1 Bosate ɔsese me kanya mama sɔ, 2 "Ɔturi awune ɔbi, su fɔ anɔ nyɔ Israel abe isɛ; si aɖikanya ata aya i wã iso 3 si aɣɛ sɔ, 'O Israel abe, minɔ Bosate Wɔ Nsiguso itɔ̃me. Bosate Wɔ Nsiguso to ɔɣere abe gu abemi, kuwɛlagbolomi gu kugbolomi sɔ: Ka nto loba loakpadzɛ̃ ipɛmi losia i mi iso fiɛ loawɔra mi kusɔrɛkɔ̃. 4 Mato mabibiɛ mi isɔrɛkusege fiɛ maakɔtɛ mi kuakɔrɔ̃kɔrɔã isɔrɛkusege, fiɛ loaɖue mi maturi i mi arapɔa katɔ̃. 5 Loto loarara Israel makpise kuturidziri i ma arapɔa katɔ̃. Ne loasamera mi akui lofere loki lolɔ mi isɔrɛkusege. 6 Mato maawɔra mi simagɛ̃ dzɛ i kakɔi karere ga misi fiɛ maawɔra kusɔrɛkɔ̃. Mato maawɔra mi isɔrɛkusege, maakɔtɛ mi arapɔa mawɔra wã fiɛ maabibiɛ mi isɔrɛkusege mafere i karɔ̃. Ne mato maawɔra ara wa mibara maɖi pelepele. 7 Mato maaɖue mi maturi mafere i karɔ̃ iso. Iyɔ mito miatsue sɔ Mme nɖe Bosate.

8 " 'Ɣɛɛ nto lonyua mawɛ̃, ala mi mawɛ̃ to maatere i ipɛmi kanya si maɔsamera mi mapia i nrɔ̃ gu i nɖebi ndɛ̃. 9 Iyɔ i nɖebi mɛ ame maakɛlɛgu ma lɛ mafɔrɔĩ ne, mma lorui matere to maanyigi me. Mato maanyigi kumɛgɔ ibo me so, ala ma ɔtu wɔ loiki i ɔri ɔwɛ̃ iso fiɛ mapɛ mafiriki i wũ kɔrɛ, fiɛ ku ma anɔmi ne mawe ɔrakolo matã ma arapɔa. Mato maatsiri ma mɔmɔ so ala iranyanyariã nɛ maɔbara gu ma anyanya kubarara ɔɖuɖu ɔso. 10 Ne mato maatsue sɔ Mme nɖe Bosate, loifura sɔ loakpadzɛ̃ kukpakpi gɔgbe lobɔ i ma iso siefe.

11 " ' Bosate Wɔ Nsiguso sɔ: Pɛ arɔ̃kpasa si atutuĩ fɔ ngba i karɔ̃ si abiɛ ku kulu "Ndzo mitã mi!" ala Israel kaɖe ɔtile gu anyanya kubarara iti. Ala mato maarɔ̃ kakpã i ipɛmi kanya, kukãsiare gu i inyɛpɛ̃ nrɔɔ̃ ame ɔso. 12 Nwɔ i kadzorokɔ̃ to ɔ̃akpi ala inyɛpɛ̃ iti, ne nwɔ i kakotekɔ̃ to ɔ̃arɔ̃ i ipɛmi kanya. Nwɔ lona ngbã fiɛ manyua wũ ne ɔto ɔ̃akpi ala kukãsiare iti. Ne ɔso ngbɔ nto loaɖi wũ sikpã teterea losia i ma iso ne. 13 Ne mato maatsue sɔ Mme nɖe Bosate, si ma maturi ɔkpi marɛ i ma arapɔa ndɛ̃ maki malɔ wã isɔrɛkusege, gu i kabemi biara gu abe atititɛ̃ ɔɖuɖu iso, kudziri siare ku akpai biara kayirinɔ gu oɖum siare ku ayata kɔrɛ - nkɔi mɛ masɔrɛ kuakɔrɔ̃kɔrɔã matã ma arapɔa ɔɖuɖu. 14 Ne loaɖi wũ kɔrɔ̃ losia i ma iso fiɛ loatã karɔ̃ ɔkpese ikpakpi ita i fafuĩ ame ikɛlɛ Dibla - kakɔi karere ga masi. Iyɔ mato maatsue sɔ Mme nɖe Bosate.' "