1 " ' Bosate wɔ Nsiguso sɔ: Kame kasarɛkɔ̃ kayogodɔ̃ ga nto kanyɔ kuɣɛ̃kabɔrɛkɔ̃ ne, ikote sɔ maasɛ̃ kã ku ayi akuɔ wa mato mabara karabara. Ɣɛɛ Iwarãyi gu Ɔgbaleti Ɣɛtɛ iyi ne, ikote sɔ maabusi kã. 2 Ɔɖeisoi aabɔrɛ i inyamɔ ɔki i pato kakikɔ̃ ɔbo fiɛ ɔ̃aya i kayogodɔ̃ kukuidziri kɔrɛ. Masɔrɛdze to maasɔrɛ ɔ̃ araifɛ̃ isɔrɛ gu ɔ̃ isobuɛ asɔrɛ. Ikote sɔ ɔ̃asumu i kakikɔ̃ kabɔrɛnya iyɔ ɔ̃abɔrɛ ɣɛɛ maibasɛ̃ kayogodɔ̃ gbɔgbɔɔgbɔ kutsuɛ. 3 Awarãyi iso gu Ɔgbaleti Ɣɛtɛ ayi ne, maturi ma i karɔ̃ iso to maasumu i Bosate anɔ i kakikɔ̃ gamɔ kabɔrɛnya. 4 Ara wa i ɔɖeisoi aabɔ Bosate ku iwarãyi iso itã araifɛ̃ isɔrɛ nɖe akpalasa kosoi akuɔ gu ikpalasa, wã ɔɖuɖu aayi. 5 Geɖebu isɔrɛ nɛ maatã ku ikpalasa nɖe efa ɔwɛ̃ gu geɖebu ku akpalasa kosoi aaɖe kumɛgɔ kanya ɔɖuɛ ku nnɔĩ lita ina itã efa biara. 6 Ɔgbaleti Ɣɛtɛ iyi iso ne ɔto ɔ̃asɔrɛ nantsuĩ poroporoi, sɛrɛrerɔ̃ abi akuɔ gu ikpalasa, wã ɔɖuɖu aayi. 7 Ɔto ɔ̃atã geɖebu isɔrɛ efa ɔwɛ̃ ku nantsuĩrɛrɛ̃, efa ɔwɛ̃ ku ikpalasa ne ku sɛrɛrerɔ̃ abi ne kusime lɛ ɔbie ku nnɔĩ lita ina ku efa biara iso. 8 Ikote sɔ si ɔɖeisoi aabo ne, ɔ̃aki i pato kakikɔ̃ fiɛ mmɔ ame ɔ̃aki ɔbɔrɛ ne.

9 " 'Si maturi ma i karɔ̃ iso ɔba i Bosate anɔ ku ayiɖea wa masɛ ne, ɔrere wɔ loki i katikpe kayogodɔ̃ ame si ɔsumu ne, ikote sɔ ɔ̃aki i kagbalɔ kayogodɔ̃ ame ɔbɔrɛ fiɛ ɔrere wɔ loki i kagbalɔ kayogodɔ̃ ame ɔbo ne, ɔ̃aki i katikpe kayogodɔ̃ ɔbɔrɛ. Iikote sɔ kuwɛ̃ aaki i kayogodɔ̃ ga ame ɔbo iyo ame si ɔto ɔbɔrɛ. Ɣɛɛ ɔbiara aaki i nga ame ɔki ɔbo kanɔsɔ̃ kare ame ɔbɔrɛ. 10 Si mato mabo ne, ɔɖeisoi aabogu ma fiɛ si mato mabɔrɛ ne, ɔ̃abɔrɛgu ma.

11 " 'I ayiɖea iso gu i nwa masɛ ame ne, geɖebu isɔrɛ aaɖe efa ɔwɛ̃ ku nantsuĩrɛrɛ̃, efa ɔwɛ̃ ku ikpalasa ku sɛrɛrerɔ̃ abi ne kusime lɛ ɔbie kanya, ku nnɔĩ lita ina itã efa biara. 12 Si ɔɖeisoi ɔtã Bosate kuɖuɛ isɔrɛ ne - si araifɛ̃ isɔrɛ ɣee isobuɛ asɔrɛ ne - ikote sɔ maabusi kayogodɔ̃ ga nto kaanyɔ kuɣɛ̃kabɔrɛkɔ̃ matã wũ. Ɔto ɔ̃asɔrɛ ɔ̃ araifɛ̃ isɔrɛ ɣee ɔ̃ isobuɛ asɔrɛ lɛ kumɛgɔ ɔsɛ ɔbara ku Iwarãyi awe. Iyɔ ɔto ɔ̃abɔrɛ, ne kama si ɔ̃ɔbɔrɛ ne, ka maasɛ̃ kayogodɔ̃.

13 " ' Iyi biara ne ikote sɔ ato aatã ikɔ iwɛ̃ sɛrɛrerɔ̃ ibi nɛ loyi itã araifɛ̃ isɔrɛ itã Bosate kaya biara ne aatã ne. 14 Ana ne ato aatã ne ku geɖebu isɔrɛ ku kaya biara, iaɖe efa ikakuɔva ku nnɔĩ ikatɛare si maalupu ku ɔraũ si ɔɣɔ. Geɖebu isɔrɛ nɛgbe itã Bosate ɖe isɛra nɛ nse ɖaa. 15 Ne ɔso maatã sɛrɛrerɔ̃ ibi gu geɖebu isɔrɛ gu nnɔĩ ku kaya biara itã ɔwi araifɛ̃ isɔrɛ ɖaa.

16 " 'Nnɛgbe i Bosate Wɔ Nsiguso to ɔɣɛ ne: Si ɔɖeisoi ɔtã ɔ̃ ɔbibirɛrɛĩ ɔwɛ̃ karatã ɔbɔrɛgu i ɔ̃ kaɖekɔ̃ ame ne, ito iaɖe ɔ̃ ɔbi wɔmɔ ɔkparɛ ire. Ito iaɖe ma ɔkpɛ lɛ kaɖekɔ̃. 17 Ɣɛɛ si ɔɖeisoi ɔtã ɔ̃ ɔɖabo ɔwɛ̃ karatã ɔbɔrɛgu i ɔ̃ kaɖekɔ̃ ame ne, ɔɖabo to ɔ̃ala ne gbɔgbɔɔgbɔ ikɔ nɛ ɔ̃afɔ isɛguso. Iyɔ iakpese iba i ɔɖeisoi kɔrɛ. Ɔɖeisoi kaɖekɔ̃ ɖe ɔ̃ mabibirɛrɛĩ kere ɔkpɛ, ma ire iɖe. 18 Iikote sɔ ɔɖeisoi aasa maturi ɔɖi i ma ara ame ɔfɔ ma kaɖekɔ̃ karere kukawɛ̃. Ikote sɔ ɔ̃atã ɔ̃ mabibirɛrɛĩ ma kaɖekɔ̃ ɔbɔrɛgu i ɔ̃ mɔmɔ ara ame. Iyɔ ne maibaɖi wũ maturi kuwɛ̃ i ɔ̃ ara ame.' "

19 Kere ne ɔrɛrɛ̃ ɔkɔ me ɔkigu i kayogodɔ̃ kabɔrɛnya ga nto kakɛlɛ kuyoi sekelea gɔ nto kunyɔ katikpe ame, ngɔ nɖe masɔrɛdze kure ne ɔte me kakɔi i kuɣɛ̃kabokɔ̃ kawirikɔ̃. 20 Ɔɣere me sɔ, "Kakɔi ga i ngbe i masɔrɛdze madzaɖe, ngbegɔ maawa iɣɛrɛkuso isɔrɛ gu ikpi isɔrɛ. Ngbe ame maafɛ̃ geɖebu isɔrɛ ne, si maibasu wã makɛlɛgu i kuaruɛ kasarɛkɔ̃ fiɛ maturi iso aasekele."

21 Kere ne ka ɔkɔ me ɔbɔ i kuaruɛ kasarɛkɔ̃ ne ɔkɔ me ɔkigu i siɣokã ina iso, ne lonya kasɔrɛkɔ̃ mama i ɔɣokã biara ame. 22 I kuaruɛ kasarɛkɔ̃ siɣokã ina ame ne, matɛ̃ ɔkpã mapia kusarɛkɔ̃ ikarã meta sinyɔ fiɛ ibɛ meta iweo-iru awe. Kasarɛkɔ̃ biara i siɣokã ina ɔɖuɖu ame ɔmɔ sikate. 23 Masu ata masɛ maki malɔ kasarɛkɔ̃ biara i kɔ̃ kuna ame, ne matsue ɔtɔ mpiakɔ̃ maki malɔ i ata kayirinɔ. 24 Ɔɣere me sɔ, "Nwagbe nɖe madzaɖe ma ame i mma nsɛ masumu i isɔrɛyo ame aawa maturi asɔrɛ."