1 Edise Mageni iimuwwatannaa butta dade. 2 Buttatinna bifa affeemmabaaxxennaa duwwixxemman. Dukkanatinna lumoxxa abbaayya duuchcha buqqeemman, Mageniink Hafuuri wode'eke'n iima shalalisaamman.

3 Ookkoneechchi uduma Magenikinna «Ifa kaduun» hiyye, ifikinna ife.✝ 4 Mageni ifa eloke kadeexxa uude; ifakanna dukkanatenaa'n gargar hiisse, 5 Mageni ifa barrate, dukkanatanna hashshate hiyye summa fulche, bogikinna hashshe soodeen taakkaxxe barra kadde.

6 Mageni «Wode'e wode'ekenaa'n gargaritti hiissito'a dhisendeexxi iima wode'uwwiinxe oddo'n hexxuun» hiyye. 7 Tennexxee Mageni dhisendeexxa iima giisseexxi ise iimi darrennaa ise butta hedheeka wode'e gargaritti foye. Hiyyemmashshanni kadde. 8 Mageni dhisendeexxa iima «Iima» hiyye summa fulche. Bogikinna hashshe soodeen langaxxe barra kadde.✝

9 Ookkoneechchi uduma Mageni, «Iimat butti'a hedheek wodu'uwwi mitte booncho'n bukki hiyyowwaal, bago boginna leellowwaal» hiyye. Tinninna hiyyemmashshanni kadde. 10 Mageni bago boga «Buttina» hiyye summa fulche; mitteba bukki hiyyemmaka wode'e «Abbaayya» hiyye; Magenikinna tinninna eloxxe kaddeexxa uude. 11 Ookkoneechchi uduma Mageni, «Buttini gargaritti hexxeexxe gosaxxa latto duuchcha: badda'uwwa, gumma gummisaaka hiddichchuwwannna giddo sanne affeexxa gumma ra'issaaka haqichchuwwa fulchowwaal» hiyye; tinninna hiyyemmashshanni kadde. 12 Buttinikinna gargaritti hexxeexxe gosaxxa badda'uwwa, midha, gumma gummissaaxxannaa sanne affeexxa gumma ra'issaaka haqichchuwwa fulche. 13 Tinninna eloxe kaddeexxa uude; bogikinna hashshe soodeen; sakkaxxe barra kadde.

14 Ookkoneechchi uduma Mageni «Barratannaa hashsha gargaritti hiissaashsha barra, woggatanna baro leellishaashsha gargari hedheeki ifuwwi dhisendeexxe iima'ni hedhowwaal; baruwwa, haarso, bononnaa wogguwwa gargar hiissaake beesisa kaduun. 15 Kunni ifuwwi buttatee ifaashsha dhisendeexxe iima'n hedhuun» hiyye; tinninna hiyyeeshshanni kadde. 16 Konne qicinni Mageni lame lumolla ifa dade, shiixxok hashsha ifo'a, lumok ifi barra ifo'a iittanni urjuwwatanna dade. 17 Kunni ifuwwi butti'a ifaashsha dhisendeexxe iima'ni ugge. 18 Tennee asseechchi kunni ifuwwi hashsha barra ifo'aannaa ifa dukkanatenaa'n gargaritti hiisso'aten. Magenikinna tinni eloxxe kaddeexxa uude. 19 Bogikinna hashshe soodeen; sholgaxxe barra kadde.

20 Mageni «Hedho affeexxi gargaritti hexxeexxi daduwwa wode'eke'ni wo'mitowwaali; ci'atinna buttati iima dhisende hexxeexxe iima'ni phirrisowwaali» hiyye. 21 Konne qicinni Mageni lumolla wodi'i giddika biniinchanna wele gargaritti hexxeexxe gosachcho hedho afe le'maachcho duuchcha wodi'i giddo dade, iittanni gargar hexxeexxe gosaxxa ci'a dade. Magenikinnaa tinni eloxxe kaddeexxa uude. 22 Magenikinnaa tenne daduwwa, «Horre; bira sa'we; sanne ha'nooxxi abbaayyatika wode'e wo'mitowwaal, ci'atinna buttate'n bira saxxowwaal» hiyye eebbise. 23 Bogikinna hashshe soodeen; ondixxe barra kadde.

24 Magen «Butta gargaritti hexxeexxe gosaxxa hedho afeechcho duuchcha: horuwwa, biniincha, shiixxaramma lekka godobik me'aachchuwwa fulchitowaal» hiyye; tinninna hiyyeeshshanni kadde. 25 Konne qicinn Mageni gargar hexxeexxe gosaka horuwwa, gargar hexxeexxe gosaka biniincha, iittanni garga hexxeexxe gosaka godobik me'aachchuwwa dade. Magenikinna tinni eloxxe kaddeexxa uude.

26 Ookkoneechchi uduma Mageni «Manjo bifa no'oxxe'ninna fakkeenna no'oke'n dando, isinna abbaayya giddixxa qulxu'muwwa iima phirrisaaxxa ci'a, horekannaa biniinchaa, godobik me'aachchuwwannaa butta duuchcha'n moyowaal» hiyye.✝

27 Konne qicinni Mageni manjo bifa ifixxe'ni dade; Mageniinxe bifa'ni isoo dade; manjo labbakennaa meyyake asse dade.✝ 28 Magenikinna insa'nee «Horre; butta duuchcha wo'me; ise'nna mowwe; abbaayya giddixxa qulxu'muwwa, iima phirrissaaxxa ci'annaa buttate'ni lubbo afe le'maachcho duuchcha mowwe» hiyye eebbise.✝ 29 Ookkoneechchi uduma Magenikinna manjo «Itate ha'no'aa kado'a butta duuchcha'ni hexxeexxa midha, hiddichchuwwa, giddo sanne affeexxa gumma ra'issaaka haqichchuwwi duuchchi itate kado'a ha'no'aa uwwenne. 30 Iittanni buttatike hore biniinchi duuchchi'a, iima phirrissaaxxe ci'a duuchchi, godobik me'aachchuwwi duuchchi, lubbo afeechchi duuchchi ito'a haanjaka hiddichcho duuchcha uwweennen.» Tinninna hiyyemmashanni kadde. 31 Magenikinna dadeechcho duuchcha uude; duuchchiingechchi yo'oshsha elaamman. Bogikinna hashshe soodeeni; jiyaxxe barra kadde.