1 I ikɔ sinyɔruva i bo kafɔrɔ̃ iwe ame ne, i ikɔ karɔ̃kasɛkɔ̃ ne, iyi weova i kuwa ame i ikɔ iweonaare i Yerusalem ɔmagɛ̃siare ikpase kama ne - iyi nɛmɔ tutuutu ne Bosate kɔrɔ̃ ɔsia me iso ne ɔkɔ me ɔkɛlɛgu i mmɔ. 2 I Ɣaa kuɖikute ame ne ɔkɔ me ɔkɛlɛgu i Israel karɔ̃ ame, ne ɔɣedza me i kube kuwɛ̃ gɔ lokɔlɛ gbaã iso. Kɔ̃ kagbalɔ ibaba ne ayo awɛ̃ ɔwe gɔ inyɔ lɛ ɔmagɛ̃siare awe. 3 Gɔ ɔkɔ me ɔkɛlɛgu i mmɔ ne, lonya ɔrɛrɛ̃ ɔwɛ̃ wɔ nto ɔfiɛ lɛ ayiwa awe. Ɔta ɔɣɛ i kabɔrɛnya ɔto ɔkati ɖɔbɔrɔa iwɛĩ gu ara isusudziri i kɔrɔ̃ ame. 4 Ɔrɛrɛ̃ ɔɣere me sɔ, "Ɔturi awune ɔbi, nya ku fɔ anɔmi si ka anɔ ku fɔ atsue, si asɛ irabiara nɛ nto loba loate-ɔ ikpo. Ala ne ɔso maɔkɔ-ɔ mabɔ i ngbe ne. Ɣere Israel kaɖe irabiara nɛ asɛ anya."

5 Lonya ibere gɔ iki ilɔ isɔrɛyo kasɛkɔ̃ pelepele. Ara isusudziri wɔ i ɔrɛrɛ̃ kɔrɔ̃ ame ɔkarã meta itɛ gɔ ibiara ɔkarã meta kaku gu setimeta fainafaina. Ɔsusu ibere, ne itiri isusudziri meta itɛ fiɛ ikɔlɛ kumɛɔ ame.

6 Kere ne ka ɔkɛlɛ kayogodɔ̃ ga nto kanyɔ kuɣɛ̃kabɔrɛkɔ̃. Ɔsɛ ɔya kã asɛtiĩ iso ne ɔsusu kayogodɔ̃ kabɔrɛnya, iwodoro isusudziri ɔwɛ̃. 7 Madzuɛ̃se kuyoi gɔ i kuyogodɔ̃ ababa iso ɔkarã meta itɛ fiɛ kubɛ meta itɛ. Abere wa mpia i kuyoi ndɛ̃ ɔtiri meta inyɔ gu kaku. Ne kayogodɔ̃ kabɔrɛnya ga mpia i pato kɔrɛ to kanyɔ isɔrɛyo ɔbɛ meta itɛ̃.

8 Ne ɔsusu kakikɔ̃ pato; 9 iwodoro meta ina ne ibere ɔtiri meta ɔwɛ̃. Ne kakikɔ̃ pato ɔnyɔ isɔrɛyo isɛ.

10 I kuɣɛ̃kabɔrɛkɔ̃ kayogodɔ̃ ame ne kuyoi kutɛ ɔwe i kasɛ biara iso. Kuyoi kutɛ̃ kususume ɔɖe iwɛ̃ fiɛ abere wa loɣɛ kuyoi ndɛ̃ i kasɛ biara iso ɔwe kususume kuwɛ̃. 11 Kere ne ka ɔsusu kakikɔ̃ kabɔrɛnya kubɛme, iɖe meta iru fiɛ ne kukarãme ɔɖe meta ikuɔ gu kaku. 12 I kayoi biara katɔ̃ ne ibere nɛ lokɔlɛ meta kaku ɔwe, ne kuyoi ɔɖe meta itɛ i kubɛme gu meta itɛ i kukarãme ame. 13 Kere ne ka ɔsusu kakikɔ̃ ita i kayoi kawɛ̃ kama lɛ ibere kato ikɛlɛ kayoi ga mpia i kanɔsɔ̃ ibere kato. Igu ɔɖe meta iweo-inyɔ gu kaku ita i kabusikɔ̃ kawɛ̃ ikɛlɛ nga i kanɔsɔ̃. 14 Ɔsusu kakikɔ̃ ibere nɛ nɣɛ i katɔ̃ ɔkidza i kakikɔ̃ kame - meta sitɛ. Ne isusume ɔkɛlɛ ta pato iso to inyɔ kasarɛkɔ̃. 15 Ita i kakikɔ̃ kabɔrɛnya ikɛlɛ pato kawirikɔ̃ tsɔra igu ɔɖe meta sinyɔ-iru. 16 Kuyoi gu abere wa nɣɛ i kakikɔ̃ ame kubusikɔ̃ mɔmɔriã ɔki kulɔ, lɛ ise i pato, kubusikɔ̃ ɔki kulɔ to kunyɔ kame isɛ. Mata abɛrɛdziri masia i kame abere iso.

17 Kere ne ɔrɛrɛ̃ ɔkɔ me ɔbogu i kuaruɛ kasarɛkɔ̃ ame. Mmɔ lonya kuyoi kuwɛ̃ gu kanenekɔ̃ ga maɔbara maki malɔ kasarɛkɔ̃. Kuyoi sitɛ pia i kanenekɔ̃ iso ikɛlɛ. 18 Kanenekɔ̃ ɔmatã i kakikɔ̃ ababa ne kakarã lɛ kubɛ, ngbe loɖe karɔ̃isɛkɔ̃ kanenekɔ̃ ne. 19 Kere ne ɔsusu igu ita i karɔ̃isɛkɔ̃ kakikɔ̃ ikɛlɛ kame kasarɛkɔ̃ inyamɔ. Iɖe meta siru i kuɣɛ̃kabɔrɛkɔ̃ ibaba isɛ ne kumɛɔ ame i katikpe isɛ ne.

20 Kere ne ɔsusu kayogodɔ̃ ga nto kanyɔ katikpe isɛ kubɛme gu kukarãme, kayogodɔ gagbe to kakɛlɛ kuaruɛ kasarɛkɔ̃ ame. 21 Kã kuyoi ɔɖe kutɛ i ibaba biara iso - kɔ̃ ndɛ̃ abere wa nɣɛ gu ne pato ɔwe kususume kuwɛ̃ lɛ ngɔ i kakikɔ̃ ɖeakatɔ̃ ame. Iɖe meta iweo-inyɔ gu kaku i kukarãme fiɛ meta iweo-inyɔ gu kaku i kubɛme ame. 22 Ne kubusikɔ̃, ne pato gu ne ikɛrɛ abɛrɛdziri ɔwe kususume lɛ kayogodɔ̃ ga nto kanyɔ kuɣɛ̃kabɔrɛkɔ̃ ɔkpɛ. Asɛtiĩ akɔdzɛ pia ikɛlɛ ne iso gɔ ne pato pia i wã kanɔsɔ̃. 23 Kayogodɔ̃ ɔwe ikɛlɛ kame kasarɛkɔ̃ to inyɔ katikpe kayogodɔ̃, lɛ kumɛgɔ ame iwe i kuɣɛ̃kabɔrɛkɔ̃ ɔkpɛ. Ɔsusu kayogodɔ̃ kawɛ̃ ikɛlɛ nga i kanɔsɔ̃, iɖe meta siru.

24 Ne ɔkɔ me ɔkɛlɛgu i kala isɛ ne lonya kayogodɔ̃ to kanyɔ kagbalɔ. Ne ɔsusu ne ndɛ̃ abere gu ne pato, ne lɛ amama awe ne mawe kususume kuwɛ̃. 25 Kakikɔ̃ gu kã pato ɔwe kubusikɔ̃ mɔmɔriã kuki kulɔ, lɛ amama kubusikɔ̃ awe. Ikarã meta sinyɔ-iru fiɛ ibɛ meta iweo-inyɔ gu kaku. 26 Asɛtiĩ akɔdzɛ pia ikɛlɛ ne iso, ku ne pato i kɔ̃ kanɔsɔ̃. Mata abɛrɛdziri masia i ndɛ̃ abere ntɔ̃ iso, i ibaba biara iso. 27 Kame kasarɛkɔ̃ ana ɔwe kayogodɔ̃ ga nto kanyɔ kala, ne ɔsusu ita i kayogodɔ̃ gagbe iso ikɛlɛ kuaruɛ kasarɛkɔ̃ i kala ibaba, iɖe meta siru.

28 Kere ne ɔkɔ me ɔkigu i kagbalɔ kayogodɔ̃ ame ɔbɔ kame kasarɛkɔ̃. Ne ɔsusu kagbalɔ kayogodɔ̃, iwe kususume lɛ kumama. 29 Ne kuyoi, ne abere wa nɣɛ gu ne pato ɔwe kususume lɛ amama. Kakikɔ̃ gu kã pato ɔwe kubusikɔ̃ kuki kulɔ. Ikarã meta sinyɔ-iru fiɛ ibɛ meta iweo-inyɔ gu kaku. 30 (Kukikɔ̃ mapato ma mpia maki malɔ kame kasarɛkɔ̃ ɔkarã meta iweo-inyɔ gu kaku fiɛ mawodoro meta inyɔ gu kaku.) 31 Ne pato to ɔnyɔ kuaruɛ kasarɛkɔ̃. Mata abɛrɛdziri masu makɛrɛ ne ndɛ̃ abere, ne asɛtiĩ fainafaina ɔya akɛlɛ ne iso.

32 Kere ne ɔkɔ me ɔbɔ kame kasarɛkɔ̃ i kuɣɛ̃kabɔrɛkɔ̃ ibaba, ne ɔsusu kakikɔ̃. Iwe kususume lɛ amama. 33 Ne kuyoi, kɔ̃ ndɛ̃ abere wa nɣɛ gu ne pato ɔwe kususume lɛ amama. Kakikɔ̃ gu kã pato ɔwe kubusikɔ̃ kuki kulɔ. Ikarã meta sinyɔ-iru fiɛ ibɛ meta iweo-inyɔ gu kaku. 34 Ne pato ɔnyɔ kuaruɛ kasarɛkɔ̃, mata abɛrɛdziri masu makɛrɛ ne ndɛ̃ abere wa nɣɛ i ababa anyɔ, ne asɛtiĩ fainafaina ɔya akɛlɛ ne iso.

35 Kere ne ɔkɔ me ɔbɔ i katikpe kayogodɔ̃ kɔrɛ ne ɔsusu kã. Iwe kususume lɛ kumama awe, 36 lɛ wã kuyoi ne, ne ndɛ̃ abere wa nɣɛ gu ne pato ɔwe kubusikɔ̃ kuki kulɔ. Ikarã meta sinyɔ-iru fiɛ ibɛ meta iweo-inyɔ gu kaku. 37 Ne pato ɔnyɔ kuaruɛ kasarɛkɔ̃, mata abɛrɛdziri masu makɛrɛ ne ndɛ̃ abere wa nɣɛ i ababa anyɔ, ne asɛtiĩ fainafaina ɔya akɛlɛ ne iso.

38 Kayoi ku kabɔrɛnya ɔwe i kame kukikɔ̃ pato biara kɔrɛ, ngbegɔ mafore sina itã araifɛ̃ asɔrɛ. 39 I pato kakikɔ̃ ne sipɔrɔ̃ inyɔ ɔse i ibaba biara iso, ndzɛ iso maɖue araifɛ̃ asɔrɛ, ikpi asɔrɛ gu iɣɛrɛkuso asɔrɛ mabɔi. 40 Ibere nɛ i pato kakikɔ̃ kuruɛ i inyamɔ ne, imatã asɛtiĩ wa i kabɔrɛnya to ikɛlɛ katikpe kakikɔ̃ ne sipɔrɔ̃ inyɔ ɔwe, ne i asɛtiĩ ibaba mama iso ne sipɔrɔ̃ inyɔ ɔwe. 41 Ne ɔso sipɔrɔ̃ ina ɔwe i kakikɔ̃ ibaba iwɛ̃ ne sipɔrɔ̃ ina ɔwe i ibaba mama iso - siɖe sipɔrɔ̃ fainafaina - dzɛ iso maɖue asɔrɛ mabɔi. 42 Sipɔrɔ̃ ina dzɛ masu ata wa matu mabara ala itã araifɛ̃ asɔrɛ ɔwe, ɔbiara ɔkarã sentimeta sikɔdzɛ-iru fiɛ ɔbɛ kumɛɔ ame ne ɔkɔlɛ sentimeta siru. Masu arɔi itã araifɛ̃ asɔrɛ gu asɔrɛ mama iɖue masia i sɛ̃ iso. 43 Ne masu kugodai kunyɔ masakanya gɔ lokarã setimeta fainafaina, masa i ibere iso maki malɔ. Sipɔrɔ̃ ɔse sitã asɔrɛ sina.

44 Kuyoi kunyɔ ɔwe i kame kasarɛkɔ̃, kawɛ̃ ɔwe i katikpe kayogodɔ̃ kuruɛ to inyɔ kagbalɔ, ne iwɛ̃ ɔwe i kagbalɔ kayogodɔ̃ kuruɛ ne to kanyɔ katikpe. 45 Ɔɣere me sɔ, "Kayoi ga nto kanyɔ kagbalɔ nɖe masɔrɛdze ma nto manyɔ isɔrɛyo iso ɔkpɛ, 46 ne kayoi ga nto kanyɔ katikpe ɖe masɔrɛdze ma nto manyɔ isɔrɛkasege iso ɔkpɛ. Mmagbe nɖe Zadok mabibirɛrɛĩ, ma nɖe ma Levise ma kere loabore mamatã Bosate masɔrɛ i ɔ̃ anɔ."

47 Kere ne ɔsusu kasarɛkɔ̃: ikate i kukarame gu i kubɛme ame - ikarã meta siru fiɛ ibɛ meta siru. Ne isɔrɛkasege ɔwe i isɔrɛyo katɔ̃.

48 Ɔkɔ me ɔbɔ isɔrɛyo pato ame ne ɔsusu pato ndɛ̃ abere, abɛ meta inyɔ gu kaku i ababa anyɔ ɔɖuɖu. Kabɔrɛnya kubɛme ɔɖe meta ikɔdzɛ, ne ndɛ̃ abere wa nɣɛ ɔbɛ meta ɔwɛ̃ gu kaku i ababa anyɔ ɔɖuɖu. 49 Pato ɔbɛ meta iweo, ne ɔkarã meta ikuɔ ita i katɔ̃ ikɛlɛ ne kama. Asɛtiĩ ɔya akɛlɛ ne iso, ne akpa ɔwe i ndɛ̃ abere i ibaba biara iso.