1 Iyi ruva ku ma Yudase kuwa naare i ikɔ sitɛare ame ne, gɔ lowe i mafɔrɔĩndɛ̃ i Kebar Ɔwore kɔrɛ ne, mabusi kato ne lonya Ɣaa kuɖikute.

2 Iyi ruva i kuwa ame ne - iɖe ikɔ ruva gɔ mamɔɛ̃ Igara Yexoyakin makɛlɛgu i kafɔrɔ̃ iso- 3 Bosate itɔ̃me ɔba Buzi ɔbibirɛrɛĩ sɔrɛdze Ezekiel kɔrɛ, i Kebar Ɔwore kɔrɛ i ma Babiloniase karɔ̃ iso. Mmɔ i Bosate kɔrɔ̃ ɔsia i ɔ̃ iso.

4 Lonyɔ, ne lonya ɔwiri to ɔkpɛ̃ teteree ɔbɔrɛ i katikpe ɔba - idɔdɔ siare ku ɔtɔimama fiɛ ɔtɔ ifiɛ siare ɔki ilɔ ne. Ɔtɔ ndɛndɛ̃ ɔbe ɔrɛtɛ lɛ ibɔra lomɔɛ̃ ɔtɔ ito. 5 I ɔtɔ ame ne iraɔ pia gɔ inyɔ lɛ ara ana wa mba ngbã awe. Si anyɔ wã ne, kuseme ɔnyɔ lɛ ɔturi awune awe. 6 Ɣɛɛ wã ibiara ɔwe ntɔ̃ mina gu abue ana. 7 Wã ngba ɔse siĩ ne ngbatɔ̃ ɔnyɔ lɛ inantsuĩbi mire ne ito ifiɛ lɛ ayiwa wa lotsue awe. 8 Abue wa mpia i wã ababa ana ɔwe ɔturi awune nrɔɔ̃ i kayirinɔ. Wã ana ɔɖuɖu ɔwe ntɔ̃ gu abue, 9 fiɛ ara wã ana abue ɔpɛgu so. Ma ɔbiara ɔsɛ siĩ ɔkɛlɛ katɔ̃, maisɛ mapɛ mafiriki si masɛ.

10 Kumɛgɔgbe i ma ntɔ̃ ɔnyɔ ne: Ma ina ɔbiara ɔwe ɔturi awune katɔ̃, ne i kuɖearɔ̃ isɛ ne ma ɔbiara ɔwe dzata katɔ̃, ne i kubena iso ne mawe nantsuĩrɛrɛ̃ katɔ̃ fiɛ ma ɔbiara ɔwe finikpo katɔ̃ ana. 11 Kumɛgɔgbe i ma ntɔ̃ ɔse ne. Mawarɛ ma abue makɛlɛgu i kato. Ma ɔbiara ɔwe abue aka anyɔ, abue anyɔ ika iwɛ̃ ɔpɛgu ɔmama are i kasɛ biara iso, ne abue aka anyɔ ana ɔfu i ma mɔmɔ iso. 12 Ma ɔbiara ɔsɛ siĩ ɔkɛlɛ katɔ̃. Kakɔi karere ga i siwarã ɔkɛlɛ ne, masɛ makɛlɛ, gɔ maisɛ mafiriki si mato makɛlɛ. 13 Ara wa mba ngbã ɔnyɔ lɛ akaĩ wa lowara ku ɔtɔ ato atsue ɣee lɛ kaka. Ɔtɔ ɔsɛ katɔ gu kama i ara wa mba ngbã ndɛ̃, ikpa fiɛ ɔtɔimama ɔfiɛ ibɔrɛ i ne ame. 14 Ara wa mba ngbã ɔtere ise akɛlɛ katɔ̃ gu kama lɛ ɔtɔ imama awe.

15 Gɔ ame nto lonyɔ ara wa mba ngbã ne, lonya kakai i ara wa mba ngbã ku ma ntɔ̃ mina ibiara ibaba i karɔ̃. 16 Kumɛgɔgbe i kukai ɔnyɔ gu kɔ̃ kuseme ne: Kufiɛ lɛ itafɔkuɣa Kirisolit, fiɛ kɔ̃ kuna ɔɖuɖu ɔre so. Ibiara ɔnyɔ lɛ kakai kawɛ̃ mpia i kamama ame. 17 Si kukai sɛ ne, kusɛ kukɛlɛ isɛ irere i ababa ana irere nɛ i ara wa mba ngbã to anyɔ. Kukai iisɛ kupɛ kufiriki gɔ i ara wa mba ngbã ɔsɛ akɛlɛ. 18 Kɔ̃ situeti ɔkɔlɛ fiɛ iɖe ifɔ̃ra, ne situeti ina ɔɖuɖu ɔyigu anɔmi aki alɔ.

19 Si ara wa mba ngbã ɔsɛ ne, kukai gɔ i wã ababa ɔsɛ. Si ara wa mba ngbã ɔta i karɔ̃ ne, kukai ana ata. 20 Kakɔi karere ga i siwarã aakɛlɛ ne, wã wũ akɛlɛ fiɛ kukai ana aatagu wã, alasɔ ara wa mba ngbã siwarã ɔwe i kukai ame. 21 Si ara wa mba ngbã ɔsɛ ne, kɔ̃ wũ kusɛ; si ara wa mba ngbã ɔtuĩ aya ne, kɔ̃ wũ kutuĩ kuya. Si ara wa mba ngbã ɔta i karɔ̃ ne kukai ɔta ku wã, alasɔ ara wa mba ngbã siwarã ɔwe i kukai ame.

22 Ira nɛ lonyɔ lɛ ndunyia ita nɛ nto ifiɛ fiɛ iɖe ifɔ̃ra ɔwarɛ i ɔwiri ame ifere i ara wa mba ngbã ati kato. 23 I nnɛ lowarɛ i ma ati kato i ɔwiri ame kayirinɔ ne, ara wa mba ngbã abue ɔbusi abɔrɛ akɛlɛ imama kɔrɛ, ne ibiara ɔwe abue anyɔ wa lofu i ne mɔmɔ iso. 24 Si ara wa mba ngbã ɔsɛ ne, lonɔ wã abue silɔ, lɛ ndu mɛ ntere silɔ, lɛ Ɔlesate silɔ, lɛ makpakpɛ̃dze kulu. Si matuĩ maya ne, mabɔ ma abue karɔ̃.

25 Kere ne silɔ ɔbɔrɛ i nnɛ nfu kato i ɔwiri ame i ara wa mba ngbã ati kato, gɔ ame matuĩ maɣɛ fiɛ mabɔ abue karɔ̃. 26 I nnɛ nfu i ɔwiri ame i ma ati kato ne, ira nɛ lonyɔ lɛ itafɔkuɣa safir ise bulu sigaraiyara ɔwe. Ira nɛ lonyɔ lɛ ɔturi awune kuseme ɔwe i kakɔlɛkɔ̃ i sigaraiyara iso. 27 Lonya sɔ nnɛ lote so lɛ ɔ̃ ɔsɔ kato ne, ɔnyɔ lɛ ibɔra nɛ lobe irɛtɛ ku ɔtɔ, ne ita i mmɔ ikɛlɛ kala ne ɔnyɔ lɛ ɔtɔ, ne ɔtɔ ifiɛ siare ɔki ilɔ wũ. 28 Ifiɛ nɛ loki ilɔ wũ ne, inyɔ lɛ ɔbebei i adɔdɔ ame ku kado iyi.

Nnɛgbe loɖe Bosate ikpawaĩ kuseme lɛ iɖi so ite. Gɔ lonya ne ne, loturi lorɛ lofu anɔ i karɔ̃, ne lonɔ ɔwɛ̃ silɔ ɔto ɔɖeika.