1 Ookkone wodda Abirihaami cime woggatanna godde. Duuchchi Woddik Goottinna Abirihaamii duuchchiinxenninni eebbiseemman. 2 Abirihaaminna isi'a ergataammake manni'a umoke kade isixxe karra duuchchika galchallo ifika erganjo ye'eexxi, «Anga atixxa gudeedi ankixxe oddo'ni uggi* 3 belto anke Yisaaqi'a konne ani hedhenneke Kenaanike bogixxa dubarte aadhissaboxxoshsha iimatannaa butta dadeeke Duuchchi Woddike Gootta Magenike summinni kakat, 4 yaane kinni ani ilemenneke bogiba'a marte anxe gosanaa'n anka belto Yisaaqii aadhissatton» hiyye.

5 Erganjinna, «Iitti beltichcho akimagaada anxa duuka kabaa dagatee macci hiyya gophoolenaa? Belto atika ati daggettake bogibaa illee iima hiissanno?» Hiyye isoo qore.

6 Abirihaaminna «Feetexxe kaddoolenna belto anka ookko'a illee iima hiissitoxxe; heqqedhi! 7 Ane ilemenneke boginaa'n anke annixxe baxxenaa'n fulcheexxi ‹Konnee boga atixxe horte'a uwwannon› hiyye kakate haaso'emmak iikki iimik Duuchchi Woddik Gootti Mageni anke belti'a okkoo'n aadhaaxxa belto affattoshsha ifixxa erganna ati edo ergaan. 8 Akimagaada beltichcho atinni dagatee macci hiyya gophoole kinni kakachchiissiinexxi kako atee abiddabaan; yaane kinni anka belto ille iima ookko'a hiissitoxxe» hiyye. 9 Tennexxee erganji anga gootta ifike, Abirihaamike gudeedixxe oddo'n uggeexxi tenne yaanexxee kakate.

10 Ookkoneechchi uduma erganjikinna ifike goottike gaaluwwanaa'n tomme aadheexxi, gootti ifiki horatemachcho duuchchanaa'ninna elolla miya fe'eexxi Naakoor hiyyemaake Mesiphexoomiyake qachchibaa me'e. 11 Bogi galgalo'a shiqamma wodda, melaale wode'e ikki'lito'a daggammaxxa yanna qachchi gadhi darre hexxeexxe wodi'iinxe bale qarqara gaaluwwa guluffachchiise. 12 Ookkoneechchi uduma isinna hiyyeexxi soodatee qici, «Ee anke goottike Abirihaamike Duuchchi Woddike Gootta Mageno! Dagennexxa yaane telcho ani'a qajeelchi; Abirihaamii anke gootti'aanna o'wi. 13 Ani ta'a kunnise tenne wodi'iinxe bale bira uurreennen; konne qachchik dubarrinna wode'e ikkilo'a kaba'a daga'neen; 14 Yoona ‹Odoolcho butta uggite wode'e ha'wonnaa ani'a uwwi› isee hiyyanno wodda, ‹Ya ha'wi; gaaluwwa atikeenna aninni towoo› anee hitaaxxi shaggitte ise erganjo atike Yisaaqi'a fildettexxe kaddowwaal. Konne qicinni ati gootta anke Abirihaamii o'witettexxa ege'nannon» hiyye.

15 Isenna soodachcho birebaangi Ribiqa odoolcho ba'exxe dagge; tenne beltok anni Betu'eeli hiyyemaan; isi Abirihaamik dayyi Naakoor are ifixxe Milkanaa'n i'leeken. 16 Tinni belto labballi ise maxxaneebaaxxenna danchumma ise'n hara qubbeexxe duuddo dubarrichchomman; isenna muumetibaa dirte, odoolchote'n wode'e wonshexxe higge. 17 Erganjikinna gonge iseba mareexxi, «Magannete ha'wonaa shiixxoka wode'e atixxe odoolchonaa'n ani'a uwwi» hiyye.

18 Isenna, «Anke gootta ha'wi» hiteexxi rakke rakke odoolcho tilqiteexxi ha'wo'a uute. 19 Ha'wo'a isi'a wode'e uuteechchi uduma iso'o, «Ha'weexxi goddaa qici'a, wode'e atik gaaluwwi'aanna aninni ikkilannon» hite. 20 Rakkeexxinna odoolcho giddii'n wode'e gongake'n fulchite; gongite marteexxi baletanaa'n wode'e ikkilda'n, goddaa qico'ni isika gaaluwwanna ha'wisse. 21 Erganjikinna, mittelcho ise'n bucuqi hiyyebaangi Duuchchi Woddik Gootti yaada isika qajeelchexxanna qajeelchebaaxxa afatee belto assita'nemmaxxa yaane hubate uuda'nemman.

22 Gaaluwwikinna ha'we ke'eechchi uduma, manjichchi jaane giraama geyaaka lame worqetika gutichcha aadheexxi mansha isexxe'ni ugge; dhibbanna tomme giraama geyaaka lame worqetika hirbooranna anga isexxe'ni uggeexxi, 23 «Ati ayyixxe belto? Anni atikike mine'ni meya gallannobi hedhoole, maganne ani'a kuli» hiyye ise qore.

24 Isenna «Ani Baatu'eelixxe belton; Baatu'eeliki anninna Naakooriten; ama isixxinna Milkaten» 25 Higgeenna lebbeexxi, «No'oba mine geyaak kummubanna hicaci hedheen; iittanni hano'aanna galdinaaxxa bakka anfeennen» hite.

26 Manjichchikinna kumbuyye Duuchchi Woddika Gootta sagada'n 27 hiyyee qici, «Mararte ifixxanna addatensha ifixxa gootta ankenaa'n hoyyedhebaak anenna anke goottike firba'a ora anka qajeelcheek Abirihaami anke goottik Duuchchi Woddik Gootti Mageni saademowwaal» hiyye.

28 Beltichchotinna gongite marteexxi tenne yaane duuchcha amatike hado'n kulde. 29 Ribiqa Laaba hiyyemaaka dayyo affe'emman; Laabanna iikki manjichchi hedheexxe wodi'iinxe baleba'a rake mare. 30 Dayyo ifixxi manshate'ni uggudhdhiteexxa worqe angate'ni uggudhdhiteeka worqetika hirbooruwwa uuddeeshshanni, iittanni Ribiqa manjichchi ise'n heyyeexxa haassottaa'naa laqeeshshanni hirbange'n manjichchiinba mare; manjichchokanna wodi'iinxe bale qarqara gaaluwwi bira uure'naa afe. 31 Isinna manjichcho, «Ati eebbisendeettek Mageniink manji amo, kaba gadho maa uurritatto? Kunnise ani ati galdattoba, gaaluwwa atikenna galdumiinba qixxesse'en» hiyye. 32 Tennexxe manjichchi Laabanni welti mini'a me'e; gaaluwwakenaa'ninna ba'o tikeexxi hicace ito'a uwwe; isi'aanna isinni welti hedhemmak manni'aanna lekkatika wode'e uwwe. 33 Itatinna manjichchoke shiqqe; manjichchi kinni, «Dagennexxa yaane haaso'ebo'nok itabo'no» hiyye; Laabanna «Eloxxen haasottaata» hiyye.

34 Tennexxee manjichchi hiyyee qici, «Ani Abirihaamike erganjon; 35 Duuchchi Woddiki Goottinna anka gootta lumo qico eebbise duroonseexxi heddo gedhebo, heddo re'e, heddo lalo, gaaluwwa, harruwwa, birre, worqetanna iittanni meyya labbaka erganjuwwanna isi'a uwwe. 36 Saara, anke goottixxi are cimo ifixxi giddo labbaka belto ilde; gootti anikinna afeechcho duuchcha konne belti'a uwwe'en. 37 Anki goottinna anee hiyye kakachchisee qici, ‹Anka belto ani hedhenneke bogixxa Kenaanitotixxa dubarte aadhissoxxe. 38 Yaane kinni anke annike mini hadibaanna anke firbaa marte aadhaaxxa belto, anke belti'a iyyedagi› hiyye. 39 Aninna gootta anka ‹Akimagaada iitti belto anxa duuka daga gophoolena'a?› Hiyye qorenne. 40 Isinna ane'n hiisse hiyye haaso'ee qici, ‹Ikki ani isi'a duuchchi wodda ajajemaannak Duuchchi Woddike Gootti ifika iimika erganjo atixxa duuka ergeexxi ora atika ati'a qajeelchaan; konnee qicinni atinna anke annike mini hadibaa'ninna anke firibaa'n marte aadhaaxxa belto anke belti'a iyyedagatton. 41 Yaane kinni ati anke firba martee'naa insa'ne beltichcho uwwa ginboole, tinni kakattettexxi kako atee abiddabaan› anee hiyye.

42 «Aninna telcho kaba wodi'iinxe baleba geyenne wodda hiyye soodatene qici; ‹Anke goottik Abirihaami'i Duuchchi Woddike Gootta Mageno maganneten dagennexxa yaane ani'a qajeelchi. 43 Ani ta'a kunnise konne wodi'i qarqara uurreennen; wode'e ikki'lito'a daggaaxxa dubarichcho, «Ballo magannete ha'wona'a shixxoka wode'e atixxe odoolchonaa'n ani'a uwwi» hiyye'naa. 44 Isenna, «Hii'i, ha'wi; atike gaaluwwi'a aninni towaannon» hitaaxxi ise Duuchchi Woddike Gootti anke goottike belti'a qixxeessexxe kaddowwaal› hite.

45 «Ani qalbe giddo soodatannexxa soodachcho birebo'nongi Ribiqa wode'iinxa odoolcho ba'exxe turufi hite. Isenna wodi'iinxe balebaa dirrite wode'e ikki'lte; aninna isee, ‹Ballo maganneten ha'wonna'a wode'e ani'a uwwi› hiyyenne.

46 «Isenna rakke odoolcho tilqiteexxi, ‹Ya, ha'wi; gaaluwwa atikeenna aninni towannon› hite. Aninna ha'wenneni; gaaluwwakeenna isenni toowotte. 47 Aninna isee, ‹Ati ayyixxe belto?› Hiyye qorenne. Isenna ‹Aniqqa Baatu'eelixxe belton, Baatu'eeliki anninna Naakooriten; isixxi amanna Milkaten› hite.

«Ookkoneechchi uduma ani gutichcha mansha isexxe'ni uggenne, hirboorakanna hirre isexxe'ni uggenne. 48 Ookkoneechchi uduma Duuchchi Woddike Gootta heeshshi hiyye magenoofatenne; anke goottike belti'a isike dayyixxa belto iyyedagonnaa ora ani'a qajeelcheeka anke goottika Abirihaamika Duuchchi Woddika Gootta galteefatenne. 49 Yoona ta'a anke gootti'a o'watixxanna dhugaatixxa yaane assitina'noole ane'n kulle; kadda gophpha'noole kinni hitina'neexxa hiyye hiissitebaa higo» hiyye.

50 Laabanna Baatu'eeli hine hiissine haasonee qici, «Tinni yaane Duuchchi Woddike Goottinaa'nite kaddemmaxxe no'o elo yo'oxxa ate'ni hiissine haasonannoxxi hexxebaan. 51 Kunnise Ribiqa adhdhite me'i; Duuchchi Woddik Gootti haaso'emmashshanni isee atike goottike belto'n heerunsiis» hine. 52 Abirihaamik erganjinna insa'ne hineexxa tenne laqeexxi kumbuyye Duuchchi Woddike Gootta sagade. 53 Ookko'n Ribiqa'a birrete sibilgininna worqeti giissemeeka seesuwwa, iittanni seemma Ribiqa aadhe uwwe; iittanni kinni isexxe ama'annaa iseke dayyi'a hiri fiixeeka badhaasa gice. 54 Ookkoneechchi uduma Abirihaamik erganjinna isinni hedhemmak manni inde ha'wine ookkonni galle.

Langa baro gorsa Abirihaamik erganji, «Yoona anke goottibaa illee iima higannoshsha asse» hiyye.

55 Yaane kinni Ribiqak dayyinna ama, «Beltichcho tomme barra qico no'onni hexxuun; konneechchi uduma me'itinaan» hine.

56 Isinna kinni insa'ne'ni, «Duuchchi Woddik Gootti ora anka qajeelcheen anee tursitinoqqe; anke goottibaa illee iima higannoshsha asse» hiyye.

57 Insa'nenna, «Beltichcho ye'ne hitaaxxa lanqo» hine. 58 Tennexxee insa'ne Ribiqaa ye'neexxi, «Konne manjichchinni welti me'atee hassaatte?» Hine isee qorre.

Isenna «Eeti me'anno» hite.

59 Insa'nenna ifixxa dayyo Ribiqa'a, isee ba'exxammaxxe manjichcho iittanni Abirihaamike erganjonna isinni welti hedhemmaka manna me'aashsha assine. 60 Insa'nenna Ribiqaa'a,

«Tee no'oxxe dayyo ilde hori hochchoke'ni qoodi;

kumiinxe kade;

horte atixxi atike naaphika qachchuwwa dhaaldowwaal» hine eebbinse.

61 Ookkoneechchi uduma Ribiqanna isexxi erganjuwwa me'atee qixxeefante; ifi fike gaaluwwa'n gulunfe Abirihaamike erganjixxa duuka me'ine. Konne qicinni Abirihaamik erganji Ribiqaa adhdhe me'e.

62 Ookkone wodda Yisaaq Negeebike boga'n hedhaammaxxee Bi'eeri Laahi Roo'i dageemman. 63 Galgala mitte Yisaaqi hede herga'n diidi giddi'a fuleemma; isinna tami asse uuddaa wodda gaaluwwi daga'naa afe. 64 Ribiqanna tami hitte uuddaa wodda Yisaaqii affe; gaalakenaa'ninna dirriteexxi, 65 «Ikki diidi giddii'n no'obaa daga'neek manji ayyete?» Hite erganjo qorte; erganjikinna, «Anke goottan» hiyye. Isenna shaasheti alba buqexxe.

66 Erganjikinna asseexxa yaane duuchcha Yisaaqi'n haaso'e. 67 Ookkoneechchi uduma Yisaaqi ama ifixxi Saara hexxamake dunkaane giddi'a Ribiqaa'a adhdhe e'yeexxi aadhe. Yisaaqinna isee yo'oshsha eeyye. Yisaaqinna amatixxe re'yo uduma dayyeffate.