1 Bosate itɔ̃me ɔba me sɔ, 2 "Ɔturi awune ɔbi, marɔ̃go inyɔ ma loɖe ɔnyi ɔwɛ̃ mabibirɔ̃gomi ɔwe. 3 Makpese masɔrɔ̃ɖedze i Egipte karɔ̃ iso. Mato mabara marɛrɛĩsiai nɛgbe ta ma sibitɛ ame. Matã marɛrɛ̃ ɔpɛgu fiɛ mamama ma anyɛ wa i igbegbe ku ma sinyɛnyɛĩ i karɔ̃ gamɔ iso. 4 Marɔ kpakpare sɔ Oxola, ne makpere ɔ̃ ɔnyibi sɔ Oxoliba. Maɖe wũ ɔkpɛ ne maɣe mabirɛrɛĩ gu mabirɔ̃gomi. Oxola nɖe Samaria ne Oxoliba nɖe Yerusalem.

5 "Oxola ɔbara asɔrɔĩɖe gɔ ɔkpese ɔɖe wũ ɔkpɛ. Ne ɔsu kuɖuɛ ɔtã ɔ̃ maɖuɛdze, ma Asiriase. 6 Ma Asiriase ɔɖuɖu magbe ɔɖe makpãrɛrɛĩ ma lopia arapia bulu, manyɔisose gu silɔmaɖidze, ma ɔɖuɖu ɔɖe maporoporoi ma lore situri, ne masɛ apɔngɔ. 7 Ne ɔso ɔɖe sidzetɔ ku Asiria marɛrɛ̃ ma losɛkatɔ̃, ne ɔpukutura so ku ɔbiara arapɔa wa ɔsiai ku kuɖuɛ. 8 Ɔ̃inyua asɔrɔĩɖe wa ɔsɛkarɔ̃ i Egipte karɔ̃ iso. Ɔwi wɔ i ɔ̃ sibitɛ ame ne marɛrɛ̃ ɔrɛgu wũ, mamama fiɛ mapɔrɛ wũ mapia so gɔ ɔɖe ɔbitɛ fiɛ mabara wũ lɛ sɔrɔ̃ɖedze.

9 "Ne ɔso losu wũ lopia i ɔ̃ maɖuɛdze ma Asiriase nrɔɔ̃ ame, alasɔ ma ɔɖuɛ ne. 10 Mabɛ wũ arapia iso maɖi isɔ̃, masu ɔ̃ mabirɛrɛĩ gu mabirɔ̃gomi maruigu ne maɖue wũ ku ipɛmi. Ɔkpese simaira i marɔ̃go ndɛ̃, ne makpadzɛ̃ wũ kutsue ne.

11 "Ɔ̃ ɔnyibi Oxoliba ɔnya nnɛgbe, ɣɛɛ i ɔ̃ sidzetɔiɖe gu asɔrɔĩɖe ame ne ɔnina so kɔraa ɔɖo ɔ̃ ɔnyibi. 12 Ɔ̃ wũ ɔwe kuɖuɛ ɔtã ma Asiriase - maɖe manyɔisose, silɔmaɖidze, makpakpa ma lopia arapia kukaakɔ fiɛ masɛ apɔngɔ ma ɔɖuɖu ɔɖe maporoporoi ma lore situri. 13 Lonya sɔ ɔ̃ wũ ɔpukutura so, ma inyɔ ɔɖuɖu ɔki i ɔri ɔwɛ̃saã iso.

14 "Ɣɛɛ Oxoliba ne ɔkɛlɛgu i ɔ̃ asɔrɔĩɖe katɔ̃ ɔbua. Ɔɖuɛ marɛrɛ̃ kumiamia gɔ makua i abere iso, ma Kaldease* makpakpa ma kukua rɛtɛa arapia kumiamia. 15 Kufiami gɔ nto kulɛnyɔ ɔwe i ma sisɔ ku atinyira wa lokarã afere i ati iso. Ma ɔɖuɖu ɔnyɔ lɛ kubore makpakpa ma lobɔrɛ i Babilonia karɔ̃ iso, Kaldea maturi godɛã. 16 Kumɛgɔ ame Oxoliba ɔnya ara wa makua ne, ɔɖuɛ wã ne ɔsese makpabo i ma kɔrɛ i Kaldea karɔ̃ iso. 17 Kere ne ma Babiloniase ɔba i ɔ̃ kɔrɛ, ne i kuɖuɛ ɔmɛrɛ̃ ame ne, mapukutura wũ i kuɖuɛ karɛkɔ̃ iso. Ɔwi wɔ maɔpukutura wũ kama ne, ɔpɛ ɔfiriki i ma iso ɔsɛ̃ ma. 18 Ɔwi wɔ ɔ̃ɔkɛlɛgu ɔ̃ asɔrɔĩɖe katɔ̃ kpawee fiɛ ɔ̃ɔɖi so isɔ̃ ɔla ne, lotsiri wũ ne losɛ̃ wũ lɛ kumɛgɔ loɔsɛ̃ ɔ̃ ɔnyibi. 19 Ɣɛɛ Oxoliba ɔkpese ɔkɛlɛgu asɔrɔĩɖe katɔ̃ ɔbua lɛ ɔnyigi ɔ̃ sibitɛ ɔwi ku ɔwi wɔ ɔɖe sɔrɔ̃ɖedze i Egipte karɔ̃ iso. 20 Mmɔ ɔɖuɛ ɔ̃ maɖuɛdze ku kubie ne, mma sirɛrɛ̃ lose lɛ mafiripɔngɔ sire fiɛ ma kukuritu ɔse lɛ apɔngɔ kure awe. 21 Ne ɔso ɔwi wɔ awe i Egipte mala maɔma-ɔ sibitɛ anyɛ ku sinyɛnyɛĩ gu ngbɔ mala maɔpɔpɔrɛ-ɔ ne, abie fɔ sibitɛ ininaso nɛmɔ ana.

22 "Ne ɔso, Oxoliba, nnɛgbe i Bosate Wɔ Nsiguso to ɔɣɛ sɔ: Loto loatara fɔ maɖuɛdze, mma apɛ afiriki asɛ̃ ku itsiri, loakpadzɛ̃ ma mata maya-ɔ iso i ibaba biara iso. 23 Ala ne ma Babiloniase to maaba ku ma Kaldease ɔɖuɖu, marɛrɛ̃ ma i Pekod gu Soa gu Koa. Ma Asiriase ɔɖuɖu to maaba ku ma - maporoporoi ma lore situri, ma ɔɖuɖu ɔɖe manyɔisose, silɔmaɖidze, kubore makpakpa gu marɛrɛ̃ ku siɖebia kɔlɛa, ma ɔɖuɖu ɔsɛ i apɔngɔ iso. 24 Mato maaba maata maya-ɔ iso ku akpakpɛ̃ra, kubore gu makeke ku maturi kposu. Mato maya i ngɔi maki malɔ-ɔ i kasɛ biara ku akpirafɔra siare gu akosoi ku abɔrakoto i ati iso. Loto loasu-ɔ lopia i ma nrɔɔ̃ ame itã kutsueikpadzɛ̃ fiɛ mato maakpadzɛ̃-ɔ kutsue i ma asɛra kanya. 25 Loto loaɖi wũ sirerɛ sikpã lota loya-ɔ iso fiɛ mato maabara-ɔ ku sikpã. Mato maatu mi siɣɔ̃ gu atsue fiɛ mi ma loakuti to miarɔ̃ i ipɛmi kanya. Mato maasu mi mabirɛrɛĩ gu mi mabirɔ̃gomi lɛ masande fiɛ mi ma loakuti ne ɔtɔ loatsuedza mi. 26 Mato maabɛ arapia i mi iso fiɛ mato maasu mi akɛrɛra sɛɛ. 27 Ne ɔso loatuĩdza fɔ ininaso gu asɔrɔĩɖe wa asɛkarɔ̃ i Egipte karɔ̃ iso. Aisibabie ara wagbe ɣee aisibanyigi Egipte ana.

28 "Ala Bosate Wɔ Nsiguso sɔ: Ka nto loba loasu-ɔ lopia i mma atsiri nrɔɔ̃ ame, mma apɛ afirki asɛ̃ ku itsiri. 29 Mato maabara-ɔ ku itsiri ne mato maasu irabiara nɛ abara karabara fiɛ ana. Mato manyua-ɔ masɛ isɔ̃ gu kpawee, iyɔ fɔ asɔrɔĩɖe kunuarɛ aabɔrɛ kayi. Fɔ ininaso gu asɔrɔĩɖe 30 loɔkpadzɛ̃ nnɛgbe abɔ-ɔ iso. Ala abie nɖebi ne aɖe asɔrɔ̃ ku ma ne apukutura so ku ma arapɔa. 31 Ɔɔsore fɔ ɔnyibi Oxola, ne ɔso nnɛ lobara wũ loabara-ɔ fɔ wũ.

32 "Nnɛgbe i Bosate Wɔ Nsiguso to ɔɣɛ sɔ,

"Ato aanɛ abɔrɛgu i fɔ ɔnyibi ikɔi ame,

ikɔi nɛ lomɔ fiɛ iwodoro.

Ito iabɔ sima gu aɣiãra

alasɔ iyi pɔpɔɔpɔ.

33 Ato aayigu irɛ̃ gu isoma,

fɔ ikɔi nɛ loyigu iwɔ gu ikpakpi,

fɔ ɔnyibi Samaria ikɔi iɖe.

34 Ato aanɛ ne iro ta karɔ̃,

ato aawuĩ ne ibibiɛ ibara kusɛi

fiɛ aakɛkɛ fɔ anyɛ wa i igbegbe.

Bosate Wɔ Nsiguso loɣɛ sɔ, loɔɖeika.

35 "Ne ɔso nnɛgbe i Bosate Wɔ Nsiguso to ɔɣɛ ne: Gɔ ɔɔɣara me fiɛ apɛ kama afirikira atã me ɔso ne, ikote sɔ aafɔ fɔ ininaso gu asɔrɔĩɖe isuɖea."

36 Bosate ɔɣere me sɔ, "Ɔturi awune ɔbi, ato aaɣɛgu Oxola gu Oxoliba atɔ̃me? Iyɔ su ma anyanya kubarara sɛ i ma anɔ, 37 ala maɔɖe asɔrɔ̃ fiɛ ma nrɔɔ̃ ɔpɛ ima. Maɖe asɔrɔ̃ ku ma arapɔa, masɔrɛ ta ma mabi, mabi ma maɣe matã me, lɛ aɖera matã arapɔa. 38 Ana ne maɔbara me nnɛgbe: Ɔwi wɔmɔ ame ana ne mapukutura wũ isɔrɛyo ne mapia wũ Awarãyi ɔgu. 39 Iyi nɛ ame tutuutu masɔrɛ ma mabi matã ma arapɔa ne, mabo i wũ isɔrɛyo ame ne mapia ne ɔgu ne. Nnɛmɔ mabara i wũ iyo ame ne.

40 "Kɔraa ne masese makpabo masɛ maakpere maturi ma lobɔrɛ i kadzorokɔ̃. Kere ne ɔwi wɔ maba ne, mipie ndu ne miledza so mikua mi anɔmi ara ne mipia mi akɛrɛra ala ma ɔso ne. 41 Misɛ i kasɛkɔ̃ sɛɛ tagbaraa ga ku ɔpɔrɔ̃ wɔ masɛ i kã katɔ̃. Ne miɔsu wũ kuakɔrɔ̃kɔrɔã gu nnɔĩ wa nɖe wũ are misia iso.

42 "Maturi ma loisu kuira kulu ɔla kuki kulɔ ɔrɔ̃go. Makɔ ma Sabese mabɔrɛgu i fafuĩ ame ku marɛrɛ̃ ma lobɔrɛ i mma loisu kuira ame. Ne masu akɛrɛra mapia i ɔrɔ̃go gu ɔ̃ ɔnyibi kɔrɔ̃. Ne matɔmedza ma igarakoto wa nto alɛnyɔ i ma ati. 43 Kere ne loɣɛ i nwɔ i so ɔtu ku sidzetɔ sɔ, 'Kiniɔ tã mazã wũ lɛ sɔrɔ̃ɖedze, ala ne ngbɔ ɔturi kowũ ɔɖe ne.' 44 Ne marɛgu wũ ne. Ne lɛ kumɛgɔ i marɛrɛ̃ sɛ marɛgu sɔrɔ̃ɖedze ne, kumɛɔ ame marɛgu Oxola gu Oxoliba, marɔ̃go ma lonina so ne. 45 Ɣɛɛ marɛrɛ̃ bɔlɔlɔa to maaɣɛgu ma itɔ̃me, matã ma kutsueikpadzɛ̃ gɔ masɛ matã marɔ̃go ma lofe ma marã kama. Ala masɛ maɖe sidzetɔ ne ima sɛ ipɛ ma nrɔɔ̃ ɔso.

46 "Bosate Wɔ Nsiguso sɔ: Mikpere maturi ikuri si mata maya i ma iso, si misu ma mitã itiikpakpa gu kakpãramɔɛã. 47 Maturi ikuri to maapɛ ma ata fiɛ maakpira ma ku apɛmi. Mato maaɖue ma mabirɛrɛĩ gu mabirɔ̃gomi fiɛ maatsuedza ma ayo.

48 "Ne ɔso nto loatuĩdza ininaso i karɔ̃ ame, si marɔ̃go ɔɖuɖu aafɔ isɛ̃itã fiɛ maibasore mi. 49 Mito miaweinyɛ i mi sidzetɔ iti kuso fiɛ miafɔ kuso i mi iɣɔsɔrɛ akpi iti. Iyɔ mito miatsue sɔ Mme nɖe Bosate Wɔ Nsiguso."