1 Bosate itɔ̃me ɔba me sɔ, 2 "Ɔturi awune ɔbi, su fɔ anɔ karã i Gog iso i Magog karɔ̃ iso, nwɔ nɖe ɔɖeisoi pelepele i Mesek gu Tubal. Ɖikanya ta ya i ɔ̃ iso 3 si aɣɛ sɔ, 'Nnɛgbe i Bosate Wɔ Nsiguso to ɔɣɛ ne: Gog, ɔɖeisoi pelepele i Mesek gu Tubal, lotsiri-ɔ lo. 4 Nto loapɛ-ɔ lofirikira, lopia-ɔ kugodai i aregba. Nto lokpadzɛ̃-ɔ ku fɔ makpakpɛ̃dze ɔɖuɖu - fɔ apɔngɔ, fɔ pɔngɔmasɛdze ma lonyi so akpadza, gu maturi kposu ma nto akpirafɔra kosoi gu asiare fiɛ ma ɔɖuɖu to mapɛ ipɛmi. 5 Persia, Kus gu Put piagu ma, ma ɔɖuɖu ɔtɔme abɔrakoto ne mato akpirafɔra. 6 Ana ne Gomer ku ɔ̃ makpakpɛ̃dze akuri ɔɖuɖu gu Bet Togarma ma lobɔrɛ dzoroo i katikpe ku ma makpakpɛ̃dze ɔɖuɖu - nɖebi gbodzoo ɔbua i fɔ iso.

7 " 'Miledza so, miwe i iledzaso ame, mi gu maturi kposu ɔɖuɖu ma mpia i fɔ kɔrɛ si aɖisilɔ atã ma. 8 Ayi gbodzoo kama ne mato maakpere mi sɔ mita kakpã. I akɔ wa i katɔ̃ ame ne, ato aata abo i Israel karɔ̃ ame. Karɔ̃ ga loɔbɔrɛ i kakpã ame fiɛ maɔsa kã maturi kanya mabɔrɛgu i nɖebi ndɛ̃, mabɔ Israel abe iso ngbegɔ loɔɖe ikpakpi ifegu ifɔ ɔwi. Maɔɖi ma mabɔrɛgu nɖebi ndɛ̃ fiɛ kiniɔ ne ma ɔɖuɖu ka masi i kaɣɔ ame. 9 Mi gu fɔ makpakpɛ̃dze ɔɖuɖu gu nɖebi gbodzoo ma mpiagu-ɔ to miata, misɛ mikɛlɛ lɛ awɛ awe. Mito miase lɛ idɔdɔ nfu i karɔ̃ iso awe.

10 " ' Bosate Wɔ Nsiguso sɔ: Iyi nɛmɔ ne adzuni to aaba-ɔ i iti ame ne ato aata ɔri nyanyariã. 11 Ato aaɣɛ sɔ, "Nto loata lobo i karɔ̃ ga maitsue abere mapia kumagɛĩ ame. Loata lobo i maturi ma mpia i isobuɛ ame fiɛ mapia i ifɔiɖe nɛmɔ ame. - ma ɔɖuɖu si i kumagɛĩ ame gɔ abere na fiɛ kuyogodɔ̃ gu kɔ̃ isɛ̃sidziri na ame. 12 Nto loamɔɛ̃ fiɛ loayu ma fiɛ loaɖi wũ kɔrɔ̃ losia i maturi ma akpakpi maledza isɛra gu maturi ma masakanya mabɔrɛgu i nɖebi ame fiɛ maba karana gu ayomabɔi gu ara fiɛ masi i karɔ̃ ndɛndɛ̃." 13 Seba gu Dedan gu Tarsis kuɣamaɖese gu ɔ̃ kumagɛĩ ɔɖuɖu to maaɣere-ɔ sɔ, "Ɔba ɔɔba sɔ aamɔɛ̃ ara? Ɔsa ɔɔsa fɔ makpakpɛ̃dze kanya si miyu ara, misore sikãrɛtɛa gu sikãfudza si misu ayomabɔi gu ara si mimɔɛ̃ ara gbodzoo ku ɔɣiɛ?" '

14 "Ne ɔso, ɔturi awune ɔbi, ɖikanya si aɣere Gog sɔ, ' Bosate Wɔ nsiguso sɔ: Ato aasɛ ne ikpo si iyi nɛmɔ ne, wũ maturi Israel ka masi i kaɣɔ ame. 15 Ato aabɔrɛ i fɔ kasɛkɔ̃ dzoroo i katikpe, mi gu nɖebi gbodzoo ma mpiagu-ɔ, ma ɔɖuɖu si i apɔngɔ iso maɖe maturi kposu, makpakpɛ̃dze ikuri siare miba. 16 Ato aata akɛlɛ wũ maturi Israel iso lɛ idɔdɔ nɛ nsɛ ifu i karɔ̃ iso. Ayi wa nto aba ame, Gog nto loakpadzɛ̃-ɔ lobɔ ata aya i wũ karɔ̃ iso lo. Nto loabara ngbɔ, si nɖebi si mitsue me si lote so sekelee iki i fɔ iso i ma anɔmi ame.

17 " 'Nnɛgbe i Bosate Wɔ Nsiguso to ɔɣɛ sɔ: Iiɖe fɔ iso loɖeika losegu ku kokowi iki i wũ maɖabo Israel kanyamaɖidze iso ɣɛɛ? Ɔwi wɔmɔ ame ne maɖikanya akɔ gbodzoo masɛ sɔ nto lokpadzɛ̃-ɔ lobɔ i ma iso.

18 Nnɛgbe nto iaba ku iyi nɛmɔ ne: Si Gog ɔta ɔbo i Israel karɔ̃ ame ne, wũ sikpã dzɛ mba ɔtɔ to siasakɛ, Bosate Wɔ Nsiguso loɣɛ. 19 I wũ sirerɛ gu sikpã dzɛ nsɛ sitsue lɛ ɔtɔ ame ne, loɣɛ ku ɔwi wɔmɔ ame sɔ Israel karɔ̃ to kaati teteree. 20 Ɔpo ame afara, ɔwiri ame kurodzai gu kuputubɔi, irabiara nɛ nsɛ isɛ i karɔ̃ iso gu maturi ɔɖuɖu ma i karɔ̃ iso, to maati makpakpa i wũ anɔ. Abe to aakɔlɛ afu, kuwɛla to kuakarĩ fiɛ ibere biara to iarɔ̃ ifere i karɔ̃. 21 Bosate Wɔ Nsiguso sɔ: Nto loakpere ipɛmi lopia Gog i wũ abe ɔɖuɖu iso. Ɔturi biara to ɔ̃ata ɔya i ɔ̃ ɔnyii iso ku ipɛmi. 22 Loto loakpadzɛ̃ wũ kutsue ku kukpakpi gu imaiferekarɔ̃. Nto loatã kado ɔpɛ, atumagirĩ gu kuɖu gɔ nto kutsue i ɔ̃ iso gu i ɔ̃ makpakpɛ̃dze iso gu i nɖebi gbodzoo mɛ mpiagu wũ iso. 23 Ne ɔso nto loɖi wũ sisiare gu isekele lote fiɛ wũ mɔmɔ loaɖi so lote i nɖebi gbodzoo anɔmi ame. Iyɔ mato maatsue sɔ Mme nɖe Bosate.'