1 Ookkoneechchi uduma Mageni Nohinna Nohixxa labbaxxa oose hiyye eebbise qici: «Ille, horre; buttatanna wo'me.✝ 2 Hori, biniinchi, ci'a, godobiki me'aachchuwwinna qulxu'muwwa dada duuchchi ha'noo sodaata'ninna bararaqqa'n hexxowwaal; kunni duuchchiingechchi anga ha'nooxxe'n uwwemedheen. 3 Buttini fulcheeka hiddichcho duuchchi itatee kado'a ha'no'a uwwenneshshanni lubbo afee le'maachcho duuchchinna itatee kadaashsha ha'no'a uwweennen.

4 «Yaane kinni maala, lubbo sixxi yookaan munde giddo hexxeeka ittinoqe'e. 5 Manjo shiyeeka duuchcha okkone reyemmake manjixxe munde'a ani isoo qorannon; reyeeke manjixxe munde'a isoo shiyeek hore biniinchi yookaan manjo qorannon; manjiinxe munde'a manjo duuchcha qoranon.

6 «Mageni manjo fakke ifixxe'ni daxxemmaxxee,

manjixxa munde dhangalanseek duuchchi

Isixxi mundenna manjiinxe anga'n dhangalaattaan.

7 Ha'noona ille, horre, bira sa'we; horte ha'nooxxi butta duuchcha'n wo'mitowwaal.»

8 Ookkoneechchi uduma Mageni Nohinna isinni welti hexxeexxa labbaxxa oose ifixxa 9 hiyyee qici, «Ani ha'no'aannaa ha'noo uduma daggaaxxe ha'nooxxe ila'a kako aagaanneni; 10 iittanni ha'nonni welti hexxemmaxxe lubbo affeexxe dada duuchchi'a: ci'atee, horeke biniinchuwwakeenna ha'nonni welti Lumoxxe Hobolo giddii'ni fuldeexxe, buttate'ni hexxeexxe lubbo affeexxe dada duuchchi'a kako aagaannen. 11 Ta'anni udmi'a lubbo affeexxe dada duuchcha balleessatike wodi'inni baxxabaaxxa; langaxxa butta balleesaaka wodi'i hedhabaaxxa ha'no'aa kako aagaannen.»

12 Mageninna hiyyee qici, «Ani ha'no'aanna, ha'nonni welti hexxeexxe lubbo affeexxe dada duuchchi'a, aagenexxe tenne duuchchin woddixxe kako'a beesisake kado'a, 13 anka Dowwichcho duumanchake'n uggannoni; kunni dowwichchinna ani buttatee aagennexxe kako'a beesisake kadaan. 14 Duumanchi butta duuchcha buqaashshannaa dowwichchi okkone duumanchchi giddo leellaashsha assannoxxe yanna duuchcha'n, 15 ha'no'aannaa lubbo affeexxe dada duuchchi'a aagennexxa kako kassi hiyyannon; lubbo affeexxa dada duuchchanna balleesso'a konnechchinni edi'a balleessaak wodi'i dagaba'a. 16 Dowwichchi duumanchike'ni leelle'naa uudanoxxa yanna duchcha'ni ani buttate'ni lubbo affeexxe dada duuchchi'a aagennexxa duuchchi woddixxa kako kassi hiyyannon.»

17 Tennexxee Mageni Nohi'i, «Kunni dowwichchi ani lubbo affeexxe dada duuchchi'a aagennexxe kakoke beesisan» hiyye.

18 Lumoxxe Hobolo giddii'ni fuldemmaxxi Nohixxe labbaxxe oosek summi: Seemi, Kaaminnaa Yaafeetitemman; Kaaminna Kanaanike annan. 19 Tinni sasiinxi labbaxxi oose Nohixxe oose kaddaa wodda telcho buttate'n hedheeki manni duuchchi insa'neexxe horten.

20 Nohi buttina hucce galaammake manjo kademmaxxee woyinete hiddichcho kaalse. 21 Woyinetixxa booka ha'we machcho'eexxi ifike dunkaani giddo duwwitti diiphe. 22 Kanaanik anni Kaaminna anni ifik saalibelo hedhee'naa uude; gadhi'aa fuleexxi ifike lamiinge dayyuwa'n kule. 23 Seeminnaa Yaafeeti kinni ejja aa'ne dugummote'n uggudhineexxi ifike annika saalibelo gateeka biso uundabaashsha udumishsho me'ina'ni ifike annika saala bunqe.

24 Nohi woyinetixxe bookaxxe machche balleefate ke'ee wodda shiixxok isik belti isoo maa asseexxa ege'neexxi,

25 Isoo hiyyee qici,

«Kanaani badinemeeke kadowwaali!

Dayyuwwi ifikixxe garboolexxe jale kaduun.»

26 Isinna higgenni hiyyee qici,

«Duuchchi Woddik Gootti Seemik Magen

Saademowwaal!

Kanaaninna Seemike garba kadowwaal!

27 Mageni Yaafeetika boga ba'lisowwaali!

Yaafeetixxi sanne Seemixxe sannenni welti galdowwaal!

Kanaani Yaafeetike garba kadowwaal» hiyye.

28 Nohi balleessatike wodi'i uduma 350 wogga gale. 29 Nohi ilemeexxe 950 wogga'n lummedhe.