1 Addaamixxe horettek daali konnechchi butti'a hedheeshshaten. Mageni manjo dadee wodda fakke ifixxe'ni dade.✝ 2 Labbakennaa meyyaxxe asse dade. Dademmee woddanna insa'ne «manjo» hiyye summa fulche.✝ 3 Addaaminna ileemeexxe 130 wogga'n isoo fakkaataaka labba belto i'le; summa isikanna «Seeti» hiyye fulche. 4 Addaami Seeti i'leechchi uduma 800 wogga tureexxi wele labbaxxannaa meyyaxxa oose i'le. 5 Addaami 930 wogga ture reye.

6 Seeti ilemeexxe 105 wogga'n Heenoosi i'le. 7 Seeti Heenoosi i'lee uduma 807 wogga tureexxi wele labbaxxannaa meyyaxxa oose i'le. 8 Seetinna ilemeexxe 912 wogga'n reye.

9 Heenoosi ilemeexxe 90 wogga'n Qayinaani i'lee. 10 Heenoosi Qayinaani i'le uduma 815 wogga tureexxi wele labbaxxannaa meyyaxxa oose i'le. 11 Heenoosinna ilemeexxe 905 wogga reye.

12 Qayinaani ilemeexxe 70 wogga'n Melali'eelin i'le. 13 Qayinaani Melali'eelin i'lee uduma 840 wogga tureexxi wele labbaxxannaa meyyaxxa oose i'le. 14 Qayinaani ilemeexxe 910 wogga'n reye.

15 Melali'eelin ilemeexxe 65 wogga'ni Yaareedii'i i'le. 16 Melali'eelin Yaareedii i'lee uduma 830 wogga tureexxi wele labbaxxannaa Meyyaxxa oose i'le. 17 Melali'eelin ilemeexxe 895 wogga'n reye.

18 Yaareedi ilemeexxe 162 wogga'ni Heenok i'le. 19 Yaareedi Heenooki i'lee uduma 800 wogga tureexxi wele labbaxxannaa meyyaxxa oose i'le. 20 Yaareedinna ilemeexxe 962 wogga'n reye.

21 Heenooki ilemeexxe 65 wogga'ni Maatusaala i'le. 22 Heenooki Maatusaala ileechchi uduma Mageniinka ora hordofa'ni 300 wogga gale; wele labbaxxannaa meyyaxxa oose i'le. 23 Heenooki ileme tureexxi wogga duuchcha 365 woggan. 24 Heenookinna Mageniinka ora hordofeen, ookkoneechchi uduma Mageni isoo adhdhemmaxxee afemebaan.✝

25 Maatusaala ilemeexxe 187 wogga'ni Laameehi i'le. 26 Maatusaala Laameehi i'leechchi uduma 782 wogga tureexxi wele labbaxxannaa meyyaxxa oose i'le. 27 Maatusaala ilemeexxe 969 wogga'n reye.

28 Laameehi ilemeexxe 182 wogga'ni labba i'le. 29 Laameehinna «Kunni belti tenne Mageni badeexxe butta'n no'oxxe hunnatixxe hujenaa'ninnaa elonaa'n no'oo foorfachchiisaani» hiyya'ni isika summa «Nohi»* hiyye fulche. 30 Laameehi Nohi i'lee uduma 595 wogga tureexxi wele labbaxxannaa meyyaxxa oose i'le. 31 Laameehi ilemeexxe 777 wogga'n reye.

32 Nohi ilemeexxe 500 wogga uduma sase labbaxxa oose Seemii, Kaamiinnaa, Yaafeetii i'le.