1 Bosate itɔ̃me ɔba me sɔ, 2 "Ɔturi awune ɔbi, ɖe fɔ kaɖemabi ika si aɣere ma sɔ, 'Si lobɔ ipɛmi i karɔ̃ kawɛ̃ iso fiɛ karɔ̃ iso maturi ɔɖi ma ɔturi ɔwɛ̃ sɔ ɔɖe ma dzuɛ̃se ne, 3 fiɛ ɔsɛ ɔnya sɔ ipɛmi to iba i karɔ̃ iso, ne ɔsɛ ɔfɛ̃ kadadã si ɔsɛ̃ maturi ne, 4 iyɔ si ɔrere ɔnɔ kadadã silɔ ɣɛɛ ɔ̃ifɔ isɛ̃itã, ne ipɛmi ɔba fiɛ ɔkpi ne, ɔ̃ ima aasia i ɔ̃ mɔmɔ iti iso. 5 Gɔ ɔnɔ kadadã silɔ ɣɛɛ ɔ̃ifɔ isɛ̃itã ne, ɔ̃ ima asia i ɔ̃ mɔmɔ iti iso. Si ɔfɔ ɔfɔ isɛ̃itã ne, tee ɔ̃aɖi so ngbã. 6 Ɣɛɛ si dzuɛ̃se ɔnya tsirise to ɔba fiɛ ɔ̃isɛ ɔfɛ̃ kadadã ɔsɛ̃ maturi fiɛ tsirise ɔba fiɛ ɔɖue ɔturi i ma ndɛ̃ ne, nwɔmɔ to ɔ̃akpi ala ɔ̃ ikpi iti ɣɛɛ loakarɛ ɔ̃ ima iti i dzuɛ̃se nrɔɔ̃ ame.'

7 "Ɔturi awune ɔbi, loɔbara-ɔ dzuɛ̃se lotã Israel kaɖe, ne ɔso nɔ nnɛ nto loɣɛ si atã ma isɛ̃itã nɛ lobɔrɛ i wũ kɔrɛ. 8 Si loɣere ɔtilese sɔ, 'Ɔtilese, gbaã ato aakpi lo,' fiɛ aiɣɛ sɔ ɔfiriki i ɔ̃ siri iso ne, ɔtilese wɔmɔ to ɔ̃akpi ala ɔ̃ ikpi ɔso, ne nto loakarɛ ɔ̃ ima iti i fɔ kɔrɛ. 9 Ɣɛɛ si asɛ̃ atã ɔtilese sɔ ɔfiriki i ɔ̃ siri iso fiɛ ɔ̃isɛ ɔbara i ne iso ne, ɔto ɔ̃akpi i ɔ̃ akpi iti ɣɛɛ fɔ ne ɔɔɖi fɔ ngbã.

10 "Ɔturi awune ɔbi, ɣere Israel kaɖe sɔ, 'Nnɛgbe mito miɣɛ ne: "Bo akpi gu aɣɛrɛ sia i bo iso ku ɔrɔrã, ne bopia i imɔrɛ̃ ame gbaã ala wã iti. Nda boawo ngbã ɔwe?" ' 11 Ɣere ma sɔ, ' Bosate Wɔ Nsiguso to ɔkã sɔ, Ayi kumɛgɔ lopia ngbã ne, loisɛ lona isoɣɔ i matilese kukpi iso ɣɛɛ bowũ sɔ si mafiriki mabɔrɛ i ma siri iso si masɛ ngbã. Mifiriki! Mifiriki mibɔrɛ i mi siri nyanyariã iso! O Israel kaɖe be ɔso miakpi?'

12 "Ne ɔso, ɔturi awune ɔbi, ɣere fɔ kaɖemabi sɔ, "Ɔturi sibɔlɔlɔ iibaɖi wũ si ɔbara ikpi. Ɔtilese ɔtile iibatã ɔrɔ̃ si ɔfiriki ɔbɔrɛ i ne ame. Ɔturi bɔlɔlɔa si ɔbara ikpi ne, ɔ̃ibasɛ ngbã ala ɔ̃ sibɔlɔlɔ kuere ɔso.' 13 Si loɣere ɔturi bɔlɔlɔa sɔ ɔto ɔ̃asɛ ngbã ɣɛɛ ɔsiaiti i ɔ̃ sibɔlɔlɔ iso ne ɔbara iranyanyariã ne, maisibanyigi ɔ̃ sibɔlɔlɔ ara wa ɔ̃ɔbara kuiwɛ̃. Ɔto ɔ̃akpi ala iranyanyariã ne ɔ̃ɔbara ɔso. 14 Ana ne si loɣere ɔtilese sɔ, 'Gbaã ato aakpi,' ɣɛɛ kere ne ɔfiriki ɔbɔrɛ i ɔ̃ ikpi ame ne ɔsɛ ɔbara nnɛ loya gu isɛɛ - 15 si ɔtilese ɔkpesera nnɛ ɔfɔ lɛ ayaikama i kuso gɔ ɔnyɛ ɔtã iti ne, ɔkpesera nnɛ ɔ̃ɔyu ɔtã, ne ɔsiai asɛ̃ra wa nsɛ atã ngbã fiɛ ɔ̃isɛ ɔbara iranyanyariã kuiwɛ̃ ne, gbaã ne ɔto ɔ̃asɛ ngbã, ɔ̃ibakpi. 16 Maisibanyigi ikpi kuiwɛ̃ nɛ ɔbara ana. Ɔ̃ɔbara isɛɛ gu nnɛ loya, gbaã ɔto ɔ̃asɛ ngbã.

17 "Ɣɛɛ fɔ kaɖemabi sɛ maɣɛ sɔ, ' Bosate ɔri iiya.' Ɣɛɛ ne ma ɔri bowũ loiya. 18 Si ɔturi bɔlɔlɔa ɔfiriki ɔbɔrɛ i ɔ̃ sibɔlɔlɔ ame ne ɔbara iranyanyariã ne, ɔto ɔ̃akpi i ne iti. 19 Si ɔtilese ɔfiriki ɔbɔrɛ i ɔ̃ ɔtile ame, ne ɔsɛ ɔbara isɛɛ gu nnɛ loya ne, ɔto ɔ̃asɛ ngbã ala nnɛ ɔbara ɔso. 20 Ɣɛɛ Israel kaɖe, asɛ aɣɛ sɔ, ' Bosate ɔri iiya.' Ɣɛɛ nto loaɣɛgu ɔbiara atɔ̃me i ɔ̃ mɔmɔ siri iso."

21 Iyi ruva i kuwa weova ame i ikɔ iweonyɔare i bo kafɔrɔ̃ ame ikɛlɛ ame ne, ɔrɛrɛ̃ ɔwɛ̃ wɔ lorui ɔtere i Yerusalem ɔba i wũ kɔrɛ ne ɔɣere me sɔ, "Ɔmagɛ̃siare ɔɔkpase!" 22 Kiniɔ ne kutsuɛ gɔ lofe fiɛ ɔrɛrɛ̃ ɔba ɔ̃ɔbo ne, Bosate kɔrɔ̃ ɔsia me iso, ne ɔbusi me kanya fiɛ ɔrɛrɛ̃ ɔba i wũ kɔrɛ ku kaya. Ne ɔso mabusi me kanya fiɛ loisilokanana.

23 Kere ne Bosate itɔ̃me ɔba me sɔ, 24 "Ɔturi awune ɔbi, maturi ma nsi i Israel karɔ̃ akpakpi ame to maɣɛ sɔ, ' Abraham ɔɖe ɔturi ɔwɛ̃ ɣɛɛ ɔwe karɔ̃. Ɣɛɛ bo ne bosi gbodzoo, gbaã ne maɔsu karɔ̃ matã bo lɛ bo kare.' 25 Ne ɔso ɣere ma sɔ, ' Bosate Wɔ Nsiguso sɔ: Misɛ miɖe sina dzɛ ima ɔkpese ipia i kame fiɛ misɛ misumu arapɔa ne misɛ miɖue maturi. Iyɔ ne minyɔ sɔ karɔ̃ si kaɖe mi kare? 26 Misɛ misiaiti i mi ipɛmi iso, misɛ mibara anyanyara fiɛ misɛ mirɛgu mi manyii mare. Iyɔ ne minyɔ sɔ karɔ̃ si kaɖe mi kare?'

27 "Ɣere ma nnɛgbe sɔ, ' Bosate Wɔ Nsiguso sɔ: Ayi kumɛgɔ lopia ngbã ne, mma lokuti i akpakpi simagɛ̃siare ame to maarɔ̃ i ipɛmi kanya. Mma i karɔ̃ ame ne nto loasu lotã mabɔi nyanyariã sɔ makɛkɛ fiɛ mma i ɔlekusɛkɔ̃ gu sikpolo ame to maakpi ala inyɛpɛ̃ ɔso. 28 Nto loabara karɔ̃ ɔkpese ikpakpi fiɛ loatuĩdza Israel iteso ɔle. Ne Israel abe aakpese ikpakpi sɔ kuwɛ̃ iibasɛ ɔri ɔki i wã iso. 29 Iyɔ ne mato maatsue sɔ Mme nɖe Bosate, si loɔbara karɔ̃ kakpese ikpakpi ala anyanyara ɔɖuɖu wa maɔbara.'

30 Ɣɛɛ fɔ, ɔturi awune ɔbi ne, fɔ kaɖemabi to maɖegu so ika i fɔ iso i abere kuruɛ gu i ayo akui kɔrɛ, mato maɣere so sɔ, 'Ba nɔ kanya ga loɔbɔrɛ i Bosate kɔrɛ kaba.' 31 Wũ maturi sɛ maba fɔ kɔrɛ, lɛ kumɛgɔ masɛ mabara, masɛ masɛ i fɔ anɔ makã fɔ atɔ̃me atsue. Ɣɛɛ maisɛ mabara i wã iso. Masɛ maɖeika lɛ masɛ maɖuɛ me ɣɛɛ ma situ siai sikã ibie siri lalaa. 32 Ɔnukuare ne, i ma kɔrɛ ne aire kuira iɖo ɔturi wɔ nsɛ ɔka kuɖuɛ aka ku silɔ mɛrɛ̃mɛrɛã gu ara isa kukaakɔ. Alasɔ masɛ manɔ fɔ atɔ̃me ɣɛɛ maisɛ mabara masia i wã iso.

33 "Si ara ɔɖuɖu wagbe sɛ aba i kame ne, - fiɛ gbaã ito iaba ne - iyɔ mato maatsue sɔ Ɣaa kanyaɖidze ɔwɛ̃ ɔɔwe i ma ndɛ̃."