EZEKIEL 14

Ɣaa Ɔtã Maɣɔsɔrɛdze Ipɔ

1 Israel makpakpa mawɛ̃ ɔba i wũ kɔrɛ ne makpase masɛ i wũ katɔ̃. 2 Kere ne Bosate itɔ̃me ɔba me sɔ, 3 "Ɔturi awune ɔbi, marɛrɛ̃ magbe ɔɔsu ma situ matã arapɔa ne masu ɔtile ira nɛ iso masɛ matura masɛ so i katɔ̃. Ilɛ sɔ loatã makarɛ me ira kɔraa ɣɛɛ? 4 Ne ɔso ɖe ma ika si aɣere ma sɔ, 'Bosate Wɔ Nsiguso sɔ: Si Israelse ɔrere ɔsu ɔ̃ ɔtu ɔtã arapɔa ne ɔsu ɔtile ira nɛ iso masɛ matura ɔsɛ so i katɔ̃ fiɛ ɔsɛ Ɣaa kanyaɖidze kɔrɛ ne, Mme Bosate wũ mɔmɔ loatã wũ mmuai mɛ i ɔ̃ arapɔa isiai siare ɔkote atã. 5 Loto loabara nnɛgbe si loledza Israel maturi ma ɔɖuɖu loɔsɛ̃ me, ala ma arapɔa ɔso, situ ifɔ.'

6 "Ne ɔso ɣere Israel kaɖe sɔ, 'Bosate Wɔ Nsiguso sɔ: Mifiriki! Mibɔrɛ i mi arapɔa isɔrɛ ame si misɛ̃ mi kubarara nyanyariã ɔɖuɖu!

7 " 'Si Israel mabi ɣee ɔfɔ ɔrere wɔ nsi i Israel ɔɖi so ise i wũ kɔrɛ ne ɔsu ɔ̃ ɔtu ɔtã arapɔa fiɛ ɔsu ɔtile ira nɛ iso masɛ matura ɔsɛ so i anɔ, ne ɔsɛ Ɣaa kanyaɖidze kɔrɛ si ɔkarɛ me ira ne, Mme Bosate wũ mɔmɔ loatã wũ mmuai. 8 Loto loaɖi wũ anɔ lokarã ɔrɛrɛ̃ wɔmɔ iso fiɛ nto loasu wũ lobara itera ɣee sima itɔ̃me. Nto loaɖi wũ i wũ maturi ame. Iyɔ mito miatsue sɔ Mme nɖe Bosate.

9 " 'Si masɔsɔla kanyaɖidze sɔ ɔɖikanya ne, Mme, Bosate loɔtã kanyaɖidze wɔmɔ sɔ ɔlasila. Ɣɛɛ nto loaɖi wũ kɔrɔ̃ lota loya ɔ̃ iso lowɔra wũ loɖi i wũ maturi Israel ndɛ̃. 10 Mato maasore ma akpi - kanyaɖidze gu ɔrɛrɛ̃ wɔ losɛ ɔ̃ kɔrɛ pelepele ɔɣɛrɛ. 11 Iyɔ Israel maturi iisibasɛnɛkɛ̃ i wũ ɔri iso ɣee maisibapukutura so ku ma akpi ɔɖuɖu mabua. Mato maaɖe wũ maturi fiɛ Mme wũ loaɖe ma Ɣaa. Bosate Wɔ Nsiguso nto ɔɣɛ.' "

Kutsueikpadzɛ̃ Gɔ Kanya Itere Na

12 Bosate itɔ̃me ɔba me sɔ, 13 "Ɔturi awune ɔbi, si kaɖe ɔbara me ikpi iki i ɔnukuare idaaɖe ame ne, loaɖi kɔrɔ̃ losia i kã iso fiɛ loatɛ̃ araɖea ina ɔri fiɛ loasese kukãsiare i kã iso si loɖue maturi gu ma mabɔi. 14 Atoa si marɛrɛ̃ itɛ magbe - Noa, Daniel gu Yob - pia i kame kɔraa ne, ma mɔmɔ kere loaɖi so ala ma sibɔlɔlɔ iti, Bosate Wɔ Nsiguso nto ɔɣɛ.

15 "Ɣee si losese kuputubɔi i karɔ̃ gamɔ ame fiɛ mawɔra maturi maɖi i karɔ̃ gamɔ ame fiɛ kakpese ikpakpi sɔ kuwɛ̃ iisɛ ɔwo i mmɔ ɔki ala mabɔi nyanyariã ɔso ne, 16 Bosate Wɔ Nsiguso ɔkã sɔ, ayi kumɛgɔ lopia ngbã ne, si marɛrɛ̃ itɛ magbe pia i kame kɔraa ne maibawo ma mɔmɔ mabibirɛrɛĩ gu mabibirɔ̃gomi ɔɖi. Ma itɛ mɔmɔ kere loana iɖi, ɣɛɛ karɔ̃ aakpese ikpakpi.

17 "Ɣee si lokpadzɛ̃ ipɛmi lobɔ i karɔ̃ gamɔ iso fiɛ loɣɛ sɔ, 'Ipɛmi si iki i karɔ̃ ɔɖuɖu ame,' ne loɖue kã maturi gu mabɔi, 18 Bosate Wɔ Nsiguso nto ɔɣɛ sɔ ayi kumɛgɔ lopia ngbã ne, atoa si marɛrɛ̃ itɛ magbe pia i kame kɔraa ne, maibawo ma mɔmɔ mabibirɛrɛĩ gu mabibirɔ̃gomi ɔɖi. Ma ɔnɔwɛ̃ kere loana iɖi.

19 "Ɣee si losese kukpakpi i karɔ̃ iso ne loɖi wũ sikpã teterea iki imaiferekarɔ̃, ne loɖue kã maturi gu mabɔi ne, 20 Bosate Wɔ Nsiguso nto ɔɣɛ sɔ ayi kumɛgɔ lopia ngbã ne, atoa si Noa, Daniel gu Yob mɛrɛ̃ pia i kame kɔraa ne, maibawo ɔɖi ɔbibirɛrɛĩ ɣee ɔbibirɔ̃gomi ngbã. Ma mɔmɔ kere maawo ɔɖi iki i ma sibɔlɔlɔ iti.

21 "Ala nnɛgbe i Bosate Wɔ Nsiguso to ɔɣɛ sɔ: Ito ianyanyarĩ si losese wũ kutsueikpadzɛ̃ nyanyariã wã ana sɔ aɖue Yerusalem maturi gu ma mabɔi - wa nɖe kakpã, kukãsiare gu mabɔi nyanyariã gu inyɛpɛ̃! 22 Ɣɛɛ ne mawɛ̃ to maana ngbã - mabirɛrɛĩ gu mabirɔ̃gomi ma maakɔ maɖi i mmɔ. Mato maaba i fɔ kɔrɛ, ne si anya ma nsɛgbai gu arabarara ne, so to siaɣɔ i nnɛ ɔso lotã kukpakpi ɔba i Yerusalem iso - kukpakpi biara gɔ lobɔ i ɔ̃ iso. 23 So to siaɣɔ-ɔ sɔ loibara kuira siefe si anya ma nsɛgbai gu ma abarara, Bosate Wɔ Nsiguso loɣɛ."