10 «Qeerrinne lame ciqilenna gamisa, godoba mitte ciqilenna gamisa hojja mitte ciqilenna gamisa kade’eka waaccotike haqichchika taabota giissinowwaal. 11 Iso giddonna gadho ca’itte worqenni buqi; isi hana, dowwe isixxe duuchchin darreke kasa’n worqetixxa kifafe giiss; 12 Shoole worqetika fannichchuwwa isi’a giissitettexxi lame mitte darre’n lame kinni wele darre’ni’n shoolnxe lekkuwwan welt abidis. 13 Waaccotike haqichchixxa murguwwanna giissitettexxi worqetinna buqi. 14 Taabotinxe duka’a kaddo’a eettene murguwwanna Taabotinke kasa kasa’n hedheeke fannichchuwwi giddo e’yish. 15 Iitti murguwwa ookko Taabotinke fannichchuwwi giddo hexxo malee fula hasissabaan. 16 Ookkoneechchi uduma Ani ate’ni uwwannexxa dhuga kula taaboti giddo uggitatton.

17 «Qeerrine lame ciqilenna gamisa, godobakanna mitte ciqilenna gamisa kadeeka worqetika cubbo biratika tuphanjo giissi.✝ 18 Ookkone cubbo biratike tuphanjike kasa kasa’ni hexxaaxxa lame kirubeele, tumenedeexxe woqenni giiss. 19 Mitte kiruube mitte kasi hana langaxxa kiruube wele darreke kasi hana uggitettexxi lamiinge kasa’n lamiinxa kiruube cubbo biratike tuphanjinni mitteba abidis. 20 Tinni kiruubeeluwwanna keela iimi’a baniyyot cubbo biratika tuphanjo ifike keeluwwinni gollitowwaal; mitti mittinke kallachcha’n hedhiyyotinna lamiing alba ifi ifika cubbo biratike tuphanjiba’a wirri hitowwaal. 21 Ookkone cubbo biratika tuphanjo taaboti hana uggi; ani ate’n uwwannoxxa eettene Dhuga kulanna taabot giddo uggi

22 Ookkone Dhugaa kulatike taabot hana hexxeexxe lamiinxe kiruubeelixxe oddo’n, cubbo biratike tuphanji hana, ookko ani atinni afemennexxi Isira’eelitotee kadaaka anka ajajuwwa ate’n uwwannon.

1 Baatsili’eelinna waaccotike haqichchinni Kakotika Taabota giisse; qeerrini 110 santi meetire, godobi 66 santi meetiri, hojja 66 santi meetiremman.

1 Ookkoneechchi uduma Duuchchi Woddik Goottinna Muuse hiyyee qici: 2 «Siretiki agenji e’yeexxe siretixxe barra’ni ani ulfinniki leellannoka dunkaane oti. 3 Tommi ajaji borreessemeeki kinjuwwi hedheeka Kakotika Taabota dunkaan giddo uggi; Taabotakanna golo isikenni golli.

20 Tommi ajajuwwi borreessemeexxa lame kino adheexxi Kakotike Taaboti giddo ugge; Taabota dukatika haqichcho giissineexxe Taabotiinxe fanno’ni ugge; Taabotiinka buyyisanjonna Taabotake’ni buyye; 21 Taabotakanna dunkaane giddi’a e’yishe golo gole; konne qicini Duuchchi Woddiki Gootti ajajemmashanni Taabota buqqe.

89 Muuse Duuchchi Woddike Goottinn welti haaso’ate’e afenshatike duunkaan giddi’a e’yee wodda Duuchchi Woddik Gootti lame kurubeelixxe oddo’n kakotike Taabotik cubbo biratike tuphanji iimi darree’n iso’n haaso’aa’naa laqe. Isinne welti haaso’e.

33 Tennexxee Duuchchi Woddike Goottixxe koobanaa’n ke’neexxi sase barraka ora me’ine; Duuchchi Woddike Goottik Kakotik Taaboti tennee sase barra giddo insa’ne’e hafuura adhdhinaaka booncho hasitto insa’ne edii’ni me’a’nemman. 34 Kaanbe giddii’n fulle me’inaa wodda Duuchchi Woddike Goottik duumanchi barra insa’ne iimii’n hedhemman.

35 Kakotik Taabboti kaanbe giddii’n ke’e meexxa yanna duuchcha’n Muuse,

«Ee, Duuchchi Woddike Goottaa Ke’i!

naaphi atiki feshshi hiyyuun

atee gibaak duuchchinna ati edii’n baajowwaal» hiyya’nemman.

36 Insa’nenna Kakoti Taabboti me’a waaleexxi uuraaxxa yanna,

«Ee, Duuchchi Woddike Goottaa!

Heddo kumike mine’n laakko’ema’neeke atike Isira’eelike ardibaa ille iima higi» hiyya’neemman.

1 Duuchchi Woddik Gootti Muuse’e hiyyee qici, 2 «Isira’eelike arda’n kuldettexxi mitte mittenge gosati minike sooreessuwwinaa’n mitte mitte, duuchchiinxi mitteba tommenna lame siqqo aadhi; mitte mitte manjichchika summa isi isinxe siqqichcho hana borreessi. 3 Mitti mittiing gosati minik sooreessi mitte mitte siqqichcho afa hasissaaxxe kaddemmaxxee Leewwike gosati minixxe siqqichcho hana Aaroonika summa borreessi. 4 Tenne siqqotanna ani atinni afemannoke afenshatike duunkaani giddo Taabotiinke galdumi edi darre uggi. 5 Tennexxee ani filannoke manjixxi siqqichcho quuxisa quuxxissaan; tennenninna Isira’eelik ardi hashsha barra ha’no’n adhdhuma’neexxa adhdhuma uurrisannon.»

6 Tennexxee Muuse Isira’eelike arda’n haaso’e; insa’nek sooreessuwwi ifi ifike mitte mittiinge gosati minenaa’n tommenna lame siqqo uune. Aaroonixxi siqqichchonna insa’neexxe siqqo giddo hexxemman. 7 Muusenna tenne siqqo duuchcha iyyemareexxi Taabotiinke Galdumike duunkaani giddo Duuchchi Woddike Gootti edo ugge.

8 Langaxxa bara gorsa Muuse Taabotiinke Galdumike duunkaan giddi’a e’yaa woda Leewwike gosati minik summi itti borreessememmaxxi Aaroonixxi siqqichcho quuxisa calla kaddebaangi luuphphisseexxi, daraarte Almoondi* gummise’na’a afe. 9 Ookkoneechchi uduma Muuse duuchchiinxa siqqo Duuchchi Woddike Gootti edii’n aadheexxi Isira’eelike manni duuchchiba’a iyyedage; insa’nenna uundeexxi mitti mitting manji ifi ifixxa siqqichcho adhdhe. 10 Duuchchi Woddik Goottinna Muuse, «Aaroonixxi siqqichcho xaqartichchi manni’a xexxe’achchiisatike beessisa kaddo’a ille iima hissitettexxi Taabotiinke Galdumi edi darre isee uggi; insa’ne rennabaashshanna, ane’n adhdhummaxxa adhdhumanna isee gatissaan.»✝ 11 Muusenna Duuchchi Woddike Gootti isoo ajajemmashshanni asse.

14 Tennexxee Isira’eelik ardi Yordaanoosi’i foofo’a kaanbe giddii’n fulaa wodda kakotika taaboota dukkemmaxxi qeesole ardi edo me’ite. 15 Itti yanna midha bukki asseccatixxe yanna kaddemmaxxee, Yordaaanoosiki galaaninna dageemmani; kakotika taaboota dukkeemaxxi qeesole Yordaanoosika galaana gelte wodda lekka insa’nexxi galaana tuqqeeshanni, 16 alee’ni yaa’ammak wedi’i uurre; Tsartaani bira Addaami hiyyemaake bayike qachchii qico’ni tuuleme tullubeme; adadde Areebaxxe Maxinetixxe Abbaayyabaa* ya’ammak wedi’inna kuteme; ardikinna Iyyaarikoke kallachchi darree’n foofe. 17 Duuchchi Woddike Goottika taaboota dukkeemaxxe qeesole ardi duuchchi kuninna Isira’eelito duuchchi fooffe luggitaa qico’ni Yordaanoosike galaannixxe oddo’ni bago buttina’n uuriteemman.

18 Qeesetinna Duuchchi woddike Goottika kakotika taaboota dukkeexxi Yordaanoosike galaani giddii’ni fuliyyoti lekka insa’nexxi bago buttina tuqqeeshshanni Yordaanoosiki galaan bakka ifixxe’ni illeema hige; eddixxa ifixxa bakka wo’me yaa’ate’n ke’e.

1 Ookkone wodda Isira’eelito soda’atenaa’ni kexxeexa Iyyaariko jaba qicinni cufendeemman; gadhi’anna kadi giddi’a e’yaammak manji hedhemmabaan.

2 Duuchchi woddik Goottinna Iyyaasu’u hiyyee qici, «Kunse ani Iyyaariko isek moyanjinna iseke loliinke manninnaa’ni anga atixxe’ni sa’issee uwwe’enen. 3 Konne qachcha ha’nooke loliinke manni welt mittele dowwe; tennenna jaane barra asse. 4 Torbaane qeese torbaane malagata abixxiteexxi taabooti edo saxxowaal; torbaxxe barra’ni qeese malagata ufuufa’ni ookkone qachcha torbaanele dootowaal; 5 Uurabeloka malagatiik hafuura laqqinaa wodda ardi duuchchi hafuura gikki asse raarrowwaal; ookkoneechchi uduma ookkene qachchik dalla’i diigemaan; ardikinna alallee qabataan; mitti mitting manji hedhe hedhemmabaa’ni giddi’a e’yowaal.»

6 Neewek belti Iyyaasu qeese ye’eexxi insa’nee hiyyee qici «Kakotika taaboota dukke; torbaane qeese torbaane malagata a’liteexxi Duuchchi Woddike Goottike taabooti edo me’itowaal» hiyye 7 Ardakanna, «Edi’a sa’we; qachchakanna dowwe; ka’leek loliiki manninna Duuchchi Woddike Goottike taaboti edo me’inowaal» hiyye ajaje.

20 Malagata ufuufemaa wodda ardik raarre; malagatiinka hafuuraa laqeexxi ardi hunnati raara wodda dalla’i diigeme; mitti mitting manji hedhemmabaa’ni giddi’a e’ye; iikki qachchinna anga insa’nexxe’n ibe.

2 Filisixeemito Isira’eelii’i loldo’a googessa giissexxe; loli safeme eebbee wodda Filsixeemik manni injifateexxi shoole kuma Isira’eelika manna shiyye. 3 Isira’eelik loliink manni abixxinemmaxxe bakkaba’a higee wodda Isira’eelike ardik akeekisanjuwwi hiyyee qici, «Techcho Filisixeemitotee injifatemmannoshsha Duuchchi Woddik Gootti no’oo asseechchi mayeete? No’onni welti me’a’ni naaphakenaa’n no’o anjiro’a marrennexxi Duuchchi Woddike Goottika kakkotika tabbota Seelo’n iyyedango» hine. 4 Tenexxe Seelo’a manna ergineexxi Kirubeelixxe* oddo’n ifixxe moote hana ofoleeke Dada Duuchcha Ajajaake Duuchchi Woddike Goottik kakotik Taaboti dagaashsha assine; Eelixxi laminxi labbaxxi oose Hofiininna Finihaasi Mageniinke Kakotike Taabotin welti he’nemman.✝

5 Duuchchi Woddike Goottik Kakkotik Taabota ookkone booncho’n geyee wodda Isira’eelik ard duuchchi gammadeexxi buttini le’ma qico’n ililliise. 6 Filisixeemito tennee ililleete laqeexxi «Ibrawotinbaa lanqannexx tinni buttinna le’missaaxxi ililleete mayinxe?» Hiyye qore. Duuchchi Woddike Goottik kakkotik Taabot Ibirito abixxiteemmaxxe bakkabaa dageexxa egendee wodda, 7 Filisixeemik manninna sodaate hiyyee qici: «Mgenoke insa’nexxe kaanbeba’a dage’een; yoona aanne no’o’a! Konnechchi edo iitta hexxeexxi yaane no’o’n kadde egendebaan. 8 Kone huunamesa magenuwwixxe anganaa’n ayyete no’oo anjira? Aanne no’o’o! Kunni magenuwwi bire Gibtseka manna qiilla gammojje giddo gargar gargar hexxeexxe balanni gane’eeken. 9 Koo Filsixeemike ardaa! Yooni jabaate! Jabaata gophinoole edi wodda insa’ne no’oke garba kandemmashsha no’onna Ibiritotike garba kada no’oxxi gattaxxebaan; yoona labbalinsha jabaatine lollee!»

10 Tennexxee Filisixeemik manni jabaate loleexxi Isra’eeli injifatemmaxxe Isira’eelik manninna ifi fixxe duunkaanebaa baaje; lumok manni mude; sasi tommi kummi Isira’eelik lolink manninna shiyeme.

11 Mageniink kakkotik Taaboti boji’eme; laminxi Eelixxi labbaxxi oose Hofiininna Finihaasi shiyyemme.

6 Duuchchi Woddik Goottinna Ashidoodika ardanna qarqara insa’neeke’n hedheeka arda duuchcha’n fulantichchi fule dho’e malaqqi malaqqi hiyyashsha assiyyoti insa’nee jaba qicinni gane. 7 Ashidoodik ardi tennee kaddeexxa yanne uudeexxi weli’anni weli, «Isira’eelike Mageni Kakotik Taaboti no’oonna no’oka mageno Daagoni’ii jabaxxe mufenni ganemmaxxee isik Taaboti kaba no’oba turoqqe’e» hine. 8 Tennexxe duuchchinga Filisixeemika galchalluwwa ye’neexxi, «Isira’eelike Mageniinka konnee Kakotika Taabota maa assinano?» hine insa’nee qorre.

Insa’nenna «Gaati iyyemarre» hine hiisine; tennexxee Isira’eeli Magenika Kakotika Taabota Gaati iyyemarre. 9 Yaane kinni kakotik Taaboti Gaati iyyemarreechchi uduma Duuchchi Woddik Gootti ookkone qachchika mannanna mufet ganeexxi jaba qicinni weekemmaashsha asse. Isinna lumo shiixxoke gatebaang arda duuchcha fulantichchike dhukubinni gane. 10 Tennexxe Mageniinka Kakotika Taabota Aqarooni hiyyemaake wele Filisixxeemtotik qachcha dhaalasha asse. Yaane kinn ookko geyyeeshanni ookone boga’ni hedha’nek manni, «Isira’eelk Mageniinka Kakoti Taabota kaba’a iyyedange’echchi no’oonna no’oka arda shiltino’aten» hina’n hunbaashine. 11 Higgeenna Filsixeemike moyanjuwwiba manna ergineexxi «No’oonna no’oka arda shiyebaang, Isira’eelika Kakotika Taabota edo hedhemmanba’a hiisse» hine; Mageni qachcha mufeti ganemmaxxee qachcha duuchcha’n hedheek ardi reyyo lumoshsha sodaate’emman; Filisixxeemike galchalluwwa ye’neexxi «Isira’eelika Kakotika Taabota kabaa’n hoyye; edo hedhemmanba’a higowwaal; kadagophphoole no’onna no’oka arda biraan» hine.

1 Duuchchi Woddike Goottik Kakoti Taaboti torbaane agenjo Filsixeemike baga’n turee wodda, 2 Filisixeemik ardi ifixxa qeese Daagoninna Ashidodi morammaka manna ye’eexxi, «Konne Duuchchi Woddike Goottika Kakotika Taabota maa assinannoxxa? Hitta wirri assine isixxe bakkaba’a hiissinannoxxa no’o’ni kulle» hiyya’n qodhdhe.

3 Insanenna hine hissinee qici, «Isira’eelike Magenika Kakotika Taabota illeema hiisitina’noole balleessa ha’noxxee uwwemaake tolchinni welti illeema hiisse malee isoo calla hiissitinoqqe’e; ookkone wodda dhibotenaa’n fayyitinaan; jabaxxe ifixxe mufenninna ha’no’o mayee ganeexxanna egendinaan» hine.

10 Filisixxeemiki ardinna hiyyendemmashshanni gaarete’n usurremmaka qanbara aaneexxi lame saayya’n feene; jabuwwatanna moona giddi’a aassine hula cunfe. 11 Insa’nenna Duuchchi Woddike Goottika Taabota aa’nexxi lama’uwwinxenna fulantichchuwwinxe fakkuwwa’n giissendemmaxxe worqe giddo hexxeexxe saaxxinen welti lami saayyixxe gaare hana feene. 12 Lamingi saayyi middi bita’i’a gorebaang ora abixxe’e Betishemeshi darree’n me’ate’n ke’e; me’amma wodda madhata’ne’e me’aamman; Filisixeemik galchaluwwinna udumi udumi’n me’a’n Beetishemishixxe gabala qico’n genne.

13 Beetishemeshik manninna dhooqa giddo dinne haa’ma’nemman; tammi assine uundaa wodda Kakotika Taabota anfe; isoo anfemmaxxenna lumoshsha gammande. 14 Gaaretik lamingi saayy Beetisheemmeshi hedheeke Iyyaasu hiyyemaake manjichchike fichchibaa geyeexxi lomoke kinji bira dage’e uurre; ardikinna gaaretika haqichcho shashatte laminga saayya Duuchchi Woddike Gootti’a hedheeshshanni ciincatike tolcha assine shiqinshe. 15 Leewwitotinna Duuchchi Woddike Goottika kakotika Taabotanna isinni welti hedhemaka worqe giddo hexxeexxa saaxxine ke’isineexxi lumokekinji hanauggine; Beetishemeshik manninna ciincatika tolchanna wele tolchuwwa duuchcha Duuchchi Woddike Gootti’a shiqinshe.

1 Qiriyatiyi’aarimik manninna dageexxi Duuchchi Woddike Goottika Taabota adhdheexxi alale me’ine; ookko’n tullichchi hana hedhaa’neeke Abinadaabike mine’n iyyemarreexxi Duuchchi Woddike Goottika Taabotanna heqqaashshanna belto isika Ali’aazaarii’i woyyonsine.✝

2 Duuchchi Woddike Goottik Taabotinna Qiriyatiyi’aarimi’n qeeraxxe yanna lame tomme wogga offo’le; Eettene yanna’n Isira’eelik ardi duuchchinna oodhe Duuchchi Woddika Gootta halse.

12 Konne wodda «Duuchchi Woddike Goottike taabotixxe buutonni Abidaarak mini hadinna horateelcho duuchcha Mageni isi’a eebisse» hineexxi insa’nenna Daawwiti’n kulle. Tennexxe Daawwiti ookko’a dirreexxi Mageniinka taabota Abiduurake minenaa’ni Daawwitike qachchibaa lumoxxe gammashshonni aadhe dage.

13 Iikki Duuchchi Woddike Goottika taabota dukeemmak manni jaanele takkaarro me’ineexxe qixxe’ni Daawwiti mitte jibichchanna mitte ha’yaxxa jabbe tolchaamman. 14 Daawwitinna layinoti giisendeexxa efuude hidhake’ni ussudheexxi isi afeexxe hunna duuchchinni Duuchchi Woddike Gootti edo burraaqaamman. 15 Konne qicinni Daawwitinna Isira’eeliki ardi duuchchi qeexala’ni malagata ufuufa’ni Duuchchi Woddike Goottika taabota alalle idange.

1 Ookkoneechchi uduma moyanji Solomoon Duuchchi Woddike Goottika kakotika taaboota Daawwitike qachcha Tsiyooninaa’ni iyyedagate’e Isira’eelixxa geedhuwwa, Isira’eelixxe gosake mini mininka akeekisanjuwwanna Isira’eelike ardika ja’laabuwwa duuchcha isi hedheeba’a Iyyerusaalemi’a dango’a ye’e.✝ 2 Ayyaani ulfeessemammake Etaami hiyyemaake torbake agenjo’ni Isira’eelik labballi duuchchi moyanji Solomoon hedheeba’a bukki hiyye.✝

3 Isira’eelixxi geedhuwwa duuchcha daggee wodda qeesole kakotika taabota dulkite. 4 Duuchchi Woddike Goottika kakotika taabota, Duuchchi Woddike Goottika afenshaxxa duunkaananna ise giddo hedheeka woyyichcha miyuwwa idange; qeesoletinna Leewwito konne miya duuchcha dulkite. 5 Moyanji Solomooninna isinni welti ookko’o bukki hiyye’emmak Isira’eelki ardi duuchchi kakotike taaboti edo hedhiyyoti laakkoossi iimi darre hedheeka gedhebokanna lalo tolchine.

6 Ookkoneechchi udumi’a qeesole Duuchchi Woddike Goottika kakotika taaboota iyyedaggeexxi galmi giddo hexxeexxe isixxe woyyo woyyite bakka’n e’yishsheexxi kurubeelike keeli hunda uggitte. 7 Kurubeeluwwanna kakotik taabooti hedhemmake boonchi hana keela ifika bandeexxi kakotika taabotanna isika dukisanjuwwa murge buqqe 8 Murguwwatik qeerinnenaa’ni kexxeexxa isexxi qaccuwwa galmi giddo woyyo woyyitte edi darree’n leellita’emman; galmii’n gadhidarre hedheeki manji kinni isee’e afa’emmaba’a; murguwwatinna telchi qico’n ookkoonni hexxeen. 9 Isira’eelik ardi Gibtsee’n fule wodda Duuchchi Woddik Gootti Isira’eelike ardinni welti kako aagemmaba Koorebi, Muuse kakotike taaboti giddo uggemmaxxa lame bocendeexxa kino malee’e kakotike taabooti giddo mittilchchinna hedhemmabaan.✝

10 Qeesole galmi giddii’ni fulde wodda duumanchchi Duuchchi Woddike Goottika galma wo’me. 11 Duuchchi Woddike Goottik ulfinni galmi giddo wo’meemmaxxe’e, qeesole duumanchakenaa’n kexxeexxa ergatema dandeetteba’a.✝

14 «Ha’no addatendinabaake arda, ani aro’o ha’nooke kadeennaxxe’e anibaa’a higge» hiyya’neen Duuchchi Woddik Gootti «Ani ha’no’o mitte qachchanaa’n mitte gosatike mannanaa’n lame filleennexxi Tsiyooni’a iyyedagannon. 15 Anee’e godobi aageexxa, ege’natinna qalbeeffachchot ha’noo akeekaaxxa allalisano ha’no’a uwwannon. 16 Ha’noo laakkosi ookkone boga’ni hara bira sa’aan» hiyya’neen Duuchchi Woddiki Gootti hiyya’nee qici; «Ookkone baro’ni manni ‹Duuchchi Woddi Goottike kakoti taabota hiyyeexxi konnechchin edi’a isoo’o summisabaan› qallinna hiyyaba, qaabbataba’a, welikinna giissemaba.

1 Iitti siretixxi kako magenooffachchotixxa aadanna buttatike Galma affe’eemman. 2 Lame kuta afe’eemmak duunkaani qixxeesemeemman; taakkaxxe kuta’n xassiink uggemalchi, beerikinna woyyitte kebbo hexxemman; kunni boonchinna «Woyyitte» hiyyemaan. 3 Ookkone langake seemmati goli udumi darre Woyyitte Woyyo hiyyendaaxxe kuta hexxemman. 4 Ookko giddo worqeti hixaank gubemalchinna, werqeti buqemeek kakotik taaboti hedhemman; kunni kakoti taaboti meenni ise giddo hedheexxi worqetixxi qore, kichcho fulchiteemmaxxi Aaroonixxi siqichchonna tommi ajajuwwi itti borreesemeemmak lami kinoti bidiruwwi giddo hedhemman. 5 Konne taaboti hana hedheeka cubbo biratika tuphanjo buqqaaxxi ulfinniinxi kirubeeluwwa hexxemman; yaane kinn ta’a tenne yaanuwwaxxe mitte mittende yaanexxee haaso’a dandeenabe’non.

19 Ookkoneechchi uduma iima hedheek Magenik galmi baneme; galmi giddonna kakotik taabot leelle; xassiink uggemalchi, hafuuri, dindinso, buttatixxi lele’manna lumoxxi kaade kadde.