1 " 'Si miɣɛ karɔ̃ lɛ kaɖekɔ̃ ne, ilɛ sɔ miaɖi karɔ̃ kasɛ kawɛ̃ lɛ ibuiti sekelea mitã Bosate. Ito iakarã meta kukpi kuweo-kunyɔ gu alafa-aru (12,500) fiɛ iabɛ meta kukpi kuweo (10,000). Karɔ̃ kakɔi gamɔ ɔɖuɖu aase sekelee. 2 I kã ame ne, maaɖi kakɔi ga lokarã meta alafa anyɔ-siru (250) fiɛ ibɛ meta alafa anyɔ-siru (250) itã isɔrɛyo. Maanyua kakɔi ga loabɛ meta sinyɔ-iru maki malɔ ne masɛ. 3 I ibuiti sekelea ame ne maasusu kakɔi ga lokarã meta kukpi kuweo-kunyɔ gu alafa-aru (12,500) fiɛ kabɛ meta kukpi kuru (5,000) maɖi i kã ame. Kã ame i isɔrɛyo aawe, itã Kasekelekɔ̃ Ame Kasekelekɔ̃. 4 Ito iaɖe karɔ̃ kakɔi sekelea itã masɔrɛdze, mma nsɛ masumu i isɔrɛyo ame fiɛ masɛ mabore mabo Bosate sɔ maasumu i ɔ̃ anɔ. Ito iaɖe kasɛkɔ̃ itã ma ayo gu kakɔi sekelea itã isɔrɛyo ana. 5 Kasɛkɔ̃ mama ga lokarã meta kukpi kuweo-kunyɔ gu alafa-aru (12,500) fiɛ kabɛ meta kukpi kuru (5,000) to iaɖe ma Levise ma nsɛ masumu i isɔrɛyo ame kare. Iaɖe ma ire itã simagɛ̃ dzɛ ame maasɛ i kã iso.

6 " 'Ikote sɔ maakpɛti karɔ̃ i karɔ̃ sekelea kuruɛ matã Israel kaɖe ɔɖuɖu, sɔ maaɖaɛ ɔmagɛ̃siare masia iso. Kasɛkɔ̃ gagbe si kabɛ meta kukpi kunyɔ gu alafa-aru (2,500) si kakarã meta kukpi kuweo-kunyɔ gu alafa-aru (12,500).

7 " ' Ɔɖeisoi to ɔ̃awe karɔ̃ ga nse kume ku kasɛ ga nɖe ibuiti sekelea gu ɔmagɛ̃siare karɔ̃. Kaarɛ kabɔrɛ i kuɣɛ̃kabokɔ̃ isɛ ikɛlɛ kuɣɛ̃kabokɔ̃ ibaba fiɛ kaarɛ kabɔrɛ i kuɣɛ̃kabɔrɛkɔ̃ isɛ ikɛlɛ kuɣɛ̃kabɔrɛkɔ̃ ibaba. Kaarɛ i kukarãme kata i kuɣɛ̃kabokɔ̃ kafe kuɣɛ̃kabɔrɛkɔ̃ kume iso, kaarɛ kakɛlɛ lɛ kamele kawɛ̃ kare rɛ awe. 8 Karɔ̃ gagbe to kaaɖe ɔ̃ kare i Israel. Iyɔ wũ maɖeisoi kuiwɛ̃ iisibayika wũ maturi ɔbɔkarɔ̃ ɣɛɛ ɔ̃atã Israel kaɖe sɔ mawe karɔ̃ i ma kumele kanya.

9 " 'Nnɛgbe i Bosate Wɔ Nsiguso to ɔɣɛ ne: Miɔbara miɣede ka ilɛ lo, Israel maɖeisoi! Minyua mi amumuɣɔ gu iyikaibɔkarɔ̃ si mibara nnɛ loya fiɛ ilɛ. Minyua wũ maturi ara ifɔ, Bosate Wɔ Nsiguso nto ɔɣɛ. 10 Ikote sɔ miabara akerera wa loyi gu akora wɔ loyi iso karabara. 11 Efa gu ikere i lita nɛ loyi aaɖe kumɔme kuwɛ̃, ikere i lita nɛ loyi ba Xomer* ikaweova, Xomer si ɔɖe nnɛ iso maasusu ara itã aka anyɔ ɔɖuɖu. 12 Sekel* si ɔwe gera* sinyɔ. Sekel sinyɔ ibua i sekel sinyɔ-iru ibua i sekel iweo-iru nɖe mina ɔwɛ̃.

13 " ' Karatã igbaɔ ga miatã ngbe ne: Miaɖi efa aka akuɔ iwɛ̃ i kakpã xomer biara iso, kamɔ ana kumɛɔ ne. 14 Nnɔĩ kusime gɔ masɛ, maasusu i bat kanya, iɖe kor biara ame ne bat aka aweo ame ne maaɖi ika iwɛ̃ (kor ɖe bat iweo ɣee xomer ɔwɛ̃, ala bat iweo ɔkategu xomer ɔwɛ̃). 15 Ana ne maaɖi sɛrɛrerɔ̃ ɔwɛ̃ i alafa-anyɔ ikuri biara ame mabɔrɛgu i ngbegɔ sikuakaɖekɔ̃ sɛɛ ku ndu pia i Israel. Nwagbe maasu matã geɖebu asɔrɛ, araifɛ̃ asɔrɛ gu isobuɛ asɔrɛ ibara si mabara ikpikusoisɔrɛ matã maturi, Bosate Wɔ Nsiguso nto ɔɣɛ. 16 Maturi ɔɖuɖu to maapia kɔrɔ̃ i karatã igbaɔ itã ɔɖeisoi gɔ ɔ̃azã i Israel. 17 Ito iaɖe ɔɖeisoi karabara sɔ ɔ̃atã araifɛ̃ asɔrɛ, geɖebu asɔrɛ gu arainɛ asɔrɛ ku iyiɖea iso, Ɔgbaleti Ɣɛtɛ gu Awarãyi iso - ku i ayiɖea ɔɖuɖu wa masɛ itã Israel kaɖe. Ɔ̃to ɔatã ikpi asɔrɛ, geɖebu asɔrɛ, araifɛ̃ asɔrɛ gu isobuɛ asɔrɛ si mabara ikpikusoisɔrɛ matã Israel kaɖe.

18 " 'Nnɛgbe i Bosate Wɔ Nsiguso to ɔɣɛ ne: I iyi ɖeakatɔ̃ i kuwa ɖeakatɔ̃ ame ne aasu nantsuĩ poroporoi wɔ loyi asekelera isɔrɛyo. 19 Sɔrɛdze to ɔ̃asu ikpi isɔrɛ bɔi ima kɛkɛĩ ɔpie isɔrɛyo akuisidziri iso, i isɔrɛkasege kakpagɛkɔ̃ siɣokã gu i kame kasarɛkɔ̃ kuyogodɔ̃ sidziri iso. 20 Ikote sɔ aabara ngbɔ ku iyi kɔdzɛva iso i kuwa ame atã ɔrere wɔ lobara ikpi gɔ ɔ̃iɖo ɔbara ɣee i idaatsue ame, ne ɔso aabara ikpikusoisɔrɛ atã isɔrɛyo.

21 " 'Iyi iweonaare i kuwa ɖeakatɔ̃ ame ne, miaɖe Kukpiɔtakuwarabo iyiɖea nɛ nsɛ ifɔ ayi akɔdzɛ, gɔ i wã ame ne miaɖe boɖoboɖo wɔ maipia inyagɛ̃kua. 22 Iyi nɛmɔ iso ne ikote sɔ ɔɖeisoi aatã nantsuĩrɛrɛ̃ itã ikpi isɔrɛ itã ɔ̃ mɔmɔ gu itã karɔ̃ iso maturi ɔɖuɖu. 23 Iyi biara i ayi akɔdzɛ Iyiɖea ame ne ɔto ɔ̃atã manantsuĩrɛrɛ̃ ikɔdzɛ gu akpalasa akɔdzɛ wã ɔɖuɖu ɔyi itã araifɛ̃ isɔrɛ itã Bosate gu katikpɛĩ itã ikpi isɔrɛ. 24 Nantsuĩrɛrɛ̃ biara iso ne ɔto ɔ̃atã geɖebu isɔrɛ efa ɔwɛ̃, efa ɔwɛ̃ itã ikpalasa biara, gu nnɔĩ lita ina itã efa biara.

25 " 'I ayi akɔdzɛ i Iyiɖea ame ne, nnɛ losɛkarɔ̃ i kuwa kɔdzɛva iyi iweoruva iso ne, ɔto ɔ̃atã ikpi asɔrɛ, araifɛ̃ asɔrɛ, geɖebu asɔrɛ gu nnɔĩ lɛ ɔtã ɔfegu awe.