1 Bosate Wɔ Nsiguso sɔ, "Ɔturi awune ɔbi, ɖikanya i Gog iso si aɣɛ sɔ: Gog lotsiri-ɔ lo, fɔ wɔ nɖe ɔɖeisoi pelepele i Mesek gu Tubal. 2 Loto loapɛ-ɔ lofirikira fiɛ loakpadzɛ̃-ɔ lokɛlɛgu. Loto loakɔ-ɔ lobɔrɛgu i katikpe dzoroo fiɛ nto loasese-ɔ ata aya i Israel abe iso. 3 Iyɔ nto lowuĩ fɔ kuta loɖi i fɔ kubena kɔrɔ̃ ame fiɛ loatã fɔ mirɛ̃ i fɔ kuɖearɔ̃ ame ɔkpase. 4 Ato aarɔ̃ i Israel abe iso, mi gu fɔ makpakpɛ̃dze gu nɖebi ɔɖuɖu mɛ mpiagu-ɔ. Loto loasu-ɔ lotã kurodzai agbãagbã ɔɖuɖu gɔ lokɛkɛ ara gu lotã kuputubɔi lɛ araɖea. 5 Mito miarɔ̃ mirɛ i karɔ̃ kpawee iso alasɔ loɔɖeika, Bosate Wɔ Nsiguso loɣɛ. 6 Nto loasese ɔtɔ i Magog gu i mma nsi i kaɣɔ ame i sipokpokpo. Ne mato maatsue sɔ Mme nɖe Bosate.

7 " 'Loto loatã matsue wũ iyere sekelea i wũ maturi Israel ndɛ̃. Loisibatã mapukutura wũ iyere sekelea. Ne nɖebi to maatsue sɔ Mme Bosate Mme nɖe Ɔsekelea i Israel ne. 8 Ito iba! Gbaã ne ito iaba i ne ame, Bosate Wɔ Nsiguso loɣɛ. Nnɛgbe nɖe iyi nɛ iso loɔɖeika losegu ne.

9 " 'Iyɔ mma nsi i Israel simagɛ̃ ame to maabɔrɛ fiɛ maasu ma akpakpɛ̃ra mapia i ɔtɔ matsuedza - akpirafɔra kosoi gu asiare, kuta gu mirɛ̃, kakpã akpo gu afele. Mato maasu wã mapia ala ɔtɔ itã akɔ akɔdzɛ. 10 Iisibanya sɔ maabie ndɔrɛ̃ mabɔrɛgu i karɔ̃ iso ɣee matu ndɔrɛ̃ mabɔrɛgu i apo ame, alasɔ mato maasu akpakpɛ̃ra lɛ nnɛ maapia i ɔtɔ. Ne mato maamɔɛ̃ kakpãramɔɛã mabɔrɛgu i mma lomɔɛ̃ ma are mafegu, ne mato maayu mma loyu ma mafegu, Bosate Wɔ Nsiguso loɣɛ.

11 " 'Iyi nɛmɔ iso ne, nto lotã kakɔi mabiara Gog i Israel, marisɛi kagbolomi ame i ɔpo kuɣɛ̃kabɔrɛkɔ̃ isɛ. Ito iatɛ̃ marisɛi ɔri, alasɔ mato maabiara Gog gu ɔ̃ maturi kposu ɔɖuɖu i mmɔ. Ne ɔso mato maakpere mmɔ sɔ Xamon Gog Kagbolomi.

12 "Israel kaɖe to maala maɔbiara ma itã awa akɔdzɛ si maasekelera karɔ̃. 13 Maturi ɔɖuɖu ma i karɔ̃ iso to maabiara ma, ne iyi nɛ loaɖi wũ ikpawaĩ lote ne, ito iaɖe iyi nɛ maibaɣara itã ma, Bosate Wɔ Nsiguso loɣɛ.

14 " 'Mato matã maturi karabara ɔwi ku ɔwi sɔ masekelera karɔ̃. Mawɛ̃ to maaki i karɔ̃ ame, isu ibua i ma iso ne, mawɛ̃ to maabiara makpise ma lokuti i karɔ̃. Awa akɔdzɛ kawirikɔ̃ ne mato masɛ makpise inyɔnyɔ karɔ̃ ana. 15 Kumɛgɔ ame masɛ mato makiki i karɔ̃ iso fiɛ ɔturi ɔrere ɔnya ɔturi ikui ne, ɔto ɔ̃aɣedza ikparĩ i ne kuruɛ gbɔgbɔɔgbɔ makurise aaba maasu ne mabiara i Xamon Gog Kagbolomi ame. 16 (Ana ne ɔmagɛ̃ wɔ marɔ sɔ Xamona ana pia i mmɔ.) Ne ɔso mato maasekelera karɔ̃.'

17 "Ɔturi awune ɔbi, Bosate Wɔ Nsiguso sɔ: Kpere karodzai igbã biara gu kuputubɔi ɔɖuɖu: 'Mibɔrɛ i ngɔi pelepele miba miasakanya si misɔrɛ ara wa nto loledza losɛ mi, isɔrɛ siare i Israel abe iso. Mmɔ mito miawe sina fiɛ mianɛ ima. 18 Mito miawe makpãrɛrɛĩ sina fiɛ mianɛ karɔ̃ iso maɖeisoi ima lɛ akpalasa gu sɛrɛrerɔ̃ abi, kutepuĩ gu manantsuĩrɛrɛ̃ maɖe awe - ma ɔɖuɖu ɖe Basan mabɔi ma mbaso ku iɖa. 19 I isɔrɛ nɛ nto lobara lotã mi ame ne, mito miaɖe iɖa gbɔgbɔɔgbɔ ifã mi fiɛ mito mianɛ ima gbɔgbɔɔgbɔ miarɛ̃ lɛ ndã. 20 I wũ ɔpɔrɔ̃ katukɔ̃ ne mito miaɖe ara i apɔngɔ gu wã masɛdze, makpãrɛrɛĩ gu makpakpɛ̃dze igbã biara iso mimi,' Bosate Wɔ Nsiguso loɣɛ.

21 "Nto loaɖi wũ ikpawaĩ lote i nɖebi ndɛ̃, iyɔ nɖebi ɔɖuɖu to maanya kutsueikpadzɛ̃ gu kɔrɔ̃ gɔ loasia i ma iso. 22 Ita i iyi nɛmɔ ito ikɛlɛ ne Israel kaɖe to kaatsue sɔ Mme nɖe Bosate ma Ɣaa. 23 Ana ne nɖebi to maatsue sɔ Israel maturi ɔkɛlɛ kafɔrɔ̃ ame ala ma ikpi iti, alasɔ maiɖe ɔnukuare matã me. Ne ɔso lokɔla wũ anɔmi i ma kɔrɛ, ne losu ma lopia i ma matsirise nrɔɔ̃ ame. Ne Israel maturi ɔɖuɖu ɔrɔ̃ i ipɛmi kanya. 24 Lobara ma i ma akpi gu idaasekele kanya ne lokɔla wũ anɔmi i ma kɔrɛ.

25 "Ne ɔso Bosate Wɔ Nsiguso sɔ: Kiniɔ ne ka loaɖi Yakob lobɔrɛgu i kafɔrɔ̃ ame. Lokpesera wũ lobɔ fiɛ loanyɔ Israel kaɖe ɔɖuɖu nnya. Loto loakpɛ̃ sirerɛ lotã wũ iyere sekelea. 26 Israel maturi to maaɣara ma kunuarɛ gu ma ɔnukuare idaaɖe ɔɖuɖu, nwa mabara i wũ iso, si makpese masi i karɔ̃ iso i kaɣɔ ame fiɛ kuwɛ̃ iisibapia ma ifɔ̃. 27 Ɔwi wɔ loɔɖi ma lobɔrɛgu i nɖebi ame fiɛ loɔsa ma kanya lobɔrɛgu i ma matsirise nrɔ̃ ame, lokpesera ma lobɔ ne, nto loaɖi so lote sɔ nse sekelee iki i ma iso i nɖebi gbodzoo anɔmi ame. 28 Iyɔ mato maatsue sɔ Mme nɖe Bosate ma Ɣaa, alasɔ atoasɔ losese ma i kafɔrɔ̃ ame i nɖebi ndɛ̃ ne, nto loasa ma kanya lobɔ i ma mɔmɔ karɔ̃ iso, loibakuti kuwɛ̃ losɛ i kama. 29 Loisibakɔla wũ anɔ i ma iso, alasɔ nto loafere wũ Siwarã i Israel kaɖe iso Bosate Wɔ Nsiguso nto ɔɣɛ."