EZEKIEL 44

Kuɣɛ̃kabɔrɛkɔ̃ Kayogodɔ̃ Iso Karabara

1 Kere ne ɔrɛrɛ̃ ɔkɔ me ɔbɔ kama i isɔrɛyo kuaruɛ kayogodɔ̃, nga nto kanyɔ kuɣɛ̃kabɔrɛkɔ̃ ɣɛɛ masɛ̃ kã. 2 Bosate ɔɣere me sɔ, "Ikote sɔ kayogodɔ̃ gagbe ne maasɛ̃ kã masɛ. Iikote sɔ maabusi kã fiɛ kuwɛ̃ iibaaki i kã ame ɔbo i kame. Ikote sɔ maasɛ̃ kã alasɔ Bosate Israel Ɣaa ɔɔki i kã ame ɔbo. 3 Israel ɔɖeisoi mɔmɔ nɖe ɔturi wɔ pɛ loasɛ i kakikɔ̃ ɔɖe ara i Bosate anɔ. Ɔ̃aki i pato kakikɔ̃ ame ɔbo i kame fiɛ mmɔ ame ɔ̃aki ɔbɔrɛ ne."

Mmara Mɛ Iso Maafɔ Ɔturi Ɔbo i Isɔrɛyo Ame

4 Kere ne ɔrɛrɛ̃ ɔkɔ me ɔkigu kayogodɔ̃ ga i katikpe ame ɔbɔ i isɔrɛyo katɔ̃. Lonyɔ ne lonya Bosate ikpawaĩ to iyi i Bosate isɔrɛyo ame, ne lokɔlɛ anɔ lofu i karɔ̃ ne.

5 Bosate ɔɣere me sɔ, "Ɔturi awune ɔbi, nyɔ totoroo, si akã irabiara nɛ loaɣere-ɔ ise i asɛra ɔɖuɖu i Bosate isɔrɛyo iso atsue kukaakɔ. Si anyɔ asɛra i isɔrɛyo kubokɔ̃ gu ne kabɔrɛnya ɔɖuɖu iso kukaakɔ. 6 Ɣere ɔtusele Israel kaɖe sɔ, 'Nnɛgbe i Bosate Wɔ Nsiguso to ɔɣɛ ne: O Israel kaɖe ka ilɛ ku mi anyanya kubarara! 7 Isu ibua i mi anyanya kubarara mama ɔɖuɖu iso ne, miɔkɔ mafɔ ma loitu sirɛrɛ̃ fiɛ masɛ̃ ifiriki mibogu i wũ isɔrɛyo ame - maturi ma nna ɔtu matã Ɣaa. I ɔri wɔgbe iso ne mipia wũ isɔrɛyo ɔgu atoa gɔ mito misɔrɛ aɖera, iɖa gu asɔrɛ ima mitã me, ne mitu wũ ndamu. 8 Gɔ tee miabara karabara ise i wũ ara sekelea iso ne, i ne kanya misu wũ isɔrɛyo mipia i maturi mama nrɔɔ̃ ame. 9 Nnɛgbe i Bosate Wɔ Nsiguso sɔ: Ɔfɔ kuwɛ̃ wɔ loiwarɛ ara fiɛ ɔ̃itu sirɛrɛ̃ na ɔri ɔbo i wũ isɔrɛyo ame, nane mafɔ ma nsi i Israel mabi ndɛ̃ kɔraa na ɔri mabo i mmɔ.

Maɖi Ma Levise i Sisɔrɛdzeiɖe Ame

10 Bosate Wɔ Nsiguso sɔ, " 'Ma Levise ma lore me kama dzoroo ku ɔwi wɔ i Israel ɔyu ɔri fiɛ manyua me masɛ, masiai ma arapɔa ne, ikote sɔ ma Levise mamɔ aafɔ ma ikpi kuso. 11 Maawo ɔsumu i wũ isɔrɛyo ame, manyɔ isɔrɛyo kuyogodɔ̃ iso fiɛ maasumu i ne ame. Maawo mabɔi ma mabɔ itã araifɛ̃ asɔrɛ gu asɔrɛ ɔɖue fiɛ maaya i maturi anɔ masumu ma. 12 Bosate Wɔ Nsiguso sɔ ala masumu arapɔa i maturi anɔ fiɛ matã Israel kaɖe ɔbo i ikpi ame, ne ɔso loɔkã ku kɔrɔ̃ i kato sɔ ikote sɔ maafɔ ma akpi kuso. 13 Iikote sɔ maabore maba sɔ maasumu me lɛ masɔrɛdze ɣee maibabore mabo wũ ara sekelea ɣee wũ asɔrɛ wa losekele aɖo kɔrɛ. Ikote sɔ maawe i ma anyanya kubarara kunuarɛ ame. 14 Ɣɛɛ losɛra ma i isɔrɛyo karabara gu karabara ɔɖuɖu ga maabara i ne ame kanya.

Masɔrɛdze

15 " 'Ɣɛɛ masɔrɛdze ne, mma nɖe ma Levise mabɔrɛ i Zadok ɔkparɛ ame fiɛ mabara wũ isɔrɛyo karabara ku ɔnukuare, ku ɔwi wɔ i Israel mabi ɔyu wũ ɔri ne, maabore maba maasumu i wũ anɔ. Maaya i wũ anɔ masɔrɛ iɖa gu ima matã me, Bosate Wɔ Nsiguso loɣɛ. 16 Ma ɔnɔwɛ̃ loabo i wũ kasekelekɔ̃ ame, ma ɔnɔwɛ̃ loabore maba i wũ ɔpɔrɔ̃ kɔrɛ masumu i wũ anɔ mabara wũ karabara.

17 " 'Si mabo kame kasarɛkɔ̃ kuyogodɔ̃ ame ne, ikote sɔ maapia ɔkati ɖɔbɔrɔa arapia. Maaibapia arapia wa masu bɔi siwɛrɛ̃ mabara ala kuawɛ̃ gɔ mato masumu i kame kasarɛkɔ̃ kuyogodɔ̃ ɣee i isɔrɛyo ame. 18 Ikote sɔ maatɔme ɔkati ɖɔbɔrɔa itinyira i ati iso gu wã karɔ̃ arapia i ma sisɔ ame. Iikote sɔ maapia irere nɛ loatã makpɛ̃ awururu. 19 Si mabɔrɛ makɛlɛ kuaruɛ kasarɛkɔ̃ ngbegɔ i maturi pia ne, ikote sɔ maaɖi arapia wa mapia gɔ mato masumu masɛ i kuyoi sekelea ame. Maapia arapia mama si maibasekelera maturi iki i ma arapia sekelea iti.

20 " 'Iikote sɔ maakparɛ̃ ati ɣee maibatã ma siwɛrɛ̃ ɔkarã tagbaraa, ɣɛɛ ikote sɔ maasisi ma ati siwɛrɛ̃. 21 Sɔrɛdze kuwɛ̃ daanɛ wain si ɔsɛ ɔbo i kame kasarɛkɔ̃. 22 Masɔrɛdze iibayiri kpisere ɣee marɔ̃go ma masɛ̃. Maawo marɔ̃go kugbɔɔ ma siɖu lobɔrɛ i Israel kere ɔyiri ɣee masɔrɛdze makpisere. 23 Masɔrɛdze ilɛ sɔ maate wũ maturi ara masegu isekele gu nnɛ mpia kere fiɛ maate ma kumɛgɔ mapia ikpaki i isekele gu idaasekele ndɛ̃.

24 " 'I kulu kurere gɔ loaba ne, masɔrɛdze si mabara karabara lɛ matɔ̃meɣɛdze si masia ne ita i wũ asɛra kanya. Maamɔɛ̃ wũ mmara gu wũ asɛ̃ra mala itã wũ ayiɖea ɔɖuɖu wa masɛ fiɛ maamɔɛ̃ wũ Awarãyi sekelea ana mala.

25 " 'Sɔrɛdze ne iikote sɔ ɔ̃apukutura so iki gɔ ɔ̃abore ɔbo ɔturi wɔ lokpi. Ɣɛɛ si nwɔ lokpi ɖe ɔ̃ ɔse ɣee ɔ̃ ɔnyi ɣee ɔ̃ ɔbibirɛrɛĩ ɣee ɔbibirɔ̃gomi, ɔnyibirɛrɛĩ ɣee ɔnyiiko wɔ loiyiri kurã ne, iyɔ ne sɔrɛdze aawo ɔpukutura so. 26 Si ɔ̃ɔsekelera so ɔro kama ne, ikote sɔ ɔto ɔ̃atuĩ ɔwe ayi akɔdzɛ. 27 Iyi nɛ iso ɔ̃abo i isɔrɛyo kame kasarɛkɔ̃ si ɔsumu i mmɔ ne, ikote sɔ ɔ̃asɔrɛ ikpi isɔrɛ ɔtã so, Bosate Wɔ Nsiguso loɣɛ.

28 " 'Mme, wũ ɔnɔwɛ̃saã loaɖe kaɖekɔ̃ ga i masɔrɛdze ba. Miibatã ma kaɖekɔ̃ kukawɛ̃ i Israel. Mme loaɖe ma ire. 29 Mato maaɖe geɖebu asɔrɛ, ikpi asɔrɛ gu iɣɛrɛkuso asɔrɛ gu irabiara nɛ i Israel sɛ matã Bosate ku kuɖuɛ ne, ito iaɖe masɔrɛdze ire. 30 Aɖedziribi ɖeakatɔ̃ wa nlɛ aɖo gu mi karatã igbaɔ to aaɖe masɔrɛdze ɔkpɛ. Miatã ma mi araɖea ɖeakatɔ̃ wa mikɔtɛ si kusɛkusɛ aasia i mi ayomaturi iso. 31 Iikote sɔ masɔrɛdze aaɖe irere, nnɛ lokpi, rodza ɣee bɔi ɣee nwa i kaputubɔi ɔkɛkɛ kasɛ kuiwɛ̃.