1 Bosate itɔ̃me ɔba me sɔ, 2 "Ɔturi awune ɔbi, tu adzolo si aɖe Israel kaɖe inatika. 3 Ɣere ma sɔ, ' Bosate Wɔ Nsiguso sɔ: Finikpo siare ku abue ɔle, sirã tagbaraa ku kukua agbãagbã ɔba i Lebanon. Ɔsɛ ɔ̃ɔsɛ fiɛ ɔfɔ sedar kudziri kuwɛ̃ kato. 4 Ne ɔfɛ̃ kɔ̃ kato pelepele ɔlɔmia ne ɔsore wũ ɔkɛlɛgu kuɣamaɖese karɔ̃ iso. Ɔpia ɔlɔmia i kuɣamaɖese ɔmagɛ̃siare ame i mmɔ.

5 " 'Ana ne ɔsu fɔ karɔ̃ ɔɖui ɔwɛ̃ ne ɔpia wũ i karɔ̃ ga mba iɖa ame. Ne ɔpɛ wũ lɛ kudziri gɔ nsɛ kuya i ɔwore kɔrɛ i ngbegɔ i ndu gbodzoo pia. 6 Ne ɔɖui ɔre ne ɔkpese iwɛĩ nɛ loɣa ifere i karɔ̃. Ne ɔ̃ silɔmia ɔfiriki siba i finikpo kɔrɛ, ɣɛɛ ɔ̃ siɖu ɔwe i ɔ̃ kayirinɔ. Ne ɔso ikpese iwɛĩ ne iɖi akpai ku ayata gbodzoo.

7 " 'Ɣɛɛ finikpo siare mama ku abue ku ɔle gu sirã tikpirii ɔwɛ̃ ɔwe. Kiniɔ ne iwɛĩ ɔɖi siɖu isese i ɔ̃ kɔrɛ isɛ ibɔrɛgu i ngbegɔ mapia ne. Iɖi akpai ikɛlɛgu ne kɔrɛ si ina ndu. 8 Maɔpia ne i karɔ̃ sɛɛ ame i ndu gbodzoo kɔrɛ si iawo akpai ɔɖi, iɣɔ̃ abi, ikpese iwɛĩ nɛ nto ilɛnyɔ.'

9 "Ɣere ma sɔ, nnɛgbe i Bosate Wɔ Nsiguso to ɔɣɛ sɔ: 'Ito iana ngbã? Maito maarui ne mabɛ ne abi maɖi si iaɣɔ ɣɛɛ? Ne silɔmia gu ayata ɣɛtɛ ɔɖuɖu to aaɣɔ. Iibaɖe sɔ kɔrɔ̃ gɔ mba ɔle ɣee maturi gbodzoo loarui ne ku siɖu maɖi. 10 Ana ne si maledza ne irui ito kɔraa ne, ito iaya? Si kuɣɛ̃kabɔrɛkɔ̃ ɔwiri ɔwuĩ ne ne - iito iaɣɔ pelepele ibɔrɛ i ngbegɔ iya ɣɛɛ?' "

11 Kere ne Bosate itɔ̃me ɔba me sɔ, 12 "Ɣere atsuele kaɖe gagbe sɔ, 'Miiɣe ara wagbe karɔ̃ ɣɛɛ?' Ɣere ma sɔ, 'Babilon igara ɔsɛ Yerusalem ne ɔmɔɛ̃ igara gu ɔ̃ makpakpaturi, ne ɔkɔ ma ɔkpesegu ɔbɔ i Babilon. 13 Kere ne ɔɖi sigara iyoturi ɔwɛ̃ ne ɔbaragu wũ kanyakawɛ̃, ne ɔtã wũ ɔkã ndamu ɔpia wũ i ɔ̃ kayirinɔ. Ana ne Babilon igara ɔkɔ karɔ̃ maturi nyaa mama lɛ mafɔrɔĩ ɔruigu. 14 Ɔbara kumɛɔ si ɔbɔ Israel sigarakaɖekɔ̃ karɔ̃, si siisibawo ɔta ana. Gɔ iatã sɔ siawe iki i kanyakawɛ̃ ndamu imɔɛ̃ ila ame kere. 15 Ɣɛɛ igara ɔta ɔya i Babilonia igara iso. Ne iki ne iso ne ɔsese makpakpaturi mawɛ̃ Egipte karɔ̃ iso, sɔ mana apɔngɔ gu makpakpɛ̃dze gbodzoo mabɔ. Ɔto ɔ̃ana isaruɛ? Nwɔ nsɛ ɔbara ara wagbe igbã sɛ ɔwo ɔtere? Ɔto ɔ̃atu kanyakawɛ̃ ndamu fiɛ ɔ̃awo ɔtere?

16 " ' Bosate Wɔ Nsiguso ɔkã sɔ, ayi kumɛgɔ lopia ngbã ne, ɔto ɔ̃akpi i Babilon karɔ̃ iso. Ɔ̃akpi i igara wɔ losɛra wũ i sigaraiyara iso, nwɔ ndamu ɔtu gu nwɔ kanyakawɛ̃ ɔtu nrɔɔ̃ ame. 17 Si mali akpo i ibere iso fiɛ matɛ̃ maturi mapia, si maawɔra magbodzoo ngbã ne, Egipte Igarakpakpa ku ɔ̃ makpakpɛ̃dze ku ɔle gu apɔngɔ gbodzoo, iibawo wũ ɔbuai i kakpã ame. 18 Ɔsɛ ndamu i karɔ̃ iki me itu ame. Ala ɔ̃ɔsu ɔ̃ kɔrɔ̃ ɔkã ɣɛɛ ɔbara ara ɔɖuɖu wagbe ɔso, ɔ̃ibawo ɔtere.

19 " 'Ne ɔso Bosate Wɔ Nsiguso sɔ: Lokã sɔ ayi kumɛgɔ lopia ngbã ne, nto loakpadzɛ̃ ndamu mɛ ɔsɛ i karɔ̃ gu wũ ndamu mɛ ɔtu losia i ɔ̃ iso. 20 Nto loawarɛ wũ asabu losɛ wũ, ne loamɔɛ̃ wũ i wũ iyebi ame. Loakɔ wũ lobɔ i Babilon ne loakpadzɛ̃ wũ kutsue i mmɔ alasɔ ɔ̃iɖe ɔnukuare ɔtã me. 21 Ɔ̃ makpakpɛ̃dze ɔɖuɖu ma nto matere to maarɔ̃ i ipɛmi kanya, ne mma loakuti mana ngbã to maasame maki i kakɔi biara isɛ. Iyɔ mito miatsue sɔ Mme Bosate ɔɔɖeika.

22 " ' Bosate Wɔ Nsiguso sɔ: Mme wũ mɔmɔ nto loasu ɔlɔmia lobɔrɛgu i sedar kudziri kato ne loato wũ ne. Loto loakpɛti ne ɔlɔmia ɖɔbɔrɔa loɖi ɔlɔmia wɔ i ngbegɔ lokɔlɛ iɖo, ne loapia wũ i kube kɔlɛa dzoroo iso. 23 Nto loapia ne i Israel kube kɔlɛa iso. Ito iaɖi akpai ne iaɣɔ̃ abi fiɛ iakpese sedar siare wɔ nto ɔlɛnyɔ. Kurodzai igbã biara aabara arodzayo i ɔ̃ ame. Kuto kuana kawekɔ̃ i akpai kusɔ ame. 24 Karɔ̃ iso adziri ɔɖuɖu to aatsue sɔ Mme Bosate nsɛ lobɔ kudziri kɔlɛa karɔ̃, ne nsɛ lotã ngɔ loba karɔ̃ ɔmɔ kukɔlɛ. Nsɛ lotã adziri ku ayata yuɛ ɔkore fiɛ nsɛ lotã kudziri korea ɔɖi ayata kumɔ.

" 'Mme Bosate loɔɖeika, fiɛ nto loabara ne.' "