EZEKIEL 12

Kanyaɖidze Ɔse Lɛ Ɔfɔrɔĩ

1 Bosate itɔ̃me ɔba me sɔ, 2 "Ɔturi awune ɔbi, maturi ma mba atsuele ndɛ̃ asi. Maba anɔmi maanya ara ɣɛɛ maisɛ manya fiɛ maba atsue maanɔ ara ɣɛɛ maisɛ manɔ, alasɔ maɖe atsuele maturi.

3 "Ne ɔso ɔturi awune ɔbi, sira fɔ ara kanya itã kafɔrɔ̃ ame ikɛlɛ. Gɔ i maturi to manyɔ ku anɔwã ne, ɣo ɔri bɔrɛ i ngbegɔ asi si akɛlɛ kakɔi mama. Siainyɔ maturi to maanɔkarɔ̃, atoasɔ matsuelese kaɖe maɖe. 4 I ikpɛnɛ ame ne, gɔ mato manyɔ ne, ɖi fɔ ara wa ɔɔsirakanya itã kafɔrɔ̃ ame ikɛlɛ, bɔ i inyamɔ. Iyɔ kutsuɛ ne, gɔ mato manyɔ ne, ɣo ɔri kɛlɛ lɛ mma nsɛ makɛlɛ kafɔrɔ̃ iso. 5 Gɔ ame mato manyɔ ne, ɖi iyoi kigu i ibere ame, si aɖi fɔ ara abɔrɛgu i iyoi ame. 6 Su wã sia i fɔ imɔiti gɔ mato manyɔ si asore wã abɔrɛgu ku kumɛgɔ ito ibara fulufulu. Fu fɔ katɔ̃ ara si aibanya karɔ̃, alasɔ loɔsu-ɔ lobara ikparĩ lotã Israel kaɖe."

7 Ne ɔso lobara lɛ kumɛgɔ maɖisilɔ matã me. Ikpɛnɛ ame loɖi wũ ara wa losakanya lotã kafɔrɔ̃ ame ikɛlɛ lobɔ i inyamɔ. Iyɔ kutsuɛ ne loɖi iyoi i ibere ame ku wũ nrɔɔ̃. Losu wũ ara losia i wũ amɔiti iso lobɔrɛgu si kato ibara fulufulu, gɔ maturi to manyɔ.

8 Bosate itɔ̃me ɔba me ku kaya sɔ, 9 "Ɔturi awune ɔbi, atsuele Israel kaɖe iikarɛ-ɔ sɔ, 'Be ato abara ɣɛɛ?'

10 "Ɣere ma sɔ, ' Bosate Wɔ Nsiguso sɔ: Itɔ̃me nɛgbe ɔpɛgu Yerusalem tɔ̃ɖedze gu Israel iyo ɔɖuɖu ma mpia i mmɔ.' 11 Ɣere ma sɔ, 'Loɖe ikparĩ lotã mi.'

"Lɛ kumɛgɔ loɔbara ne, kumɛɔ mato maabara ma ne. Mato maakɛlɛ kafɔrɔ̃ iso lɛ mayorɛdze.

12 "Tɔ̃ɖedze wɔ mpia i ma ndɛ̃ to ɔ̃asu ɔ̃ ara ɔsia i imɔiti, ɔrui si kaɖe kato kabara fulufulu. Ne mato maaɖi iyoi i ibere ame matã wũ ɔki i kame. Ɔto ɔ̃afu ɔ̃ katɔ̃ ara si ɔ̃ibanya karɔ̃. 13 Loto loawarɛ wũ asabu losɛ wũ, ne wũ iyebi to iamɔɛ̃ wũ. Loakɔ wũ lobɔ i Babilonia, ma Kaldease karɔ̃ iso, ɣɛɛ ɔ̃ibanya kã, ne ɔto ɔ̃akpi i mmɔ. 14 Loto loasamera mma ɔɖuɖu loki malɔ wũ lopia i kakɔi biara - ɔ̃ marabaradze gu ɔ̃ makpakpɛ̃dze ɔɖuɖu - loatere losiai ma ku ipɛmi.

15 "Si loɔfuĩdza ma lopia i nɖebi ndɛ̃ fiɛ losamera ma lopia i nrɔ̃ ame ne, mato maatsue sɔ Mme nɖe Bosate. 16 Ɣɛɛ nto loanyɔ maturi kɛkɛĩ nnya loɖi ma i ipɛmi kanya, kukãsiare gu inyɛpɛ̃ ame, si maafɔ nrɔ̃ mɛ ame maakɛlɛ anyanya kubarara mapia i kame. Iyɔ mato maatsue sɔ Mme nɖe Bosate."

Itiikpakpa Kanyaɖidze Ikparĩ

17 Bosate itɔ̃me ɔba me sɔ, 18 "Ɔturi awune ɔbi, tikpakpa gɔ ato aɖe fɔ aɖera, si ayasoiso ku ifɔ̃ gɔ ato anɛ ndu.

19 Ɣere maturi ma i karɔ̃ iso sɔ, ' Bosate Wɔ Nsiguso to ɔɣɛ i mma nsi i Yerusalem gu mma i Israel karɔ̃ ame sɔ: Mato maayasoiso maaɖe ma aɖera fiɛ maanɛ ndu ku ɔriiyu, alasɔ irabiara to iaro i ma karɔ̃ ame ala mma ɔɖuɖu nsi i mmɔ ɔtile ɔso. 20 Mato maawɔra simagɛ̃ dzɛ ame i maturi ɔsɛ, ne karɔ̃ to kaakpese ikpakpi. Iyɔ mito miatsue sɔ Mme nɖe Bosate ne.' "

21 Bosate itɔ̃me ɔba me sɔ, 22 "Ɔturi awune ɔbi, be ɔso maturi sɛ mapɛ igbã nɛgbe i Israel karɔ̃ iso sɔ, 'Ɔwi sɛ ɔfe ne kaɖikate biara iisɛ kabɔ kuira'? 23 Ɣere ma sɔ, ' Bosate Wɔ Nsiguso sɔ: Nto loabɔ igbã nɛgbe i kawirikɔ̃, iyɔ maisibapɛ ne i Israel karɔ̃ iso.' Ɣere ma sɔ, 'Ɔwi ɔɔbore ɔbo gɔ i kaɖikate biara to kaaba i kame. 24 Ala ne mila kuɖikute iisibawe ɣee kanyamɛrɛ̃ sibɔipɛ iisibawe i Israel maturi ndɛ̃. 25 Ɣɛɛ Mme Bosate nto loaɣɛ nnɛ loaɣɛ, ne ito iaba i kame gɔ iibadzroo. Ala i mi atsuele iyo ɔwi ame ne, loatã ibiara nɛ loɣɛ ɔba i kame, Bosate Wɔ Nsiguso nto ɔɣɛ.' "

26 Bosate itɔ̃me ɔba me sɔ, 27 "Ɔturi awune ɔbi, Israel kaɖe sɛ maɣɛ sɔ, 'I Kaɖikate ga ɔsɛ ɔnya ne, kase katã akɔ gbodzoo ita i kiniɔ, ne ɔsɛ ɔɖikanya ɔsegu i kɔrãkaɖe ame dzoroo iso.'

28 "Ne ɔso ɣere ma sɔ, 'Bosate Wɔ Nsiguso sɔ: Wũ itɔ̃me kuiwɛ̃ iisibasɛ kama ana. Itɔ̃me irere nɛ loɣɛ to iaba i kame, Bosate Wɔ Nsiguso nto ɔɣɛ.' "