EZEKIEL 41

1 Ne ɔrɛrɛ̃ ɔkɔ me ɔbogu i isɔrɛyo iyo mɔmɔ ame. Ne ɔrɛrɛ̃ ɔsusu ndɛ̃ abere wa nɣɛ i kukui kabɔrɛnya ababa anyɔ. Wã ibiara kubɛme i ababa anyɔ ɔɖe meta itɛ, itɛ. 2 Kabɔrɛnya ɔbɛ meta iru, ne abere wa nɣɛ ne ababa ɔtiri meta inyɔ gu kaku. Ɔsusu isɔrɛyo mɔmɔ ana, ikarã meta sinyɔ fiɛ ibɛ meta iweo.

3 Kere ne ɔkɛlɛ kame iyo i isɔrɛyo ame ne ɔsusu ndɛ̃ abere wa nɣɛ i kabɔrɛnya, ibiara ɔbɛ meta ɔwɛ̃. Kabɔrɛnya ɔbɛ meta itɛ. Ne kabɔrɛnya abere wa nɣɛ i ne ibaba biara ɔtiri meta itɛ gu kaku. 4 Ne ka ɔsusu isɔrɛyo kame ife isɔrɛyo mɔmɔ kawirikɔ̃, ne kukarãme ɔɖe meta iweo, ne kubɛme ɔɖe meta iweo. Ɔɣere me sɔ, "Ngbe nɖe Kasekelekɔ̃ Ame Kasekelekɔ̃."

Ayo Wa Matsue i Isɔrɛyo Abere Iso

5 Kere ne ka ɔsusu isɔrɛyo ibere, itiri meta itɛ, isɔrɛyo kuyoi gɔ loki kulɔ ababa ibiara ɔbɛ meta inyɔ. 6 Isɔrɛyo kuyoi gɔ i ababa ne awe i itsueisia atɛ ame, iwɛ̃ ɔsia imama kato, kuyoi sitɛ ɔwe i itsueisia biara ame. Matsue kuberei mamatã i isɔrɛyo ibere mɔmɔ iso maki malɔ ne, si iɖe ipuarã itã ababa kuyoi. Ise ngbɔ si ipuarã kuberei iibabo i isɔrɛyo ibere mɔmɔ ame. 7 Ababa isɔrɛyo kuyoi itsueisia sɛ ibɛ ibua ita i itsueisia ɖeakatɔ̃ iso ikɛlɛ imama iso. Nwa matsue maki malɔ isɔrɛyo ne, matsue wã maya kato ku ne ngbegɔ isia, sɔ kuyoi ɔbɛ kubua ku ngbegɔ kusia gɔ ame ɔturi to ɔya ɔkɛlɛ kato. Asɛtiĩ ɔri ɔya ɔbɔrɛ i karɔ̃isɛkɔ̃ karɔ̃ ikɛlɛ kato karɔ̃ iki i ndɛndɛ̃ karɔ̃ iso.

8 Lonya sɔ isɔrɛyo ɔwe karɔ̃isɛ ipuarã nɛ makpagɛra maki malɔ iyo, ne iɖe ababa kuyoi ɔkaĩ, iɖe isusudziri kukarãme, meta itɛ. 9 Ababa kuaruɛ ibere ɔtiri meta inyɔ gu kaku. Ngbegɔ manyua masɛ i ababa isɔrɛyo kuyoi ndɛ̃ 10 gu masɔrɛdze kuyoi ɔbɛ meta iweo iki ilɔ isɔrɛyo ɔɖuɖu. 11 Kubɔrɛnya ɔwe i ababa kuyoi iso, ita i ngbegɔ manyua masɛ, kawɛ̃ ɔwe i katikpe fiɛ kamama ɔwe i kagbalɔ. Ne karɔ̃isɛ ga makpagɛra isagu ngbegɔ manyua masɛ ɔbɛ meta inyɔ gu kaku iki ilɔ isɔrɛyo.

Iyo Nɛ i Kuɣɛ̃kabokɔ̃

12 Iyo nɛ nto inyɔ isɔrɛyo kasarɛkɔ̃ i kuɣɛ̃kabokɔ̃ ibaba ɔbɛ meta sitɛ-iru. Iyo nɛmɔ ibere ɔtiri meta inyɔ gu kaku fiɛ ne kukarãme ɔɖe meta sina-iru iki ilɔ.

13 Kere ne ɔsusu isɔrɛyo, ikarã meta siru, ne isɔrɛyo kasarɛkɔ̃ gu iyo ku ne abere ana ɔkarã meta siru. 14 Isɔrɛyo kasarɛkɔ̃ ga i kuɣɛ̃kabɔrɛkɔ̃ isu ibua i isɔrɛyo katɔ̃ ɔbɛ meta siru.

15 Kere ne ɔsusu iyo nɛ nto inyɔ kasarɛkɔ̃ i isɔrɛyo kama, isu ibua ne abodɛ̃ i ababa anyɔ iso, ikarã meta siru.

Isɔrɛyo mɔmɔ, kame iyo gu pato wɔ nto ɔnyɔ kasarɛkɔ̃ 16 gu kubokɔ̃ gu mafesere mɔmɔriã gu wã atɛ aki alɔ ne,- irabiara nɛ lofe gu ibua i kabokɔ̃ ne mafu kukolo iso. Karɔ̃isɛ, ibere ibo mafesere gu mafesere ne mafu wã ara. 17 I kabɔrɛnya igbado nɛ i inyamɔ kato, ikɛlɛ kame isɔrɛyo gu abere wa i igu iwɛ̃ pia i wã ɔɖuɖu ndɛ̃ ɔki alɔ kame ame gu isɔrɛyo mɔmɔ. 18 Ne mata makerubi gu abɛrɛdziri masia iso. Abɛrɛdziri gu makerubi ɔnyuarã so. Kerubi biara ɔwe ntɔ̃ minyɔ: 19 ɔturi awune katɔ̃ ɔnyɔ kubɛrɛ isɛ i ibaba iwɛ̃ ne dzata katɔ̃ ɔnyɔ kubɛrɛ isɛ i ibaba mama iso. Mata wã masia i isɔrɛyo ɔɖuɖu iso maki malɔ. 20 Ita i karɔ̃isɛ ikɛlɛ ngbegɔ mpia i kabɔrɛnya kato ne, mata makerubi gu abɛrɛdziri masia i isɔrɛyo mɔmɔ ibere iso.

21 Isɔrɛyo mɔmɔ ɔwe kukui faramdziri wɔ lowe ababa ana gɔ anyɔ ɔkarã aɖo amama, fiɛ nwɔ i Kasekelekɔ̃ Ame Kasekelekɔ̃ ɔse lɛ ɔɖeakatɔ̃. 22 Isɔrɛkasege ga masu kukolo mabara ɔwe gɔ kakɔlɛ meta ɔwɛ̃ gu kaku, kakarã meta ɔwɛ̃, ne kabɛ meta ɔwɛ̃. Masu kukolo mabara kã siɣokã, karɔ̃isɛ gu kã ababa. Ɔrɛrɛ̃ ɔɣere me sɔ, "Nya ɔpɔrɔ̃ wɔ masɛ i Bosate anɔ ngbe ne." 23 Isɔrɛyo mɔmɔ gu Kasekelekɔ̃ Ame Kasekelekɔ̃ ɔwe akui wa masɛ mabusi ababa anyɔ. 24 Kukui biara ɔwe asɛ anyɔ - asɛ anyɔ wa mamɔɛ̃ ku ɔbɔi itã kukui biara. 25 Ne mata makerubi gu abɛrɛdziri masia i isɔrɛyo mɔmɔ akui iso lɛ nwa mata masia i abere iso. Ne masu kakolo mabara gɔ isa i pato katɔ̃. 26 I pato ababa abere iso ne mafesere mɔmɔriã ɔwe gɔ mawe abɛrɛdziri masia ibaba biara iso. Isɔrɛyo ababa kuyoi ana ɔwe kukolo gɔ masa i kɔ̃ kato.