1 Ya'iqoobinna afeechcho duuchcha adhdhe ke'e; Bersaabehi geyee wodda anna ifike Yisaaqike Mageni'a tolcha tolche.

2 Mageninna hashsha waleellati Isira'eeli'n leelleexxi, «Ya'iqoobi! Ya'iqoobi» hiyye ye'e.

Isinna, «Hee! Kunna'a kabanni hedhennen» hiyye.

3 Mageninna iso'oo hiyyee qici, «Ani atike annike Duuchchi Woddike Gootta Magenoni; ati Gibtse'a me'a sodaattoxxe'e; ani atee ookko lumoke arda assannon. 4 Ani Gibtse'a atinni welti me'annon; ookko'ninna illee iima hiisse atee iyyedagannon; Yooseefinna ati bira hedhe haqaqaa'naa rertatton» hiyye.

5 Ookkoneechchi uduma Ya'iqoobi Bersaabehinaa'n ke'e; Isira'eelixxi labbaxxi oosenna anna ifika Ya'iqoobii ifixxa oosenna ifixxa aruwwa Feri'oon anna insa'neeke Ya'iqoobi'a ergemmaxxe fadhadiinxe gaarruwwa'n ofo'linshe. 6 Anfemmaka horenna Kenaanike boga'n horantemmaxxa karra adhdhineexxi Ya'iqoobinna horte isixxi duuchcha Gibtse'a me'ine.✝ 7 Ya'iqoob Gibtse'a me'eek ifixxa labbaxxa oosennaa tenne oosexxa labbaxxa oose, ifixxe meyyaxxa oosenna tenne oosexxa meyyaxxa oose adhdhe me'e; tinninna horte ifixxa duuchcha hiyyoten.

8 Gibtse'a me'iteexxi Isira'eelixxe oosek summi:

Ya'iqoobik angafi belti Roobeel.

9 Roobelixxi labbaxxi oose: Heenooki, Feluuso, Hatsirooninna Kermiten.

10 Simoonixxi labbaxxi oose: Yimu'eel, Yaamiin Oohaad, Yaakiin, Tsohaarinna Kenaanichcho ildeek Sa'uuliten.

11 Leewwixxa labbaxxi oose: Gershoon, Qe'aatinna Meraariten.

12 Yihudaxxi labbaxxi oose: Eeri, Onaane, Seela, Faareesinna Zaarahiten. Yaane kinni Eerinna Onaane Kenaaanike bogi giddo renne. Faaresixxi labbaxxi oose Hedironna Hamulitemman.

13 Yisakoorixxi labbaxxi oose: Toola, Faawa, Yoobinna Shiimirooniten.

14 Zabilonixxi labbaxxi oose: Sereddi, Elooninna Yahili'eeliten.

15 Tinni labbaxxi oosenna Diina hiyyendaxxa belto Ya'iqoobi Mesiphexoomiya hedhemma wodda Liya isi'a ildeexxe oosen. Duuchchinxe isixxe labbaxxenna meyyaxxe oosek laakkossi sase tommenna sasekemman.

16 Gaadixxi labbaxxi oose: Tsifoon, Haagi, Shuni, Eetsiboon, Eeri, Arodinna Ari'eelitemman.

17 Aseerixxi labbaxxi oose: Yiimina, Yesuwwa, Yesuwwinna Beri'aaten. Dayyo insa'nexxinna Seraahiten.

Berii'aaxxi labbaxxi oose: Hebeerinna Melkii'eeliten.

18 Tinni tommenna jaane oose Laaba belto ifixxe Liya'a uwwemmaxxi Zilifaan Ya'iqoobi'a ildeexxe oosen.

19 Ya'iqoobi are ifixxe Raaheelinaa'n Yooseefinna Biiniyaami'i i'le.

20 Yooseefi Gibtseke bogi giddo Minaasenna Efireemi i'le; isinna insa'nee Heliyootu* hiyyemmake qachchika qeesichcho Pheexxifaaraxxa belto Asinaatinaa'n i'leexxen.✝

21 Biiniyaamixxi labbaxxi oose: Beela'i, Bekeer, Ashibeel, Geera, Na'imaan, Eehi, Rooshi, Muufeemi,

Huufiimiinna Arditen.

22 Tinni tommenna shoole oose Ya'iqoobi Raaheelinaa'n i'leexxe oosennaa oosetixxe oosen.

23 Daanik beltinna Hushimiten.

24 Nefitaaleemixxi labbaxxi oose: Yahitsi'eel, Guni, Yetseerinna, Shileemiten.

25 Tinni torbaane oose duuchchiinxi, Laaba belto ifixxe Raaheeli'a uwwemmaxxi, Baala Ya'iqoobi'a ildeexxen.

26 Ya'iqoobinni welt Gibtse'a me'eek isike gudeedanaa'n fuleek manni, isixxe oosexxe aruwwa gahi darre, jaane tommenna jaaneten. 27 Yooseefi Gibtse boga'n i'leexxe lame oosenni mitteba Gibtse'a me'eeke Ya'iqoobike mini hadik laakkossi torbaane tommemman.✝ 28 Isinna Gesemi me'atee akeette adhdho'a Yihuda'a ediseexxi Yooseebaa erge; insa'nenna Geesemi genne. 29 Yooseefinna ifixxe fadhadiinxe gaare'n gulfeexxi anna ifika Isira'eeli'i qophedho'a Geesemi me'e; Yooseefi anna ifikiba geyeeshshanni gooba isike'n marxemeexxi qeeraaxxa yanna oodhe.

30 Isira'eelinna Yooseefii, «Lubbondinni hexxee'naa ille anxenni uudennechchinni yoona reyonnolenna shene'ee!»

31 Ookkoneechchi uduma Yooseefi ifika dayyuwwanna ifike annika mini hado hiyyee qici: «Ani Feri'ooniba ale marennexxi iso'n hiyye haaso'a noqici: ‹Kenaaan hedhemmak dayyuwwi ankinna anke annik mini hadi aniba dange'een. 32 Insa'nenna hore alla'laa mannan; insa'ne dangee wodda hore gedhebo ifika re'e ifixxa lalo ifika, iittanna wele anfeechcho duuchcha iyyedaqqine'een.› 33 Feri'ooninna ha'noo ye'iseexxi, ‹Huje ha'nooxxi maachcho?› Hiyye ha'noo qoraan, 34 ha'nonna, ‹No'o atik erganjuwwi huje no'oxxi no'oke annuwwishshanni oosummandenaa'n hore horachchoten› hiyye. Gibtsek manni hore horataaka manna diqataammaxxee'e, Geesemi hexxino'a eetti'i ha'no'a uwwaan.»