1 Iitti lamiinxi erganna galgala bogi siphphi siphphi hiyyemma wodda Sedoomi gelte; Looxinna Sedoomike qachchixxe hula'n ofoleemman; Looxinna tenne ergana afeexxi qophedho'aa ke'e albik butta gonbiseme anga iimi'a ke'isse; 2 Isinna «Anxe goottole ballo ane garbichcha ha'nookebaa gorre; lekkatanna anshexxine soodo bariisa me'itinaan» hiyye.

Insa'nenna «Waawwo'o no'o kaba ba'linnange'n gallannon» hine.

3 Yaane kinni Looxi yo'oshsha insa'ne magannise insa'ne kadhatemmaxxee isinni mine isike'n e'yine; Ookkoneechchi uduma waasa ra'ise shiqishee'na inde. 4 Keessumma diiphphebaang Sedoomike qachchik labbali dargaggeeyyenna geedhe duuchchinn darree'n dangeexxi mine bunqe. 5 Insa'nenna Looxi ye'neexxi; «Galgala tenne atiba mine e'yeek manni haba hedhe? Labbal melaallet welt diiphphammasha insa'nen welit diinphonaa insa'e no'o'a gadhi'a fulch» hine 6 Looxinna insa'nenni haaso'o'aa gadhi'a fule; cufanaknna udumishsho cufeexxi 7 hiyyee qici, «Anke dayyuwwa maganneten tennee fuggoxxa yaane assitinoqqe.✝ 8 Kunnise ani lame duuddo dubarra afeenen; isoo ha'no'a gadhi'a fulchee'naa'a hassineexxa assedhdhe; yanne kinni insa'ne mine anke'n daggeexxe anxe keessumma kandeemmaxxe insa'ne'ni fuggoxxa mittetanna assitinoqqe'e.»

9 Insa'nenna Looxii, «Ke'i kabaa'n! Kunni manji keessummummati bereqenni daggeexxi telcho no'o'n goottake kaddeexxi tenne asse hiyya'n no'o'n kulaa? Ati umo atinge heqqedhi! Gibbottole konne manna'n hendennexxe yaane irra elobaaxxe ate'ni geltaan» hine. Konne qicinni Looxii darbina'ni hula eenqinaaba genne. 10 Yaane kinni iitti lame keessumma anga qeerrisse Looxii'i ifiba'a mini'a e'yishsheexxi hula wirri assite cuffe. 11 Ookkoneechchi uduma hula haba hexxeexxa affabaashsha gadho minixxe hula'n hedhemmaxxa dargaggeeyyenna geedheetixxa balleessine.✝

12 Kunni lamiing manni Looxii hiyyee qici, «Konne qachchi giddo atik manjo kadaak, atixxi oose labbaxxinnaa meyyaxxi, balluwwikinnaa weli atiki firi hedhee? Hedhoole rakke konne qachchi giddii'n fullaashsha assi. 13 Konne qachcha balleessina'ennen. Konne qachchike ardixxee Duuchchi Woddike Goottiba'a shiqqeexxi raare lumoxxe kaddemmaxxee isoo balleessinonna'a Duuchchi Woddik Gootti no'oo erge'en.»

14 Ookkoneechchi udumi Looxi dubarra ifika uwweemmake manniba mareexxi, «Duuchchi Woddike Gootti konne qachcha balleessaammaxxee rakkineexxi tenne bakkanaa'ni fulle» hiyya'n insa'ne'n kule; yaane kinni insa'nen Looxi roora'neechcho labbe.

15 Boro haachchabamma wodda itti lame Mageniinxe erganna Looxii'i, «Konne qachchinni mitteba baxxinabaashsha atixxa arennaa lamiinga atika dubarra adhdhite tenne bakkaa'n rakke fuli» hita'n muddansite. 16 Yaane kinni Looxi hoodee wodda Mageni insa'ne'a mararemmaxxee itti erganna anga isixxa, isixxe arexxanna, isike lamiinge dubarrixxa anga abiddeexxi qachchi giddii'n nage'ik fulchite.✝ 17 Insa'ne fulchiteechchi uduma erganna giddii'n mitte insa'nee, «Hedho ha'noxxa gattilsatee rakkine baajje; udumi'a uuddinoqqee; tenne dhooqa giddo habanna uurrtinoqqe'e; rertinabaashsha eettene koobabaa baajje» hiyye.

18 Looxinna insa'ne «Anke goottuwwa maganneten ookko'a me'inannoshsha assitinoqqe. 19 Ani atik erganji woldo ati edo elle alfe'ennen; atinna hedho anxa gatisatee lumo qico ani'a marateten; ani kinni eettene koobuwwaba'a dande'e baaje fulagophannaxxee daggaaxxi ba'ne ane balleessitaaxxe hexxen. 20 Kunnise ookko baaje fulatee shiqa hedheek shiixxok qachchi hedheen; isibaa baajo; uuddaatteshshanni isi shiixxoken; ookko'a baajennele lubbo gatannon.»

21 Erganjikinna iso'n hiyyee qici, «Ishshi kadduun; hitettexxa adhdheennen; ookkone hitaatteka qachchanna ballessabonon. 22 Ati ookko geltattoxxee mittelchonna assa dande'a gophannaxxee rakkettexxi okko'a baaji.» Tennexxee, okkone qachchik summi Zo'aar.*

23 Looxinna Zo'aar geye wodda arishsho reefi fuldeemman. 24 Duuchchi Woddik Goottinna Sedoomikennaa Gomorake qachcha'n giiratinna ha'yaaka kinjo ifibaa'n (Duuchchi Woddik Goottibaan) iimii'n butti'a gansiise. 25 Konne qicinni Duuchchi Woddik Gootti okkone qachchuwwa, dhooquwwa duuchchanna okkone qachchuwwa'n hedhemmaka manna duuchcha ookkone boga'n lateechchi mittichchinna gatebaangi gube balleesse.✝ 26 Looxixxi are kinni udumi'a wirri hite uudde; maxinetixxe sooddo kadde.✝

27 Abirihaaminna langabaro gorsa ke'eexxi edi wodda Duuchchi Woddik Gootti edo uurreemmaxxe bakkaba mare. 28 Abirihaaminna Sedoomikenna Gomorake iittanni dhooqate'n hedheeka boga duuchcha addadde uudaa wodda boosii'ni tuqu tuqu hitammaxxe wiliilleshsha hexxeexxi wiliille bogakenaa'n iimi'a tuqu tuqu hitaa'naa afe. 29 Konne qicinni Mageni dhooqa giddika qachchuwwa balleessee wodda Abirihaami qaabbate; tennexxee Looxi hedhemmaba hedhemmaka qachchuwwa balleessiteexxe ba'nenaa'n Looxi'i fulche.

30 Looxi zo'aar giddo hedha sodaatemmaxxe'e lamiinge ifike dubarrinni welti ookkone qarqara'n hexxeexxe koobuwwabaa me'eexxi wolo'o mitte giddo ofo'le. 31 Mitte barra Looxixxi angafa belto ifixxa shiixxoxxa dayyo «Anni no'ok cima'neen; butta duuchcha'n hedheeke mannixxe aadashsha no'onni welt dhiiphaak labballi loola no'oke'n hedhebaan. 32 Tennexxee anna no'oka woyinetixxa booka ha'winsennexxi isinni welt diinphe'e anna no'okixxa horte sa'issino» hite. 33 Eetteneen hashsha insa'ne anna ifika woyinetixxa booka ha'winse; ookkoneechchi uduma angafa belto ifike anninni welt dhiiphphe; Looxxi kinni isenni welti diiphphenna kexxaa wodda ege'nemmabaan.

34 Langa baro angafa belto shiixxoxxa ifixxa dayyo, «Bereqe hashsha ani anna ankenni dhiiphennani; telcho hashsha langaxxa woyinetixxa booka ha'winse'naa ati marte isinni welt dhiiphi; konne qicinni anna no'okixxa horte sa'issanon» hite. 35 Insa'ne eettenenni hashsha anna ifika booka ha'winsee'naa shiixxoxxi belto marteexxi anna ifike'n welt dhiiphphe; maa'nichcho beltonna anni ifikinn welti diiphphe. Looxxi kinni isee isinni welti diiphphe kexxaa wodda ege'nemmabaan. 36 Konne qicinni lamiingi Looxik dubarri ifinge anni'a siila'we. 37 Angafa beltonna labbaka belto ildeexxi beltiinka summa «Mo'aabi»* hite fulchite. Isinna telchixxe Mo'aabixxe gosa'a hundaayyetike annan. 38 Shiixxoxxi beltonna iittanni labbaka belto ildeexxi beltiinka summa «Beeni'aami»* hite fulchite. Isinna telchixxe Amoonixxe gosa'a hundaayyetike annaman.