1 Bosate itɔ̃me ɔba me sɔ, 2 "Ɔturi awune ɔbi, ɖikanya i Israel manyɔisose iso, ɖikanya si aɣere ma sɔ, ' Bosate Wɔ Nsiguso sɔ: Ndzo mitã Israel manyɔisose ma nsɛ masu ira i ma mɔmɔ ma ɔnɔwɛ̃ iso! Manyɔisose ne iiɖe masɛrɛ akuri masɛ manyɔiso ɣɛɛ? 3 Misɛ minɛ inyɛndu, mipia so arapia ku bɔi siwɛrɛ̃ fiɛ misɛ miɖue mabɔi ma nlɛ, ɣɛɛ miisɛ minyɔ masɛrɛ iso. 4 Miipia mma lofɛ̃ ɔle ɣee misa manyɛse ɣee minyi mma makpira agbɛ. Miisɛ mikɔ mma loyu mibɔ ɣee minyɔnyɔ mma loyu. Miɔɖe ma iso ku ɔtile gu amumuɣɔ. 5 Ne ɔso maɔsame alasɔ nyɔisose kuwɛ̃ na. Ana ne gɔ maɔsame ne makpese aɖera matã kuputubɔi ɔɖuɖu. 6 Wũ masɛrɛrrerɔ̃ ɔɔkila i abe ɔɖuɖu gu kabemi kɔlɛa biara iso. Masamera ma mapia i karɔ̃ ɔɖuɖu iso ne kuwɛ̃ iinyɔnyɔ ɣee ɔbie ma.

7 " 'Ne ɔso, manyɔisose, minɔ Bosate itɔ̃me sɔ, 8 Bosate Wɔ Nsiguso to ɔkã sɔ: Ayi kumɛgɔ lopia ngbã ne, ala wũ masɛrɛ na nyɔisose fiɛ maɔnyua ma makpese araɖea matã kuputubɔi ɔɖuɖu, fiɛ ala wũ manyɔisose iinyɔnyɔ wũ masɛrɛ ɣɛɛ manyɔsoiso bowũ maɖo wũ masɛrɛ, 9 ne ɔso manyɔisose minɔ lo Bosate itɔ̃me sɔ: 10 Nnɛgbe i Bosate Wɔ Nsiguso to ɔɣɛ ne: Lotsiri manyɔisose fiɛ loakarɛ ma itɔ̃me i nnɛ loba i wũ masɛrɛ ikuri iso. Loto loaɖi manyɔisose i masɛrɛ inyɔiso ame si manyɔisose iisibanyɔsoiso. Loto loaɖi wũ masɛrɛ lobɔrɛgu i ma nnya ame fiɛ iisibaɖe araɖea itã ma.

11 " 'Ala nnɛgbe i Bosate wɔ Nsiguso to ɔɣɛ sɔ: Mme, wũ mɔmɔ loto loanyɔnyɔ wũ masɛrɛ fiɛ loanyɔ ma iso. 12 Lɛ kumɛgɔ i nyɔisose sɛ ɔnyɔ ɔ̃ masɛrɛ ma losame iso si ɔpiagu ma ne, ngbɔ nto loanyɔ wũ masɛrɛ iso ne. Nto loaɖi ma lobɔrɛgu i ngɔi ɔɖuɖu mɛ masamera ma mapia ku adɔdɔ gu idududu iyi iso. 13 Nto loakɔ ma lobɔrɛgu i nɖebi gu nrɔ̃ ame, ne loabɔ ma i ma mɔmɔ karɔ̃ iso. Nto loatã ma araɖea i Israel abe gu i siwore kɔrɛ gu i ngɔi ɔɖuɖu i ngbegɔ i maturi sɛ mawe. 14 Loto loatã ma sikuakaɖekɔ̃ sɛɛ i Israel abe wa loaɖe ma araɖea karɔ̃. Mmɔ mato maarɛ i karɔ̃ i araɖea iɖe karɔ̃ sɛɛ iso, ne i mmɔ mato maaɖe araɖea i sikuakaɖekɔ̃ ga mba iɖa i Israel abe iso. 15 Mme wũ mɔmɔ nto loanyɔ wũ masɛrɛ iso fiɛ loatã marɛ i karɔ̃, Bosate Wɔ Nsiguso loɣɛ. 16 Nto loanyɔnyɔ masɛrɛ ma loyu fiɛ loakpesera mma loyu lobɔ. Nto loanyi mma lofɔ agbɛ fiɛ loapia mma lofɛ̃ ɔle. Ɣɛɛ mma lona so fiɛ maba ɔle ne loawɔra ma. Nto loanyɔ masɛrɛ iso ku itɔ̃meɣɛiriso.

17 " 'Ɣɛɛ fɔ, wũ masɛrɛ ikuri ne, nnɛgbe i Bosate Wɔ Nsiguso to ɔɣɛ ne: Nto loaɣɛ itɔ̃me ku sɛrɛrerɔ̃ gu ɔmama ndɛ̃ fiɛ loaɣɛ atɔ̃me i akpalasa gu masɛrɛtepu ndɛ̃. 18 Iisi mi sɔ miaɖe ara i sikuakaɖekɔ̃ sɛɛ? Ikote sɔ mianene sikuakaɖekɔ̃ tsɔra ku mi ngba? Iisi mi sɔ mianɛ ndu mɛ lokpa ɣɛɛ? Ikote sɔ mianene sitsɔra ku mi ngba mipia i iba ame ana? 19 Ikote sɔ wũ masɛrɛ ikuri aaɖe ara i nwa miɔnene iso fiɛ maanɛ nwa miɔnene mipia i iba ku mi ngba?

20 " 'Ne ɔso nnɛgbe i Bosate Wɔ Nsiguso to ɔɣɛ ne: Nyɔ, Mme wũ mɔmɔ nto loaɣɛ atɔ̃me i masɛrɛrerɔ̃ ma lona so gu mma lokore ndɛ̃. 21 Ala mi, masɛrɛ ma lona so ɔtsue mma nto manyɛ mafɛ̃ asa gu amɔiti gbɔgbɔɔgbɔ miɔsa ma miruigu. 22 Nto loaɖi wũ masɛrɛrerɔ̃ ikuri, fiɛ maisibayu ma. Nto loaɣɛ atɔ̃me i sɛrɛrerɔ̃ ɔwɛ̃ gu ɔmama ndɛ̃. 23 Nto loaɖi nyɔisose ɔwɛ̃ i masɛrɛ iso, wũ ɔɖabo David, ɔto ɔ̃anyɔ ma iso. Ɔto ɔ̃anyɔ ma iso fiɛ ɔto ɔ̃aɖe ma nyɔisose. 24 Mme Bosate loaɖe ma Ɣaa, fiɛ wũ ɔɖabo David to ɔ̃aɖe ɔɖeisoi i ma ndɛ̃. Mme Bosate loɔɖeika.

25 " 'Nto lobara isobuɛ ndamu ku wũ maturi fiɛ loaɖi kuputubɔi i karɔ̃ iso. Iyɔ wũ maturi to maawe i fafuĩ ame fiɛ maarɛ i ipo ame i kaɣɔ ame. 26 Nto loafere ma kusɛkusɛ gu karɔ̃ ɔɖuɖu ga loki kalɔ wũ kabemi. Nto loasese kado i ɔwi iso. Kado sɛɛ wɔgbe to ɔ̃abɔ ara itã maturi. 27 Adziri wa i nkpɛkɔ̃ to miaɣɔ̃ wã adziribi fiɛ karɔ̃ to kaatã kã ɔraɖui. Maturi to maawe i kaɣɔ ame i ma karɔ̃ iso. Mato maatsue sɔ Mme nɖe Bosate, si lobiɛ ma ɔmeisodziri fiɛ loɖi ma lobɔrɛgu i mma lobara ma masande nrɔɔ̃ ame. 28 Nɖebi iisibayu ma ɣee kuputubɔi iisibawe ma. Mato maasɛ i kaɣɔ ame fiɛ kuwɛ̃ iibapia ma ifɔ̃. 29 Nto loatã ma karɔ̃ ɔfɔ iyere ala kã ɔraɖui ilɛ ɔso. Ne maisibaweinyɛ i karɔ̃ iso ala kukãsiare ɔso ɣee nɖebi mama ɔma ma. 30 Bosate Wɔ Nsiguso sɔ, Iyɔ mato maatsue sɔ Mme, ma Ɣaa Bosate ne, lopiagu ma ne ma, Israel kaɖe ɖe wũ maturi. 31 Bosate Wɔ Nsiguso to ɔɣɛ sɔ, Mi wũ masɛrɛrerɔ̃, wũ sikuakaɖekɔ̃ masɛrɛrerɔ̃, , wũ maturi, Mme nɖe mi Ɣaa ne.' "