1 Ne ɔrɛrɛ̃ ɔkɔ me ɔkɛlɛgu kato isɛ ikɛlɛ kuaruɛ inyamɔ ne ɔkɔ me ɔbɔ i kuyoi gɔ mpia i isɔrɛyo kasarɛkɔ̃ kanɔsɔ̃ gu i kuaruɛ ibere i katikpe ibaba. 2 Iyo nɛ kukui lonyɔ katikpe ɔkarã meta siru fiɛ ibɛ meta sinyɔ-iru. 3 Wã anyɔ ɔɖuɖu ɔwe i kasɛ ga loɖe meta iweo ibɔrɛ i kame inyamɔ gu i kasɛ ga mpia i kuaruɛ inyamɔ kanenekɔ̃ kanɔsɔ̃ abere to anyɔ abere i kusiakɔ̃ kutɛ iso. 4 I kuyoi katɔ̃ ne, kame ibodɛ̃ri wɔ lobɛ meta iru fiɛ ɔkarã meta siru ɔwe. Kuyoi akui to anyɔ katikpe. 5 Kiniɔ ne kakpagɛkɔ̃ kuyoi ɔnyɔ mɔmɔrĩ koɖo, alasɔ abodɛ̃ siri ɔfɔ kasɛkɔ̃ i wã kɔrɛ iɖo iyo kuyoi gɔ i karɔ̃isɛkɔ̃ gu ndɛndɛ̃ kuyoi karɔ̃isɛ. 6 Kuyoi gɔ i kasiakɔ̃ tɛare iiwe akpa, lɛ kusarɛkɔ̃ ɔwe. Ne ɔso kuse tɛmi i karɔ̃isɛ kumɔme kuɖo ngɔ i karɔ̃isɛkɔ̃ gu i ndɛndɛ̃ nrɔ̃isɛ. 7 Kuaruɛ ibere ɔwe gɔ isɛ ikpa ku kuyoi gu kuaruɛ kasarɛkɔ̃, ifere i kuyoi katɔ̃ itã meta sinyɔ-iru. 8 Gɔ i kuyoi gɔ i ɔkpɛ gɔ mpia kasɛ ga mmatã kuaruɛ kasarɛkɔ̃ ɔkarã meta sinyɔ-iru ne, ɔkpɛ wɔ mmatã i isɔrɛyo ɔɖo ɔkarã meta siru. 9 Kuyoi gɔ i karɔ̃isɛkɔ̃ ɔwe kabɔrɛnya i kuɣɛ̃kabɔrɛkɔ̃ isɛ si ɔturi ɔbɔrɛ i kuaruɛ kasarɛkɔ̃ ɔsɛ ɔbo i kɔ̃ ame.

10 I kagbalɔ ibaba gɔ isɛ to ikɛlɛ kuaruɛ kasarɛkɔ̃ ibere kukarãme isɛ ne, to isagu isɔrɛyo kasarɛkɔ̃ fiɛ ipia i kuaruɛ ibere kanɔsɔ̃ ne, kuyoi ɔwe 11 ku ibodɛ̃ri i wã katɔ̃. Kuyoi gɔgbe ɔse lɛ gɔ i katikpe. Kuwe kukarãme gu kubɛme kuwɛ̃ gu kubɔrɛnya gu kususume gɔ lore so. Lɛ kumɛgɔ i kubɔrɛnya gɔ i katikpe ɔse ne 12 kumɛɔ loɖe kuyoi gɔ i kagbalɔ kubɔrɛnya ne. Kukui ɔwe i abodɛ̃ri karɔ̃kasɛkɔ̃ wɔ nrɛ ɔkpa lɛ ne ibere nɛ nkpa kuɣɛ̃kabɔrɛkɔ̃ isɛ, nwɔ iso i ɔturi sɛ ɔsɛ ɔbo i kuyoi ame.

13 Kere ne ɔɣere me sɔ, "Katikpe gu kagbalɔ kuyoi gɔ nto kunyɔ isɔrɛyo kasarɛkɔ̃ nɖe masɔrɛdze kuyoi. Mmɔ i masɔrɛdze ma nsɛ masɛ Bosate anɔ to maaɖe asɔrɛ wa losekele aɖo. Mmɔ mato maasu asɔrɛ wa losekele aɖo masɛ - geɖebu asɔrɛ, ikpi asɔrɛ gu iɣɛrɛkuso asɔrɛ - ala kasɛkɔ̃ se sekelee ɔso. 14 Si masɔrɛdze ɔɔna mabo i kasekelekɔ̃ ne, maisibakɛlɛ kuaruɛ kasarɛkɔ̃ gbɔgbɔɔgbɔ maaɖi ma arapia wa masumu ala masɛ, alasɔ aɖe ara wagbe nse sekelee. Ikote sɔ maapia arapia mama fiɛ maakɛlɛ ngbegɔ nɖe maturi nsɛkɔ̃."

15 Ɔwi wɔ i ɔrɛrɛ̃ ɔ̃ɔro nnɛ mpia i isɔrɛyo kasɛkɔ̃ ɔsusu ne, ɔkɔ me ɔkigu ɔbɔrɛgu i kuɣɛ̃kabɔrɛkɔ̃ kayogodɔ̃, ne ɔsusu isɔrɛyo kasɛkɔ̃ ɔki ɔlɔ: 16 Ɔsusu kuɣɛ̃kabɔrɛkɔ̃ ibaba ku isusudziri, iɖe meta alafa anyɔ gu siru. 17 Ɔsusu katikpe ibaba ku isusudziri, iɖe meta alafa anyɔ gu siru. 18 Ɔsusu kagbalɔ ibaba ku isusudziri, iɖe meta alafa anyɔ gu siru. 19 Kere ne ɔfiriki ɔkɛlɛ kuɣɛ̃kabokɔ̃ ibaba, ne ɔsusu ku isusudziri, iɖe meta alafa anyɔ gu siru. 20 Ne ɔso ɔsusu ababa ana ɔɖuɖu kasɛkɔ̃. Iwe ibere iki ilɔ ne, ikarã meta alafa anyɔ gu siru fiɛ ibɛ meta alafa anyɔ gu siru. Ibere loɖi isekelea ise ibɔrɛgu i nnɛ kere kɔrɛ.