1 Kere ne ɔrɛrɛ̃ ɔkɔ me ɔbɔ i kayogodɔ̃ ga nto kanyɔ kuɣɛ̃kabɔrɛkɔ̃. 2 Ne lonya Israel Ɣaa ikpawaĩ ɔbɔrɛ i kuɣɛ̃kabɔrɛkɔ̃ ito iba. Ɔ̃ silɔ ɔse lɛ ndu mɛ ntere silɔ, ne karɔ̃ to kafiɛ ku ɔ̃ ikpawaĩ. 3 Kaɖikate ga lonya ɔse lɛ kaɖikate ga loɔnya ku ɔwi wɔ ɔba ɔ̃ɔwɔra ɔmagɛ̃siare awe gu lɛ kuɖikute gɔ loɔnya i Kebar Ɔwore kɔrɛ. Ne lokɔlɛ anɔ lofu i karɔ̃. 4 Bosate ikpawaĩ ɔki i kayogodɔ̃ ga nto kanyɔ kuɣɛ̃kabɔrɛkɔ̃ ɔbo i isɔrɛyo ame. 5 Kere ne Siwarã ɔkɔlɛ me kato ne sikɔ me sibogu i kame kasarɛkɔ̃, ne Bosate ikpawaĩ ɔyi i isɔrɛyo ame.

6 Gɔ ame i ɔrɛrɛ̃ ɣɛ i wũ kɔrɛ ne, lonɔ ɔturi ɔwɛ̃ to ɔɖe me ika ɔbɔrɛgu i isɔrɛyo ame. 7 Ɔɣɛ sɔ, "Ɔturi awune ɔbi, ngbe nɖe wũ sigaraiyara kasɛkɔ̃ gu wũ ngbatata kasiakɔ̃ ne. Ngbe nto loawe i Israel mabi ndɛ̃ ɔwi daaro. Israel kaɖe iisibapukutura wũ iyere kuiyikuiyi ana. Maturi mɔmɔ oo, ma magara oo iisibabara asɔrɔ̃ra ku ma arapɔa i magara kpia kuseme i ma kusɔrɛkɔ̃ mapukutura me. 8 Gɔ masu ma arapɔa masɛ i wũ ire kanya, masu ma akuidziri masɛ i wũ ire kuruɛ, ne itã sɔ ibere kere loɣɛ bo gu ma ndɛ̃. Mapukutura wũ iyere sekelea ku ma anyanya kubarara. Ne ɔso lowɔra ma i wũ sikpã ame. 9 Kiniɔ ne tã maɖi ma asɔrɔĩɖe gu ma arapɔa i magara kpia kuseme i wũ iso, si loawe i ma ndɛ̃ ɔwi daaro.

10 "Ɔturi awune ɔbi, ɣere Israel maturi kumɛgɔ i isɔrɛyo se, si maakpɛ̃ kunuarɛ i ma akpi iti. Tã manyɔ ne ɔriita, 11 si kunuarɛ ɔkpɛ̃ ma ala ara ɔɖuɖu wa maɔbara iti ne, tã matsue isɔrɛyo ɔriita - gɔ masɛ ne ara, ne kubɔrɛkɔ̃ gu kubɔrɛnya - ne ɔriita ɔɖuɖu gu ne asɛra ɔɖuɖu gu mmara. Tsɛrɛ ara wagbe sɛ i ma anɔ, sɔ si maaɖe ɔnukuare i ne ɔriita ame fiɛ maasiai ne asɛra ɔɖuɖu.

12 "Isɔrɛyo mmara i ngbe ne: Ngɔi ɔɖuɖu mɛ loki milɔ kasɛkɔ̃ ga i kube kato to iase sekelee iɖo gbaã. Kumɛɔ nɖe mmara i Isɔrɛyo iso ne.

13 "Nwagbe nɖe isɔrɛkasege kususume i meta kukarãme, meta kaku ɖe meta kaku. Ne iwo nɛ maɖi maki malɔ ne ɔwodoro meta kaku fiɛ ibɛ meta kaku, ku sitsueti kukikulɔ lɛ sentimeta sinyɔ-inyɔ. Nnɛgbe nɖe isɔrɛkasege kukɔlɛme: 14 Ita i iwo i karɔ̃ iba kã karɔ̃isɛkɔ̃ ne, ikɔlɛ meta ɔwɛ̃ fiɛ ibɛ meta kaku. Ita ne katɛmikɔ̃ ikɛlɛ kamɔkɔ̃ ikɔlɛ meta inyɔ fiɛ ibɛ meta kaku. 15 Isɔrɛkasege ɔtɔkapiakɔ̃ ɔkɔlɛ meta inyɔ ne asa ana ɔbɔrɛ aɣɛ ikɛlɛ kato i ɔtɔkapiakɔ̃. 16 Isɔrɛkasege ɔtɔkapiakɔ̃ ɔkate i kukarãme gu i kubɛme ame, ikarã meta ikuɔ ne ibɛ meta ikuɔ. 17 Kakpagɛkɔ̃ isɛ ana ɔkate i kukarãme gu i kubɛme ame, kaɖe meta ikɔdzɛ i kukarãme fiɛ kabɛ ngbɔ ame, ku sitsueti giligilia sentimeta sinyɔ-iru gu iwo meta kaku ɔki ilɔ kã. Isɔrɛkasege asɛtiĩ si anyɔ kuɣɛ̃kabɔrɛkɔ̃ isɛ."

18 Kere ne ɔɣere me sɔ, "Ɔturi awune ɔbi, Bosate Wɔ Nsiguso sɔ: Nnɛgbe loaɖe asɛra itã araifɛ̃ asɔrɛ gu ima iwɛwɛ̃ i isɔrɛkasege iso si maɔtsue kã. 19 Ato aasu nantsuĩ poroporoi atã masɔrɛdze, ma nɖe ma Levise, i Zadok iyomaturi ma nsɛ mabore mabo masumu i wũ anɔ, masɔrɛ ikpi isɔrɛ, Bosate Wɔ Nsiguso loɣɛ. 20 Ikote sɔ aasu ne ima iwɛ̃ apie i isɔrɛkasege asa ana iso gu i kakpagɛkɔ̃ isɛ siɣokã ina gu sitsueti giligilia ɔɖuɖu iso si asu asekelera isɔrɛkasege si abara ikpikusoisɔrɛ atã kã. 21 Ilɛ sɔ aasu nantsuĩrɛrɛ̃ itã ikpi isɔrɛ atsuedza i isɔrɛyo kasɛkɔ̃ i kasekelekɔ̃ kuaruɛ i kakɔi ga masɛ matã ne.

22 "Iyi nyɔare iso ne, su katikpɛĩ ga loyi abara ikpi isɔrɛ. Ikote sɔ maasekelera isɔrɛkasege lɛ kumɛgɔ masekelera kã ku nantsuĩrɛrɛ̃ ima awe. 23 Si ɔɔsekelera kã aro ne, ilɛ sɔ aasɔrɛ nantsuĩ poroporoi wɔ loyi gu si aɖi ikpalasa nɛ loyi abɔrɛgu i masɛrɛrerɔ̃ ikuri ame asɔrɛ. 24 Ilɛ sɔ aasɔrɛ ma i Bosate anɔ, ne masɔrɛdze aawɛwɛ̃ mma i ma iso fiɛ maasɔrɛ ma lɛ araifɛ̃ isɔrɛ matã Bosate.

25 " Iyi biara itã ayi akɔdzɛ ne, ilɛ sɔ ato aatã katikpɛĩ itã ikpi isɔrɛ. Ana ne ikote sɔ aatã nantsuĩ poroporoi wɔ loyi gu ikpalasa nɛ loyi abɔrɛgu i masɛrɛrerɔ̃ ikuri ame. 26 Ayi akɔdzɛ ilɛ sɔ maabara ikpikusoisɔrɛ matã isɔrɛkasege, maasekelera kã iyɔ maɔɖi kã masɛ ise. 27 Ayi wagbe kawirikɔ̃ ne, ita i iyi fainafainava iso ne, masɔrɛdze aabara araifɛ̃ asɔrɛ gu isobuɛ asɔrɛ i isɔrɛkasege iso. Iyɔ nto loafɔ mi lopia, Bosate Wɔ Nsiguso loɣɛ."