1 Ookoneechchi uduma Ya'iqoobi ifixxa labbaxxa oose duuchcha ye'eexxi: «Udumii uduma mayi kadaaxxa ha'no'ni kulonna'a bukki hiyye.

2 «Tee Ya'iqoobixxe oose

bukki hitineexxi caqasse;

anni ha'nook Isira'eeli hiyya'neexxa caqasse.

3 «Koo Roobeel, ati anke angafa belton,

uduuda ankennaa ka'umumma anxike beesisan;

Ati ulfinnik caaldatton,

hunnatinna saxxatton.

4 Ati wodiinsha daaqqattaxxee'e,

angafumma ati'a kaddoqqe'e;

Anna atikixxe taqe hana saxxetten,

itille anxanna battoossitetten.

5 «Simooninnaa Leewwi godobi dayyuwwan;

wolaantichuwwi insa'nek xaqarotike miyani.

6 Insa'ne aareti ke'neexxi manna shinneemmaxxee'e

eeneeshsha jiboota mogolchineemmaxxee'e

Mari'e insa'neexxe'ni ani e'yabe'non.

Ya'a insa'neeke'ni ani afemabe'non.

7 Hara bubbeexxi aare insa'neexxi,

mararte affeebaaxxi jinne insa'neexxi,

Badindeexxe kaddowwaal.

Ya'iqoobi giddo insa'nee xexxeerannon;

Isira'eel giddonna insa'nee xeellage bittinneessannon.

8 «Koo Yihuda! Dayyuwwi atik atee saadaan;

anga atixxinna atike naaphika gooba huute abiddaan;

atike annixxe oosenna ati edonna sagaddaan.

9 Koo neenqinke beltanjo Yihudaa

adamokenaa'n higgetteke anke beltoo,

isi neenqiinsha gaadaani;

Buttanna wexxi hiyyaan;

aateta mare iso'o dammassaak?✝

10 Mootummatixxi bokko Yihudake minenaa'n fuladdabaani;

galchatixxi siqqichchonna isike gudeedinaa'n;

galchalloke kadeek dagaa qico

arduwwi duuchchi isi'a ajajemaan.

11 Harichcho ifika woyinetike hiddichcho'n,

harretika beltanjonna weyinetike daalo'n usuraan

Seemma ifixxa woyinetixxe bookanni;

fugataaka ejjanna woyinetike bulbulinni borcaan.

12 Ille isixxi woyinetixxe booka caala diimmateek

isso isixxi adoti iimi darre golaalooxxe kaddaan.

13 «Zabiloni, abbayyati qarqara hedhaani;

qarqari isikinna lumolla hoboluwwa hafuura adhdhitaaxxe bakka kaddaan;

hedhaake bogixxi gabala Siidoona qico'n geltaan.

14 «Yisakoori fe'isiki diiphammake

jabake miccike harrichchishshaten.

15 Yaane kinni hafuura adhdhaaxxi bakka eldoole,

hedhaaki bogi gammachchiisaake kadoole,

dugummo ba'otee giisedhaan;

garbiinshanna hunnatixxa huje hujaan.

16 «Daani wele Isira'eelike gosatike minuwwinaa'n mittiinsha kadeexxi

ifike arda'ni muraan.

17 Daani ori qarqarik bofan

weldeennatixxe buuten;

fadhado gulufeek udumi'a ibaashsha,

fadhadiinxa faana iddaan.

18 «Mageno!

Anjira atixxa heqqedhannon.

19 «Gaadi shitti miidhaan;

isi kinni faana insa'nexxa qore maree halo hiissaan.

20 «Aseeri fichchi isiki misee'naa duroomaan;

moyanjuwwakeenna kaddaaxxa ita shiqishaan.

21 «Nefitaaleemi leexa wocca assendeexxe,

elolla beltanna* ildammaxxe buddanneshshaten.

22 «Yooseefii guma callike haqichchon;

wodi'iin qarqara kaasendeexxe woyinen;

dame isexxinna dalla'ake'ni daaldaan.

23 Naaphi isoo gabeti lolaan;

jaba qicinninna isoo iddeen.

24 Yaane kinni jabake Ya'iqoobike Magenixxe hunnanni,

Allalisanjoke kadeek Isira'eelixxe rassan,

gabe isixxi udumi'a higgabaan;

hirre isixxinna jabaatteeshshanni hexxaan.

25 Atee gargaaraake atike annike Mageninni

atee eebbisaake duuchchiinxa assa dande'aak Mageni,

ale iimi'ni afemaake gargaarsinni

Buttii'ni dhi'motenaa'n afendaaxxe eebban

heddo oosenninna heddo horinni atee eebbisaaan.

26 Olmii'ni telchi qico'n hexxaaxxe koobuwwanaa'ninna

duuchchiin wodda hexxaaxxe tulluwwanaa'n

afendaaxxe eloxxe yaane erra

Atike annixxe eebba saxxaan.

Tinni eebba duuchcha Yooseefixxe kaddowwaal;

Dayyuwwa ifikee umoke kadeek Yooseefi eebba tenne badhaadhowwaal.

27 «Biiniyaami bultitaammaxxe yayyen;

adameechchonna gorsa itaan,

booji'emalcho hashsha qoodemaan.»

28 Yoona kunni tommenna lame Isira'eelike gosati minuwwan; anni insa'neeki insa'nee eebbisee wodda mitte mittengee kadaaka eebbatika haaso'a haaso'eek konne qicinniteman.

29 Ookkoneechchi uduma Ya'iqoobi labbaxxa ifixxa oose hiyyeexxi ajajee qici: «Kunnise ani anke manniba'a me'anoxxi yanna gelte'een; tennexxee Hiititichcho Eefirooni fichcha'n hexxeexxe wolo'o giddo annuwwi anki bira anee moogge. 30 Tinni wolo'onna Kenaanike boga'n Maamiree'n boroti darre'n Maakifeela hiyyemaaba hexxeexxen; Abirihaaminna tinni wolo'o hexxeeka fichcha mooggiinxe booncho he'neek Hiititichcho Efiirooniten. 31 Abirihaaminna are isixxi Saara ookko moogemme'een; Yisaaqiinna Ribiqaa ookko moogemmeen; aninna Liya'a moogeneki ookkonden. 32 Fichchakanna wolo'o lamiingechcho mitteba hirreeki Heexxike mannanaa'niten» hiyye.

33 Ya'iqoobinna konne haaso'a oose ifixxe'n haaso'e muuxeeshshanna hige ma'nate'n irkatemmamba lummedheexxi fike manniba'anna me'e.✝