1 "Israel kumele i ayere kanya i ngbe ne: Dan kamele kasɛ to kaawe i karɔ̃ i katikpe isɛ kume iso, kume ɔsiai i Xetlon ɔri iso ikɛlɛ Lebo Xamat, Xazar Enan gu Damasko katikpe kume isiai i Xamat to iaɖe ne kume kasɛ ita i kuɣɛ̃kabɔrɛkɔ̃ kasɛ ikɛlɛ kuɣɛ̃kabokɔ̃ kasɛ.

2 "Aser aana karɔ̃ kasɛ kawɛ̃; kaase kume ku Dan kamele kare ita i kuɣɛ̃kabɔrɛkɔ̃ ikɛlɛ kuɣɛ̃kabokɔ̃.

3 "Kasɛ kawɛ̃ aaɖe Naftali ɔkpɛ; ito iase kume ku Aser kamele kare ita i kuɣɛ̃kabɔrɛkɔ̃ ikɛlɛ kuɣɛ̃kabokɔ̃.

4 "Manase aawe kasɛ kawɛ̃. Ito iase kume ku Naftali kamele ibuiti ita i kuɣɛ̃kabɔrɛkɔ̃ ikɛlɛ kuɣɛ̃kabokɔ̃.

5 "Efrayim to ɔ̃awe karɔ̃ kasɛ kawɛ̃; kaase kume ku Manase kamele ita i kuɣɛ̃kabɔrɛkɔ̃ ikɛlɛ kuɣɛ̃kabokɔ̃.

6 "Ruben to ɔ̃awe karɔ̃ kasɛ kawɛ̃. Ito iase kume ku Efrayim kamele ita i kuɣɛ̃kabɔrɛkɔ̃ ikɛlɛ kuɣɛ̃kabokɔ̃.

7 "Yuda to ɔ̃awe karɔ̃ kasɛ kawɛ̃. Kato kaase kume ku Ruben kare ita i kuɣɛ̃kabɔrɛkɔ̃ ikɛlɛ kuɣɛ̃kabokɔ̃.

8 "Karɔ̃ ga nse kume ku Yuda ne, kaaɖe kasɛ ga maasu matã lɛ karatã igbaɔ. Ito iabɛ meta kukpi kuweo kunyɔ gu alafa-aru (12,500) fiɛ kã kukarãme ita i kuɣɛ̃kabɔrɛkɔ̃ ikɛlɛ kuɣɛ̃kabokɔ̃ aakategu kamele kawɛ̃ ɔkpɛ. Isɔrɛyo to iawe i kã ndɛndɛ̃.

9 "Karɔ̃ igbaɔ nɛ maasu matã Bosate aakarã meta kukpi kuweo-kunyɔ gu alafa-aru (12,500) kabɛ meta kukpi kuru (5000). 10 Nnɛgbe loaɖe kasɛ sekelea katã masɔrɛdze. Kato kaakarã meta kukpi kuweo-kunyɔ gu alafa-aru (12,500) i katikpe kasɛ fiɛ kaabɛ meta kukpi kuru (5000) i kuɣɛ̃kabokɔ̃ isɛ meta kukpi kuru (5000) i kuɣɛ̃kabɔrɛkɔ̃ fiɛ ikarã meta kukpi kuweo-kunyɔ gu alafa-aru (12,500) i kagbalɔ kasɛ. Bosate isɔrɛyo aawe i kã ndɛndɛ̃. 11 Nnɛgbe to iaɖe masɔrɛdze ma masekelera, ma Zadokse, ma loɖe ɔnukuare masumu me fiɛ maisɛnɛkɛ̃ lɛ kumɛgɔ i ma Levise ɔbara ku ɔwi wɔ i Israel ɔyu ɔri. 12 Ito iaɖe karatã igbaɔ ga maɖi ise mabɔrɛgu i karɔ̃ kasɛ sekelea ame itã ma, kasɛ ga losekele kaɖo, kase kume ku ma Levise ibuiti. 13 "I kasɛ ga nɖe masɔrɛdze ibuiti ne, ma Levise to maafɔ kasɛ i ma kɔrɛ kaakarã meta kukpi kuweo-kunyɔ gu alafa-aru (12,500) kabɛ meta kukpi kuru (5000). Kã kukarãme ɔɖuɖu aaɖe meta kukpi kuweo-kunyɔ gu alafa-aru (12,500) fiɛ kã kubɛme to kuaɖe meta kukpi kuru (5000). 14 Iikote sɔ maarɔdɛ̃ ɣee manyuarã kã kasɛ kukawɛ̃. Kã nɖe kasɛɛ kaɖo i karɔ̃ ame fiɛ kuwɛ̃ iibafirikira kã kabo i nrɔɔ̃ mama ame, alasɔ kase sekelee katã Bosate.

15 "Kasɛ ga lokuti kakarã meta kukpi kunyɔ gu alafa-aru (2,500) fiɛ kabɛ meta kukpi kunyɔ gu alafa aru aaɖe ngbegɔ i ɔmagɛ̃siare abara ne iso karabara matsue ayo gu mabɔi sikuakaɖekɔ̃. Ɔmagɛ̃siare to ɔ̃awe i kã ndɛndɛ̃ 16 fiɛ kaakarã meta kukpi kunyɔ gu alafa anyɔ-siru (2,250) i katikpe isɛ, kagbalɔ kukpi kunyɔ gu alafa anyɔ-siru (2,250) kuɣɛ̃kabɔrɛkɔ̃ kukpi kunyɔ gu alafa anyɔ-siru (2,250) kuɣɛ̃kabokɔ̃ kukpi kunyɔ gu alafa anyɔ-siru (2,250). 17 Ɔmagɛ̃siare mabɔi sikuakaɖekɔ̃ aabɛ meta kulafa kuwɛ̃ gu sinyɔ-iru i katikpe gu meta kulafa kuwɛ̃ gu sinyɔ-iru i kagbalɔ, meta kulafa kuwɛ̃ gu sinyɔ-iru i kuɣɛ̃kabɔrɛkɔ̃, meta kulafa kuwɛ̃ gu sinyɔ-iru i kuɣɛ̃kabokɔ̃ isɛ. 18 Karɔ̃ ga lokuti kase kume ku kasɛ sekelea fiɛ karɛ i kã kukarãme ne, kaaɖe meta kukpi kuru i kuɣɛ̃kabɔrɛkɔ̃ fiɛ meta kukpi kuru i kuɣɛ̃kabokɔ̃ kasɛ. Kã iso maakpɛ̃ ɔraɖui wɔ loatã marabaradze araɖea i ɔmagɛ̃siare ame. 19 Marabaradze ma loabɔrɛ i ɔmagɛ̃siare ame maakpɛ̃ kã ne maabɔrɛ i Israel kumele ɔɖuɖu ame. 20 Karɔ̃ kasɛ ɔɖuɖu aaɖe meta kukpi kuweo- kunyɔ gu alafa-aru i kasɛ biara. Lɛ karatã igbaɔ ne, maaɖi kasɛ sekelea ise, kawegu kasɛ ga nɖe ɔmagɛ̃siare ɔkpɛ.

21 "Karɔ̃ ga lokuti i kasɛ sekelea ababa anyɔ gu ɔmagɛ̃siare kasɛ to kaaɖe ɔɖeisoi kasɛ. Kato kaakɛlɛ kuɣɛ̃kabɔrɛkɔ̃ isɛ meta kukpi kuweo-kunyɔ gu alafa anyɔ siru (12,250) ita i kasɛ sekelea iso ikɛlɛ kuɣɛ̃kabɔrɛkɔ̃ kume iso, gu meta kukpi kuweo-kunyɔ gu alafa anyɔ-siru (12,250) ito ikɛlɛ kuɣɛ̃kabokɔ̃ isɛ ibo kuɣɛ̃kabokɔ̃ kume iso. Abodɛ̃ anyɔ wagbe rɛ i kumele kasɛ kukarãme to iaɖe ɔɖeisoi kasɛ, ne kasɛ sekelea gu isɔrɛyo aawe i wã ndɛndɛ̃. 22 Ne ɔso ma Levise karana gu ɔmagɛ̃siare kare to kaarɛ i kasɛ ga nɖe ɔɖeisoi kare ndɛndɛ̃. Kasɛ ga nɖe ɔɖeisoi kare to kaarɛ i Yuda kume gu Benyamin kume ndɛ̃.

23 "Kumele tsɔra ɣɛɛ ne: Benyamin to ɔ̃awe kasɛ kawɛ̃; kato kaata i kuɣɛ̃kabɔrɛkɔ̃ isɛ kafe kuɣɛ̃kabokɔ̃ isɛ.

24 "Simeon to ɔ̃awe kasɛ kawɛ̃; kato kaase kume ku Benyamin kare ita i kuɣɛ̃kabɔrɛkɔ̃ ikɛlɛ kuɣɛ̃kabokɔ̃.

25 "Isakar to ɔ̃awe kasɛ kawɛ̃. Kato kaase kume ku Simeon kare ita i kuɣɛ̃kabɔrɛkɔ̃ ikɛlɛ kuɣɛ̃kabokɔ̃.

26 "Zebulon to ɔ̃awe kasɛ kawɛ̃. Kato kaase kume ku Isakar kare ita i kuɣɛ̃kabɔrɛkɔ̃ ikɛlɛ kuɣɛ̃kabokɔ̃.

27 "Gad kamele to kaawe kasɛ kawɛ̃. Kaase kume ku Zebulon kamele ita i kuɣɛ̃kabɔrɛkɔ̃ ikɛlɛ kuɣɛ̃kabokɔ̃.

28 "Gad kamele kagbalɔ kaɖekɔ̃ kume to kuata i Tamar ikɛlɛ Meriba Kades ndu kɔrɛ i kagbalɔ, isɛ Egipte kagbolomi ame ikɛlɛ Mediterania Ɔpo iso.

29 Nnɛgbe nɖe karɔ̃ ga aaɣɛ atã Israel kumele lɛ kaɖekɔ̃ ne, fiɛ nwagbe loaɖe ma kusɛ ne," Bosate Wɔ Nsiguso loɣɛ.

30 "Nwagbe loaɖe ɔmagɛ̃siare kuyogodɔ̃ gɔ ame maabɔrɛ i ɔmagɛ̃ ame ne: Isɛkarɔ̃ i katikpe isɛ nɛ lokarã meta kukpi kunyɔ gu alafa anyɔ-siru (2,250), 31 ɔmagɛ̃siare kuyogodɔ̃ ne maasia kɔ̃ Israel kumele iweo-inyɔ ayere. Kuyogodɔ̃ kutɛ gɔ i katikpe aaɖe Ruben kayogodɔ̃, Yuda kayogodɔ̃ gu Levi kayogodɔ̃.

32 "Kuyogodɔ̃ kutɛ gɔ i kuɣɛ̃kabɔrɛkɔ̃ isɛ nɛ lokarã meta kukpi kunyɔ gu alafa anyɔ-siru, aaɖe: Yosef kayogodɔ̃, Benyamin kayogodɔ̃ gu Dan kayogodɔ̃.

33 "Kuyogodɔ̃ kutɛ gɔ i kagbalɔ isɛ nɛ lokarã meta kukpi kunyɔ gu alafa anyɔ-siru, aaɖe: Simeon kayogodɔ̃, Isakar kayogodɔ̃ gu Zebulon kayogodɔ̃.

34 "Kuyogodɔ̃ kutɛ i kuɣɛ̃kabokɔ̃ isɛ nɛ lokarã meta kukpi kunyɔ gu alafa anyɔ-siru, aaɖe: Gad kayogodɔ̃, Aser kayogodɔ̃ gu Naftali kayogodɔ̃.

35 "Igu ne loki ilɔ pelepele aaɖe meta kukpi kaiwɛ̃.

"Ne ɔmagɛ̃siare iyere ita i ɔwi wɔmɔ iso to iaɖe:

BOSATE PIA I MMƆ."