Afara agbãagbã to aawe - lɛ afara wa mpia i Mediterania Ɔpo ame. 11 Ɣɛɛ karɔ̃isɛkɔ̃ ga nsɛ kafɔ ndu gu karɔ̃ ga mpia i ndu gu karɔ̃ ndɛ̃ iito mialɛ, mito miase mitã mma. 12 Aɖedziri igbã biara to aaya i siworekpokpo inyɔ ɔɖuɖu. Wã ayata iibaɣɔ ɣee aibasɛ̃ abi iɣɔ̃. Ato aaɣɔ̃ abi ku kuwa biara, ala ndu mɛ lobɔrɛ i isɔrɛyo ame sɛ mibore mikɛlɛ wã kɔrɛ ɔso. Wã adziribi to aaɖe aɖera fiɛ wã ayata to aaɖe ira itã isosarɛ."

13 Nnɛgbe i Bosate Wɔ Nsiguso to ɔɣɛ ne: "Nwagbe nɖe ame wa iso aaɣɛ karɔ̃ ga nɖe kaɖekɔ̃ atã Israel kumele kuweo-kunyɔ ne, ku kusɛ aka anyɔ itã Yosef. 14 Ikote sɔ aaɣɛ karɔ̃ tsɛtsɛɛtsɛ atã ma. Ala lokã ku wũ kɔrɔ̃ i kato sɔ loatã fɔ mawa karɔ̃, karɔ̃ gagbe aakpese mi kaɖekɔ̃.

15 "Nnɛgbe loakpese karɔ̃ kume ne:

"I katikpe isɛ ne, kume aata kubɔrɛ i Mediterania Ɔpo iso i Xetlon ɔmagɛ̃siare ɔri kɔrɛ ife Lebo Xamat ikɛlɛ Zedad, 16 Berota gu Sibarayim (wɔ nrɛ i Damasko gu Xamat ndɛ̃), ikɛlɛ ta Xazar Xatikon wɔ mpia i Xauran kume iso. 17 Kume to kuakɛlɛ ita i ɔpo iso ikɛlɛ Xazar Enan, kusɛ i Damasko katikpe kume iso, ku Xamat kume i katikpe. Nnɛgbe loaɖe katikpe kume.

18 "I kuɣɛ̃kabɔrɛkɔ̃ isɛ ne kume to kuasɛ i Damasko gu Xauran ndɛ̃, ikɛlɛ Yordan gu Gilead ndɛ̃ gu Israel karɔ̃, ikɛlɛ kuɣɛ̃kabɔrɛkɔ̃ ɔpo gu ta Tamar.

19 "I kagbalɔ isɛ ɔkpɛ ne kuasɛ kuta i Tamar kukɛlɛ ta Meriba Kades ndu iso, iyɔ kuasɛ i Egipte Kagbolomi ame ikɛlɛ Mediterania Ɔpo iso. Nnɛgbe loaɖe Kagbalɔ kume ne.

20 "I kuɣɛ̃kabokɔ̃ isɛ ne, Mediterania ɔpo aaɖe kume ikɛlɛ kakɔi ga mpia Lebo Xamat kanɔsɔ̃. Nnɛgbe loaɖe kuɣɛ̃kabokɔ̃ kume ne.

21 "Ikote sɔ miaɣɛ karɔ̃ gagbe mitã so i Israel kumele kanya. 22 Ikote sɔ miatã kã lɛ kaɖekɔ̃ mitã mi mɔmɔ gu mafɔ ma loɔsɛ i mi ndɛ̃ fiɛ maba mabi. Ilɛ sɔ miafɔ ma mipia lɛ Israel mabi godɛã, ku mi ilɛ sɔ maatã ma kaɖekɔ̃ i Israel kumele ndɛ̃. 23 Ku kamele karere ga ame i ɔfɔ sɛ ɔsɛ ne, mmɔ miatã wũ ɔ̃ kaɖekɔ̃ ne," Bosate Wɔ Nsiguso nto ɔɣɛ.