1 Ya'iqoobinna tami asse uudaa wodda Eesawu shoole dhibba manna adhdhe dagaa'naa afe. Tennexxee Ya'iqoobi oose Liya darre'n, Raaheel darre'ninna lame meyyaxxe erganjuwwa darre'n qoqqoode. 2 Ookkoneechchi uduma lamiinxa erganjuwwa insa'neexxe oosenni welti edo aanche; ookkoo'n Liya'a isexxe oosen welt itti aanche; Raaheelinna Yooseefi kinni duuchchiingenaa'n udu'minaashsha asse. 3 Ya'iqoob insa'ne duuchchigenaa'n edi'a sa'e me'e; dayyo ifike Eesawuba geyaa qico'n torbaanele butti'a heeshshi hiyye; 4 Eesawu kinni Ya'iqoobiba geyo'a gonge mareexxi iso'n hiribbi hiyye; gooba isike'ninna marxeme iso'o suunqedhe'na'a lamiing oo'ne. 5 Ookkoneechchi uduma Eesawu melaalletanna oose tami asse uudeexxi, «Kunni atinni welti hedheek manni ati'a maa kadaakeera?» Hiyye qore.

Ya'iqoobinna, «Tinni Mageni elle ifixxenni ane'e atike erganji'a uwweexxe oosen» hiyye isoo laqe. 6 Eettene yanna meyyaxxi erganjuwwa ifixxe oosenninni dangeexxi butti'a heeshshine. 7 Ookkoneechchi udumi'a Liya oose ifixxenninni daggeexxi butti'a heeshshi hine; udumii'ni Raaheelinna Yooseefi dangeexxi insa'nenna heeshshi hine.

8 Eesawunna, «Ganemaa'naa uudennek kunni kuta kutak hori duuchchi maachcho?» Hiyye isoo qore.

Ya'iqoobinna «Anke gootta! Atenaa'n elle alfonaaten» hiyye.

9 Eesawu kinni «Anke dayyoo! Ani geyaachcho afeennen; ati ifi'a affetteechchi atinge kaduun» hiyye.

10 Ya'iqoobinna «Waawwo'o! Iittatebaan; ate'ni elle alfoonnole tenne ati'a uwwaannexxa uwwa adhdhi; eloxxenni anee uuddaattaxxee atika alba ani'a uushsho Mageniinka alba uudennexxe qixxen. 11 Mageni elle ifixxenni ani'a uwwe'naa hasisaachcho duuchcha afeennaxxe maganneten ati'a iyyedagennexxa uwwa anenaa'n adhdhi» hiyye. Ya'iqoobinna Eesawu'u yo'oshsha uttisemmaxxee Eesawunna uwwa ettenee adhdhe.

12 Eesawunna «Kexxaata me'ino; ani ati edo me'annon» hiyye.

13 Ya'iqoobi kinni isoo hiyyee qici, «Anke goota! Egendetteshshanna tinni oose dalqoten; iittanni kinni beltanna ifixxa ununsa'neeke gedhebi'aanna unusa'neeke lali'a ani'a xexxe'ata hasissaan; konnee hore manji mitte barra mudde ganoole duuchching hori mudaan. 14 Tennexxee anke gootta ati edi'a saxxe me'i; ani oosetixxenna horiinxe me'axxe qixxe'ni laana dage atee gootta anka Seeyir dhaqqabannon» hiyye.

15 Eesawunna «Eegataa anke manji giddii'n heenooka atinni welti gatiso» hiyye.

Ya'iqoobinna «Mayee tenne assitattota? Atee anke goottanaa'n elle alfa ani'a gelte'en» hiyye.

16 Tennexxee Eesawu eettene barra Seeyiri'a ille iima hige. 17 Ya'iqoobi kinni Sukooti'a me'e; ookko ifi'a mine, horekeenna fooqo olte; Tennexxee eettene bakkaki summi Sukoot* hiyyeme.

18 Ya'iqoobinna Mesipheexomiyii'n illee iima hige dagee wodda Kenaanike bogi giddo hedheeke Seekem hiyyemaake qachcha'n nage'inginni geye; ookko qachchi albi edi darrenna dunkaan olte. 19 Eettene dunkaane olteexxa bakka Hamoorixxe oosenaa'n dhibba sibljo birren hire; Hemoorinna Seekemike annamman.✝ 20 Ookkonna Ya'iqoobi tolchimalcho giisseexxi tolchimalchokanna Eeli Eloohe Isira'eel* hiyye summa fulche.