EZEKIEL 4

Yerusalem Itɛ̃ipia Ikparĩ

1 Ɣaa ɔɣɛ sɔ, "Kiniɔ, ɔturi awune ɔbi, su ita nɛ masu kupɔse mabara sɛ i fɔ katɔ̃, si ata Yerusalem ɔmagɛ̃siare asia i ne iso. 2 Iyɔ si atɛ̃ wũ apia lɛgbe. Ɣedza itɛ̃ipia ara i ɔ̃ iso, si abara sikparuɛ siri asia i ɔ̃ iso, si abara kusɛkɔ̃ aki alɔ wũ si ali akpo aki alɔ wũ. 3 Iyɔ si asu ibɔrakpinaa igbɛɛ, si asu ne asɛ lɛ ibɔrakpinaa ibere i mi gu ɔmagɛ̃siare ndɛ̃, si apɛ fɔ katɔ̃ afiriki anyɔ ɔmagɛ̃siare isɛ. Ɔto ɔ̃awe i itɛ̃ipia ame, ne ato aatɛ̃ wũ apia. Nnɛgbe nto iaɖe ikparĩ itã Israel kaɖe.

4 "Iyɔ rɛ i fɔ kubena iso si asu Israel kaɖe ikpi asia so iso. Ato aasore ma akpi itã ayi wa ato aarɛ i fɔ kasɛ iso. 5 Loɔsɛ-ɔ ayi kusime lɛ ma akpi akɔ kusime kanya. Ne ɔso ayi kulafa gu kasiwɛ̃ ato aasore Israel kaɖe akpi.

6 "Si ɔɔro nnɛgbe kama ne, rɛ i fɔ kuɖearɔ̃ iso ana, ku ɔwi wɔgbe, si asore Yuda kamele akpi. Loɔsɛ-ɔ ayi sina, iyi biara itã ikɔ iwɛ̃. 7 Pɛ fɔ anɔ firikira nyɔ i Yerusalem itɛ̃ipia isɛ. Ne ku nrɔɔ̃ mɛ ɔɔledza atã ikpɛ̃ si aɖikanya ata aya i ɔ̃ iso. 8 Nto loanyi-ɔ ku siwɛ̃ si aibawo ɔrɛ i kasɛ kawɛ̃ akɛlɛ kasɛ mama gbɔgbɔɔgbɔ ɔɔro fɔ itɛ̃ipia ayi.

9 "Su kamɔ gu kakpã, kaɣakpei gu ayiforobi, kakpã rɛtɛa gu atitabi. Ledza wã sɛ i kabui ame si asu wã abara aɖera atã so. Wã ato aaɖe i ayi alafa atɛ gu kasiwɛ̃ wa ame ato aarɛ i fɔ kasɛ iso. 10 Kere sekel sinyɔ araɖea wa aaɖe itã iyi biara, si aɖe wã ku ɔwi wɔ masɛ iso. 11 Si asusu ndu lɛ lita kaku si anɛ me ku ɔwi wɔ masɛ iso. 12 Ɖe aɖera lɛ kumɛgɔ aaɖe atitabi boɖoboɖo awe. Su maturi mmi lɛ ɔtɔipiara wa aɖera i maturi anɔmi ame." 13 Bosate ɔɣɛ sɔ, "I ɔri wɔgbe iso ne Israel maturi to maaɖe aɖera wa mapukutura i nɖebi mɛ ame nto loasa ma lokɛlɛgu."

14 Kere ne loɣɛ sɔ, "Bosate Wɔ Nsiguso! Ooɣo iibase kumɛɔ, loipukutura so kuiyikuiyi. Ita i wũ sibiɛtɛ ame iba iabo kiniɔ ne, loiɖe kuira nɛ lokpi ɣee kaputubɔi ɔkɛkɛ kasɛ lonya kuiyikuiyi. Sina dzɛ loisekele kusiwɛ̃ iibo me i kanya kuiyikuiyi."

15 Ɔɣɛ sɔ, "Ilɛ gbaã, loatã awa aɖera ku nantsuĩ mmi i ɔturi awune mmi kanya."

16 Kere ne ɔɣere me sɔ, "Ɔturi awune ɔbi, nto loatuĩdza araɖea ibɔ Yerusalem siri. Maturi to maayasoiso maaɖe aɖera wa maɣɛ fiɛ maanɛ ndu mɛ maɣɛ gɔ maayu ɔriinyɔ, 17 ala araɖea gu ndu idaawe ɔso. Sitsue to siabɔrɛ ma si manya so fiɛ mato maakore maɖi akui ala ma akpi ɔso."