EZEKIEL 8

Iɣɔsɔrɛ i Isɔrɛyo Ame

1 Iyi ruva i kuwa kuɔva i ikɔ kuɔva ame ne, gɔ lokpase losɛ i wũ iyo ne Yuda makpakpa ɔsɛ i wũ anɔmi ame. Kere ne Bosate Wɔ Nsiguso kɔrɔ̃ ɔsia i wũ iso i mmɔ. 2 Lonyɔ, ne lonya ira nɛ lonyɔ lɛ ɔturi awune. Kakɔi ga lonyɔ lɛ ɔ̃ ɔsɔ ikɛlɛ karɔ̃ ne ɔse lɛ ɔtɔ, ne ita i mmɔ ikɛlɛ kato ne ɔ̃ kuseme ɔnyɔ lɛ ibɔra ifiɛ awe. 3 Ɔɖi ira nɛ lonyɔ lɛ kɔrɔ̃ ne ɔmɔɛ̃ me ku wũ iti siwɛrɛ̃. Siwarã ɔtara me kato sipia i karɔ̃ gu kato ndɛ̃. Ne i Ɣaa kuɖikute ame ne ɔkɔ me ɔkɛlɛgu i Yerusalem, i kame kasarɛkɔ̃ katikpe kayogodɔ̃ kabɔrɛnya, ngbegɔ i irapɔa nɛ nsɛ itara sirerɛ ibɔ ɔya. 4 Israel Ɣaa ikpawaĩ ɔwe i wũ anɔ ame i mmɔ, lɛ i kaɖikate ga loɔnya i katɛfɛkɔ̃ awe.

5 Kere ne ɔɣere me sɔ, "Ɔturi awune ɔbi, nyɔ katikpe isɛ." Ne ɔso lonyɔ, ne i kabɔrɛnya ga i isɔrɛkasege kayogodɔ̃ katikpe ne lonya sirerɛ irapɔa.

6 Ne ɔɣere me sɔ, "Ɔturi awune ɔbi, ato anya nnɛ mato mabara - anyanyara wa i Israel kaɖe to mabara i ngbe, ara wa loarera me kama dzoroo i wũ isɔrɛyo kɔrɛ? Ɣɛɛ ato aanya ara wa lonyanyarĩ kɔraa aɖo."

7 Ne ka ɔkɔ me ɔbɔ kasarɛkɔ̃ kabɔrɛnya. Lonyɔ ne lonya iyoi i ibere ame. 8 Ɔɣere me sɔ, "Ɔturi awune ɔbi, kiniɔ ne ɖi iwo i ibere ame." Ne ɔso loɖi iwo i ibere ame ne lonya kabɔrɛnya i mmɔ.

9 Ne ɔɣere me sɔ, "Bo i kame si asɛ aanyɔ ɔtile gu anyanyara wa mato mabara i ngbe." 10 Ne ɔso lokɛlɛ kame ne lonyɔ, ne lonya sɔ mapɔ ara agbãagbã wa nto akpɛ̃ i karɔ̃ gu anyanya mabɔi gu Israel kaɖe arapɔa ɔɖuɖu i abere iso. 11 Ara wagbe katɔ̃ ne Israel kaɖe makpakpa sikɔdzɛ ɔya, ne Safan ɔbibirɛrɛĩ Yaazania ɔya i ma ndɛ̃. Ma ɔbiara ɔla kuakɔrɔ̃kɔrɔã iwɛwɛrɛ̃bui i kɔrɔ̃, ne kuakɔrɔ̃kɔrɔã kuyɔ to kuta kukɛlɛ kato.

12 Ɔɣere me sɔ,"Ɔturi awune ɔbi, ɔɔnya nnɛ i Israel kaɖe makpakpa ɔbiara to ɔbara i ɔ̃ mɔmɔ irapɔa katɔ̃ i idududu ame? Masɛ maɣɛ sɔ, ' Bosate iisɛ ɔnya bo, Bosate ɔɔsɛ̃ karɔ̃.' " 13 Ana ne, ɔɣɛ sɔ, "Ato aanya ma mato mabara ara wa lonyanyarĩ kɔraa aɖo."

14 Kere ne ɔkɔ me ɔkɛlɛgu Bosate iyo katikpe kayogodɔ̃ kabɔrɛnya, ne lonya marɔ̃go si i mmɔ, mato mabiɛ Tamuz.*8.14 Tamuz: Ma Babilonse kuɣɔ gɔ losɛ kutã marɔ̃go ɔɣe mabi. 15 Ɔɣere me sɔ, "Ɔturi awune ɔbi, ato anya nnɛgbe? Ato aanya ara wa lonyanyarĩ kɔraa aɖo nnɛgbe."

16 Kere ne ka ɔkɔ me ɔbogu i Bosate isɔrɛyo kame kasarɛkɔ̃. Marɛrɛ̃ lɛ sinyɔ-iru ɔwe i pato gu isɔrɛkasege ndɛ̃ i isɔrɛyo kabɔrɛnya i mmɔ. Mapɛ ma kama masɔ̃ Bosate isɔrɛyo ne ma ntɔ̃ to minyɔ kuɣɛ̃kabɔrɛkɔ̃, mato mabɔ ati karɔ̃ matã kuɣɛ̃ i kuɣɛ̃kabɔrɛkɔ̃ isɛ.

17 Ɔɣere me sɔ, "Ɔɔnya nnɛgbe, ɔturi awune ɔbi? Ira koso iɖe sɔ Yuda iyo to mabara anyanyara wa mato mabara i ngbe? Ikote sɔ maala maɔbara amumuɣɔ i karɔ̃ ɔɖuɖu iso, makɛlɛ i katɔ̃ mapia me sikpã? Nyɔ kumɛgɔ mato matia me nyanyarĩ mapia me sikpã! 18 Ne ɔso loto loabara ma ku sikpã. Loibanyɔ ma nnya ɣee lonyua lotsɛ ma. Atoasɔ mato kulu ta i wũ atsue ame kɔraa ne loibakã ma atsue."