1 Manji tenne butta'n hora'n dagee wodda dubartetinna ilende.✝ 2 Eettene yanna'n Mageniinxi oose* manjiinxe oosexxi dubarte danchate kaddeexxa uuddeexxi ifi ifi'a eetemmaxxa fi'lite aaxxe. 3 Ookkonechchi uduma Duuchchi Woddik Goottinna, «Manji reyaachcho kadeemmaxxee Hafuuri ank manji giddo duuchchi woddi'a hedhabaan; isik barinna 120 wogga kadaan» hiyye. 4 Mageniinxi oose manjiinxe ooseka dubarte aaxxee oose i'litee woddanna kaddo'o ookkonechchi uduma «Nefileemi» hiyyemaak manni buttate'n hedhemman. Insa'nenna edike baro'ni jannummati ege'neme'e gurra fuleeke mannamman.✝

5 Duuchchi Woddik Gootti manjiinxi balleessa buttate'ni hitta bira saxxeexxannaa isixxe qalbeki hedumi duuchchi wodda fuggoke kadeexxa uude.✝ 6 Tennexxee Mageni manjo buttate'n dadeexxee yaade, qalbetinna hansha hiyye. 7 Tennexxee Duuchchi Woddik Gootti, «Insa'nee dadiyyo anxe'n yaadennexxee, dadenneka manjo, hore biniincha, godobik me'itaaxxa daduwwa, ci'a buttatenaa'n balleessannon» hiyye. 8 Yaane kinni Nohi Duuchchi Woddike Gootti edo elle alfe.

9 Nohixxi jirte konnechchi butti'a hexxeexxen. Nohi baro isike'n hedhemmake manna duuchchinaa'ni qullichchake, fuggoxxa hujaammabaakenna Mageniinka ora hordofaammake manjomman.✝ 10 Nohinna sase labbaaxxa oose Seemii, Kaamiinna Yaafeetii i'le. 11 Ookkone baro'ni butta Mageni edo fuggoxxe hujenni battootte, xaqarotinna ise'n wo'miteemman. 12 Mageni butta fuggoxxenni hitta battootteexxa afe; kunse manji duuchchi fuggoke ora'ni me'a'nemman.

13 Tennexxee Mageni Nohii hiyyee qici: «Buttate'n manjiinxi xaqaro wo'mitemmaxxee manjo duuchcha balleessonnaa mudhdheenne; kunse ani manjokanna buttatanna balleessannon. 14 Tennexxee ati kinni goofer hiyyemaake haqichchinni markaba ifi'a ijaadhdhi; heddo kuta afaashshanna assite giiissite'e giddi gadhii'n dhaphphi assaachcho itti issi. 15 Isoonna ijaartatto qici: qeerrinne 300 ciqile, godobi 50 ciqile ejjuma 30 ciqile kadduun. 16 Markabakeenna heellichcho* giissi, heellichchotinna gimo welti afendammaba gence assitebexxongi mitte ciqile qico haanni assitettexxi waali; konnee markaba sase weli hana ijaaremeeke minishsha ijaarte gamakenaa'ninna hula fulchi. 17 Aninna iimati butti'a lubbo afeechcho duuchcha buttatenaa'n balleessonnaa buttate'ni balleessaaka wode'e iyyedagannoni; buttate'n lubbo afeechcho duuchchinna ba'aan. 18 Ani kinni ati'a kako aagaannon; atinna are atixxi, oose atixxinna oose atixxixxi aruwwa markabi giddi'a e'yitinaan. 19 Atinni welti lubbo gattaashsha hedho affeexxi dada duuchchanaa'ni lame lame mitte meyyaxxanaa mitte labbaka aaxxa'ni markabi giddi'a e'yishi. 20 Lubbo gattaashsha gosa gosaxxe ci'anaa'ni, gosa gosake biniinchanaa'n, gosa gosake buttate'ni godobik me'aachchuwwi duuchchanaa'ni lame lame kada'ni atibaa dagaan. 21 Ati ifi'aanna konne lubbo afeechchi duuchchi'a itatee kadaachcho duuchcha aaxxa'ni markabi giddo tuuli.» 22 Nohinna duuchchiinxa Mageni isoo ajajemmashshanni asse.✝