EZEKIEL 32

Ɔkpibiɛnɔ Itã Egipte Igarakpakpa

1 Iyi ɖeakatɔ̃ i kuwa kuweonyɔare i ikɔ iweonyɔare ame ne, Bosate itɔ̃me ɔba me sɔ, 2 "Ɔturi awune ɔbi, pia ɔkpibiɛnɔ nrɔɔ̃ ise i Egipte Igarakpakpa iso si aɣere wũ sɔ,

" 'Ase lɛ dzata i nɖebi ndɛ̃.

Ase lɛ bɔisiare i ɔpo ame

ato atere akiki i fɔ kuworei ame.

Ato aɣa ndu ku fɔ ngba

fiɛ ato alupura ndu ku iba.

3 " 'Nnɛgbe i Bosate Wɔ Nsiguso to ɔɣɛ ne:

" 'Nto loasa wũ asabu lofere-ɔ iso

maturi kposu to maabuai me.

Ne mato maakpadzɛ̃-ɔ i wũ asabu ame mabɔ ɔkpokpo.

4 Nto loafuĩdza-ɔ losɛ i karɔ̃ iso

ne loawɛrɛ̃-ɔ losɛ i karɔ̃ ga nfere kakpa iso.

Nto loatã ɔwiri ame kurodzai ɔɖuɖu ɔba kuasɛ i fɔ iso.

Ne karɔ̃ iso mabɔi ɔɖuɖu aarurui fɔ sina.

5 Nto loasamera fɔ sosina lofere i abe iso.

Ne loayira kugbolomi ku fɔ sosina kpia.

6 Nto loatã karɔ̃ ɔbu ku fɔ ima nɛ nto ibore

isɛ ikɛlɛ abe iso.

Ne kuwɛlagbolomi aayigu fɔ sosina.

7 Si lowɔra-ɔ loɖi ne, nto loakɔla kuɖokpo

ne loabara kɔ̃ awãmi guduu.

Nto loatã adɔdɔ ɔfu kuɣɛ̃ iso,

fiɛ ɔgbaleti iisibare.

8 Nto loabara sitɔ ifiɛ ɔɖuɖu

i kato guduu i fɔ iso.

Nto loabɔ idududu i fɔ karɔ̃ iso.

Bosate Wɔ Nsiguso nto ɔɣɛ ne.

9 Nto loaɖaa maturi gbodzoo situ

si lobɔ fɔ iwɔ i nɖebi ndɛ̃,

i nrɔ̃ mɛ aitsue ndɛ̃.

10 Nto loatã sitsue ɔbɔrɛ maturi gbodzoo i fɔ iso,

si losarã wũ ipɛmi i ma anɔ.

Ne ma magara to maati makpakpa ku ifɔ̃ ala fɔ ɔso.

I iyi nɛ akpase ne

ma ɔbiara to ɔ̃ati ɔkpakpa

i ma ngbã ɔwi ɔɖuɖu ame.

11 " 'Ala Bosate Wɔ Nsiguso sɔ,

" ' Babilon igara ipɛmi

to iaba iata iya-ɔ iso.

12 Nto loawɔra fɔ maturi gbodzoo

i makparɛrɛĩ apɛmi kanya -

mma nɖe matilese maɖo i nɖebi ɔɖuɖu ame.

Mato mabibiɛ Egipte iteso

ne mato maawuĩ ɔ̃ maturi gbodzoo i karɔ̃.

13 Nto loawɔra ɔ̃ ayomabɔi ɔɖuɖu

loɖi i ndu gbodzoo kuruɛ.

Maturi ngba iisibabo i ndu ame

ɣee mabɔi ngba iisibalupura ndu mɛmɔ ku iba.

14 Iyɔ nto loatã ɔ̃ ndu ɔse kpoo

fiɛ loatã ɔ̃ kuworei ɔbore lɛ nnɔĩ.

Bosate Wɔ Nsiguso loɣɛ.

15 Si lobara Egipte karɔ̃ ɔkpese ikpakpi ne,

loawɔra irabiara i kã ame.

Si loɖue mma ɔɖuɖu nsi i mmɔ ne,

iyɔ mato maatsue sɔ Mme nɖe Bosate.'

16 "Ɔkpibiɛnɔ wɔgbe mato maaka matã wũ ne. Nɖebi mabibirɔ̃gomi to maaka kɔ̃ matã wũ, itã Egipte gu ɔ̃ maturi ɔɖuɖu maaka kɔ̃ matã." Bosate Wɔ Nsiguso loɣɛ.

Egipte Ɔkpase Ɔbo i Iwo Ame

17 Iyi iweoruva i kuwa ɖeakatɔ̃ i ikɔ iweonyɔare ame ne, Bosate itɔ̃me ɔba me sɔ, 18 "Ɔturi awune ɔbi, biɛ kaku i Egipte maturi gu nɖebi siare mama mabibirɔ̃gomi iti. Alasɔ nto loasese ma i karɔ̃ kayirinɔ ku mma nsɛ makɛlɛ iwo ame. 19 Karɛ ma sɔ, 'Masɛ maɖuɛ-ɔ maɖo mamama? Kɛlɛ karɔ̃ ame si marara-ɔ i mma loitu sirɛrɛ̃ ndɛ̃.' 20 Mato maarɔ̃ marɛ i mma maɖue ku ipɛmi ndɛ̃. Maɔɖi ipɛmi mato, mitã makpadzɛ̃ wũ ku ɔ̃ maturi ɔɖuɖu makɛlɛgu. 21 Karɔ̃ ame i ikpibiɔ ame ne, matɔ̃ɖedze siare to maatofora Egipte gu ɔ̃ isomaturi ku aɣiãra maɣɛ sɔ, 'Maɔba i karɔ̃ ame, marɛ i mma loitu sirɛrɛ̃ fiɛ makpi i ipɛmi kanya ndɛ̃.'

22 "Asiria maturi gu ɔ̃ makpakpɛ̃dze ɔɖuɖu pia i mmɔ. Ɔ̃ maturi ɔɖuɖu ma maɖue, mma ɔɖuɖu lorɔ̃ i ipɛmi kanya akpibiɔ ɔki alɔ wũ. 23 Ma akpibiɔ pia i ikpibiɔ kawodorokɔ̃ ne ɔ̃ makpakpɛ̃dze rɛ maki malɔ ɔ̃ ikpibiɔ. Mma ɔɖuɖu loɔtã maturi ɔti makpakpa ku ifɔ̃ i magbanadze karɔ̃ iso, ɔɔrɔ̃ makpi i ipɛmi kanya.

24 "Elam pia i mmɔ, ɔ̃ maturi ɔɖuɖu ɔki malɔ ɔ̃ ikpibiɔ. Maɖue ma ɔɖuɖu, marɔ̃ i ipɛmi kanya. Mma ɔɖuɖu loɔtã maturi ɔti makpakpa ku ifɔ̃ i magbanadze karɔ̃ iso ɔɔkɛlɛ karɔ̃ ame gɔ maitu sirɛrɛ̃. Mapia i ma kunuarɛ ame ku mma nsɛ makɛlɛ ikpibiɔ ame. 25 Masɛ Elam karɛkɔ̃ i mma maɖue ndɛ̃, gɔ i ɔ̃ maturi ɔɖuɖu ɔki malɔ ɔ̃ ikpibiɔ. Ma ɔɖuɖu iitu sirɛrɛ̃, marɔ̃ i ipɛmi kanya. Ala maɔtã maturi ɔti makpakpa ku ifɔ̃, ifɔ magbanadze karɔ̃ iso ɔso, ne mapia i ma kunuarɛ gɔ igbã mpia i mma nsɛ makɛlɛ ikpibiɔ ame iso, marara ma i mma maɖue ndɛ̃.

26 "Mesek gu Tubal pia i mmɔ, ne ma maturi ɔɖuɖu ɔki malɔ ma akpibiɔ. Ma ɔɖuɖu ɖe mma loitu sirɛrɛ̃, ne maɖue ma ku ipɛmi alasɔ matã maturi biara ɔti makpakpa ku ɔwi wɔ mawe i magbanadze karɔ̃ iso. 27 Maibiara ma ku kuwarɛ lɛ ma loitu sirɛrɛ̃ maturi ma lofɔ iyere. Mma loɔkɛlɛ ikpibiɔ ame ku ma akpakpɛ̃ra - ma akpirafɔra sia i ma kuturidziri iso fiɛ ma apɛmi pia i ma ati kayirinɔ. Ma aɣɛrɛ sia i ma akui iso, atoasɔ mmagbe ɔfɔ iyere ne, matã ɔturi biara ɔti ɔkpakpa gɔ mawe i magbanadze karɔ̃ iso. 28 "Fɔ wũ, O Egipte Igarakpakpa, ato aafɛ̃ fiɛ aarɛ i mma loitu sirɛrɛ̃ ndɛ̃, ku mma lorɔ̃ i ipɛmi kanya.

29 "Edom pia i mmɔ, ɔ̃ magara gu ɔ̃ matɔ̃ɖedze ɔɖuɖu ne, maɔrara ma ku mma lorɔ̃ i ipɛmi kanya atoasɔ mawe ɔle. Marɛ ku mma loitu sirɛrɛ̃ ku mma nsɛ makɛlɛ ikpibiɔ ame.

30 "Katikpe matɔ̃ɖedze ɔɖuɖu gu ma Sidonse pia i mmɔ. Atoasɔ ma ɔle ɔtã maturi ɔti makpakpa ne, ka makpagu mma maɖue i kunuarɛ ame. Marɛ gɔ maitu sirɛrɛ̃ ku mma lorɔ̃ i ipɛmi kanya fiɛ mapia i kunuarɛ ame ku mma nsɛ makɛlɛ ikpibiɔ ame.

31 "Egipte Igarakpakpa - ma gu ɔ̃ makpakpɛ̃dze ɔɖuɖu - to maanya ma ne ɔ̃ maturi ma maɖue ku ipɛmi to maatã wũ ndzo. Bosate Wɔ Nsiguso loɣɛ. 32 Bosate Wɔ Nsiguso loɣɛ sɔ: Atoasɔ lotã ɔtã maturi ɔti makpakpa i magbanadze karɔ̃ iso ne, Igarakpakpa gu ɔ̃ maturi ɔɖuɖu to maarɛ i mma loitu sirɛrɛ̃ ndɛ̃, ku mma maɖue ku ipɛmi."