1 Mageni kinni Nohinna Lumoxxe Hobolo giddo isinni welti hedhemmaka biniinchuwwannaa hore duuchcha hede; buttate'ni diidallo diidaleessitaashsha asse; wodi'ikinna xe'ye. 2 Hundixxe baarixxi muummuwwannaa iimike wodiixxi huluwwa cufende; xenikinna gana uurrise. 3 Wodi'ikinna buttatenaa'ni barra barra'nini shiixxishe xe'ya'ni dage; dhibbanna onde tomme barra uduma xe'ye. 4 Torbake agenjixxe tommenna torbaxxe barra'ni Lumoxxi Hobolonna Araarati koobuwwa'ni hana dage kiphatte. 5 Wodi'ikinna tomme agenji qico'ni shiixxishe xe'ya'ni dagee'naa tommixxe agenjixxe taakkaxxe barra'ni koobuwwatixxi xungo leellite.

6 Nohi shoole tomme barra uduma giissemmaxxe Lumoxxe Hobolotixxa masikoote hula bane. 7 Qoodhandekanna gadhi'a wocci assee; Qoodhandikinna wodi'i buttatenaa'ni bagaa qico'ni eelqe kayya phirrasa'emman. 8 Ookkoneechchi uduma Nohi wodi'i buttatenaa'ni xe'yeexxa uudatee guugenjotanna gadhi'a wocci asse. 9 Yaane kinni wodi'i butta duuchcha buqeeshshanni hedhemmaxxee guugenjo Nohi hedhemmaxxe Lumoxxe Hoboloba'a ille iima higge dagge; tennexxee Nohinna anga ifixxa gadhi'a fulche ise'e Lumoxxe Hobolo giddi'a aadhe. 10 Torbaane barra tureechchi uduma Nohi guugenjo higgeenna gadhi'a wocci asse. 11 Isenna eettene galgala ejeersiinka shafa ga'mexxe Nohiba illee iima higge; konne qicinni Nohi wodi'i buttatenaa'ni xe'yeexxa ege'ne. 12 Torbaane barranna tureechchi uduma Nohi guugenjo higgeenna gadhi'a wocci asse; eettene yanna kinni guugenjo isiba'a ille iima higgebaangi gatte.

13 Nohi ilemeexxe 601 wogga'n takkaxxe woggake taakkaxxe barra'n wodi'i bage. Ookkenechchinn uduma Nohinna Lumoxxe Hoboloka buyyisanjo Lumoxxe Hobolonaa'n hoyyeexxi wodi'i buttatenaa'n bageexxa afe. 14 Langake agenjixxe lame tommena torbaxxe barra'n wodi'i buttatenaa'n xo'o hiyye bage.

15 Ookkoneechchi uduma Magen Nohi'i hiyyee qici: 16 «Ati are atixxa, oose atixxannaa oose atixxixxa aruwwa aaxxe markabi giddii'ni fulle. 17 Atinni welti Lumoxxe Hobolo giddo hedheechcho lubbo afeechcho duuchcha ci'a, hore, biniinchcha, godobiki me'aachchuwwi duuchchi buttate'ni hore bira sa'aa hoboloti giddii'n aaxxe fulchi» hiyye.

18 Tennexxee Nohi are ifixxa oose ifixxannaa oose ifixxixxa aruwwa aadhe hobolo giddii'n fule. 19 Hor duuchchi, biniinchuwwi duuchchi, ci'a, godobik me'aachchuwwi duuchchi gosa gosashshanni hoboloti giddii'ni fule.

20 Ookkoneechchi uduma Nohi Duuchchi Woddike Gootti'a tolchimalcho giisseexxi batto'ebaake horenaa'ni biniinchuwwanaa'ni, iittanni battoottebaaxxe ci'anaa'n mitte mitte aadheexxi okkone tolchimalcho'n ciinceesse. 21 Duuchchi Woddik Goottinna fishshaaka tolchiinka foole laqeexxi ifixxe qalbe giddo: «Manjiink yaadi oosummandenaa'ni fuggoxxe'ni me'eeke kaddoolenna midde isixxe balleessa'a hiyyennexxi ta'inni udumi'a butta badabo'non; ta'a assenneshsha hedho afeechcho duuchcha langaxxa birbo'no.

22 «Butta hexxee qico'n,

Wiilsatixxinna bukki asseccatixxi;

Haarsikinna boni; qiidikinnaa eebbinji,

hashshatinnaa barra hara uurritabaan.»