1 Ookkoneechchi uduma Duuchchi Woddike Goottik hiyyichchi Abiraami'n waleellati dageexxi:

«Koo Abiraam mee sodaat!

Ani atixxe wonten;

lumoki hiri atiki anenden» hiyye.

2 Abiraaminna hiyyee qici: «Ee Lumoke Duuchchi Woddike Gootta maa ani'a uutaatte? Ani ila belo gateennaxxee anxa karra dhaalak Demasiqoke manjo Eli'eezerten» 3 Abiraaminna, «Ati ane'e ila hoyyexxettaxxe karra anxa dhaalak anke minike eraganjon» hiyye.

4 Ookkoneechchi uduma Duuchchi Woddike Goottik hiyyichchi iso'n dageexxi, «Kunni manjichchi atee dhaalabaan; yaane kinni gudeeda atikenaa'n fuleenge atee dhaalaan» hiyye. 5 Duuchchi Woddik Goottinna Abiraamii gadhi'a fulcheexxi «Iimi'a uudi» ookkoneechchi uduma «Dandeettottole urjuwwa laakko'i horte atixxinna iittanni bira saxxaan» hiyye.

6 Abiraami Duuchchi Woddika Gootta amane; amana isixxinna qullummate'n laakko'ende.

7 Duuchchi Woddik Goottinna Abiraami hiyyee qici, «Konnee boga dhaaldotta'a ati'a uwwonna'a Keledatotike boginaa'n Uurinaan atee fulchennek Duuchchi Woddik Gootti anten» hiyye.

8 Yaane kinn Abiraaminna, «Lumooka Duuchchi Woddika Gootta kunni bogi anke kadaaxxa hitta ege'nanno?» Hiyye isoo qore.

9 Duuchchi Woddik Goottinna, «Sase woggaxxa raada, sase woggaxxa recconnaa, sase woggaka gedhechcho iittanni kinni faachchixxa amannaa guugenjo ani'a iyyedagi» hiyye. 10 Abiraaminna konneechcho duuchcha Duuchchi Woddike Gootti'a shiqishe, qixxe lame lameba hacaqqi asse fulcheechchi uduma hacaqqi assemeeka mitte mittinge lame dala'n, mitte mittinge kallachcha'n ugge; ci'a kinni lameba hacaqqi assebaangi iittanni waale. 11 Allaattuwwatinna konne lame lameba hacaqqi assememmaka maala itto'a daggaa wodda Abiraami shorre.

12 Arishsho e'ya shiqqammaxxa yanna Abiraami diiphe cokokk hiyyee wodda sodaachchissaaxxinna dimma dukana isoo buqqe. 13 Duuchchi Woddik Goottinna Abiraamii «Atixxi horte annafee boga'n keessummate kaddaaxxa kokke ege'n; insa'neenna shoole dhibba wogga miiccamik garbumma galchinaan. 14 Yaane kinni insa'nee garbumma galchemake manna'n ani muranno; insa'nenna ookkoneechchi uduma lumoxxa karra adhdhine fullaan. 15 Yaane kinni ati wogga goddite edike atike annuwwiba'a nage'ik me'itatton; elo qicininna moogendatton. 16 Horte atixxi sholgaxxe ila'n konne boga'n higgaan; konne qiconna turtaachchi Amooritotixxe cubboxxi buuda ta'i qico wo'ma gophpheemmaxxeeten.»

17 Arishsho e'yiteenaa bogi dukkanee wodda boosixxe giiraxxi wiliillenna buba'nee qaqqasunji leelleexxi lame lameba hacaqqi assememmake maalixxe oddonaa'n sa'e. 18 Eettene barra Duuchchi Woddik Gootti Abiraami'a hiyye kako aagee qici, «Gibtseke galaninaa'n Lumoke Efiraaxisike galaani qico'n hedheeka boga horte atixxee uwwannon. 19 Kunni insa'ne'a uwwanok bogi Qenaatotika, Qenizatitotika, Qaadimonitotika, 20 Hiititotika boga, Feeriizitotika boga, Raafatitotika boga, 21 Amooritotika boga, Kenaanitotika, Gergerisiitotika bogannaa, Iyyaabusitotike bogan» hiyye.