EZEKIEL 13

Kanyaiɖi Ita Iya i Mila Kanyamaɖidze Iso

1 Bosate itɔ̃me ɔba me sɔ, 2 "Ɔturi awune ɔbi, ɖikanya ta ya i Israel kanyamaɖidze ma ka nto maɖikanya kiniɔ iso. Ɣere mma nsɛ maɖikanya ku ma mɔmɔ adzuni sɔ, 'Minɔ Bosate itɔ̃me! 3 Bosate Wɔ Nsiguso sɔ: Ndzo mitã madzunisɛĩ kanyamaɖidze ma nsɛ masiai ma mɔmɔ siwarã fiɛ mainya kuira! 4 O Israel, fɔ kanyamaɖidze se lɛ aboroi i akpakpi ndɛ̃. 5 Miiya mikɛlɛ miabara kuira i ibere kubiɛkɔ̃ iledza iso mitã Israel kaɖe. Miibuai ne sɔ iaya teteree i kakpã ame ku Bosate iyi. 6 Ma kuɖikute ɖe kasɔla ne ma sibɔipɛ ɖe mila. Masɛ maɣɛ sɔ, "Bosate sɛ ɔɣɛ sɔ," ku ɔwi wɔ i Bosate iipia ma katɔ̃me. Ɣɛɛ mato manyɔ ɔri sɔ ma atɔ̃me si aba i kame. 7 Miɔnya kasɔla kuɖikute ne miɔɣɛ mila sibɔipɛ ku ɔwi wɔ miɣɛ sɔ, "Bosate loɣɛ," atoasɔ loiɖeika.

8 " 'Ne ɔso Bosate Wɔ Nsiguso sɔ: Ala mi kasɔla atɔ̃me gu mila kuɖikute ɔso ne, lota loɣɛ i mi iso, Bosate Wɔ Nsiguso loɣɛ. 9 Wũ kɔrɔ̃ to kuata kuya i kanyamaɖidze ma nsɛ manya kasɔla kuɖikute fiɛ masɛ mapɛ mila sibɔ iso. Maibawe i wũ maturi isarɛ ikuri ndɛ̃ ɣee maibatsɛrɛ ma ayere mapia i Israel kaɖe ara ame, fiɛ maibabo i Israel karɔ̃ ame. Iyɔ mito miatsue sɔ Mme nɖe Bosate Wɔ Nsiguso.

10 " 'Ala masɛ makã wũ maturi mayura, mato maɣɛ sɔ, "Isobuɛ," ku ɔwi wɔ i isobuɛ na. Ana ne, ala si matsue ibere nɛ nna ɔle ne, masɛ makua ne ku kukua fudza. 11 Ne ɔso ɣere mma nsɛ makua ne ku kukua fudza sɔ ito iarɔ̃. Kado to ɔ̃aba teteree fiɛ loasese atumagirĩ fiɛ awɛ nyanyariã to aabɔrɛ aba. 12 Si ibere sɛ irɔ̃ ne, maturi iito maakarɛ-ɔ sɔ, "Lɛ i kukua fudza gɔ akua ne pia ɣɛɛ?"

13 " 'Ne ɔso Bosate Wɔ Nsiguso sɔ: I wũ sikpã teterea ame ne, nto loasese ɔwiri nyanyariã ne i wũ sikpã ame ne, loasese atumagirĩ ku kado wɔ loapɛ ku iwɔra sikpã. 14 Loto loabibiɛ ibere ne mikua ifudza fiɛ loabara ne parata ku karɔ̃ sɔ ibere ɔkaĩ aase wawe. Si isɛ irɔ̃ ne, mito miawɔ i ne ame, iyɔ mito miatsue sɔ Mme nɖe Bosate. 15 Ne ɔso nto loaɖi wũ sikpã losia i ibere iso gu i mma lokua ne ifudza iso. Loto loaɣere mi sɔ, "Ibere ka ikpa fiɛ ngbɔ ame i mma lokua ne ana ne. 16 Mma nɖe Israel kanyamaɖidze maladze, mma loɖikanya matã Yerusalem fiɛ manya isobuɛ kuɖikute matã wũ ku ɔwi wɔ i isobuɛ na ne, Bosate Wɔ Nsiguso loɣɛ." '

Kanyaiɖi Ita Iya i Kanyamaɖidzerɔ̃go Iso

17 "Kiniɔ, ɔturi awune ɔbi, su fɔ anɔ si anyɔ marɔ̃go ma i fɔ maturi ame, mma nsɛ maɖikanya i ma mɔmɔ adzuni iso. Ɖikanya ta ya i ma iso 18 si aɣɛ sɔ, 'Bosate Wɔ Nsiguso sɔ: Ndzo mitã marɔ̃go ma lobara awa sisɔbɛ mapia i nrɔɔtɔ̃ ɔɖuɖu. Ne mabara kudza kukarãme agbã matã ma ati si magbere maturi. Mito miapia wũ maturi ngbã i iyebi ame ɣɛɛ miledza mi mire? 19 Miɔpukutura me i wũ maturi ndɛ̃ ala kakpã arɔ̃kɔkɔ kɛkɛĩ gu boɖoboɖo kusɛi iti. Iki i kumɛgɔ misɛ mila mila mitã wũ maturi, mma nsɛ makã mila atɔ̃me atsue. Miɔɖue mma tee maibakpi ne miɔfɔ mma ikote sɔ maakpi mipia i ngbã ame ne.

20 " 'Ne ɔso Bosate Wɔ Nsiguso sɔ: Lota loɣɛ i mi awa sisɔbɛ wa misu mito migbere maturi lɛ kurodzai, ne nto loakɛkɛ wã loɖi i mi nrɔɔ̃ iso. Nto loatã maturi ma migbere lɛ kurodzai ɔna iwarã. 21 Loto loakɛkɛ mi kudza loɖi fiɛ loaɖi wũ maturi i mi nrɔɔ̃ ame. Iyɔ wũ maturi iisibarɔ̃ mi awara ɔle ayebi. Kere ne mito miatsue sɔ Mme nɖe Bosate. 22 Ala mibiɛ maturi bɔlɔlɔa situ ku mi mila, gɔ loibɔ ma isoma kuiwɛ̃ ɔso. Ala mipia matilese katetere si madaanyua ma siri nyanyariã si maaɖi ma ngbã ɔso. 23 Ne ɔso miisibanya kasɔla kuɖikute ɣee miisibabara sibɔipɛ ara. Loto loaɖi wũ maturi lobɔrɛgu i mi nrɔɔ̃ ame. Iyɔ ne, mito miatsue sɔ Mme nɖe Bosate.' "