1 Edi wodda Abirihaamike baro'n bogake'n e'yemmake solo'i gadho higgeen weli so'lo'i e'ye; tennexxee Yisaaqi Filisixeemik moyanji Abemelek hedheeba'a Giraari'a me'e. 2 Ookko Duuchchi Woddik Gootti Yisaaqi'n leelleexxi, «Ani ate'n kulaanneke boga'n ofo'li malee'e adadde Gibtse'a me'itoxxe. 3 Yannate kabanni konne boga'n hedhi; ani atinni welti hedhannon; ateenna eebbisannon; boga konne duuchcha ati'aanna atixxe horte duuchchi'a uwwonna'a anna atike Abirihaami'a aageennexxa kako muuxannon. 4 Horte atixxa iimixxe urjeshsha bira sa'issannon; konnee boga duuchchiinga horte atixxe uwwannon; horte atixxi darree'ni buttatik gosa gosaki ardi duuchchi eebbisemaan.✝ 5 Ani tennee ati'a assaannechchi anni atik Abirihaami hiyyichcho anka laqe, ajaja, aada anxanna seera anka duuchcha heqqedhemmaxxeeten» hiyye.

6 Tennexxee Yisaaqi Giraare ofo'le. 7 Ookkone boonik manni Yisaaqii «Ribiqa ati'a maa kadda?» hine lanqee wodda «Anxe dayyon» hiyye; tenneenna hiyyeechchi «Ribiqa hara danchate kaddemmaxxee ookkone bogik manni isexxe buuto'a anee shiyan» hiyyati sodaateemmaxxeeten.✝ 8 Yisaaqi heddo yanna okko hedheechchi udumi'a Filisixeemi moyanji Abemelek mitte barra masikootteenaa'n gadhi uudaa wodda arenna aro'iinxa roorro Yisaaqi are ifixxe Ribiqanni roorra'naa afe. 9 Abemelekinna Yisaaqii ye'iseexxi, «Ise atixxe are kaddee'naana mayee ‹Ise anxe dayyon› hitette?» Hiyye isoo qore; Yisaaqinna «Isexxe buuto'a reyabo'noshsha hiyyeeten» hiyye hiisse iso'n haaso'e. 10 Abemelekinna isoo, «Tinni ati no'o'n assitettexxi yaane maachcho? No'ok ardi giddii'n mitti manji are atixxenni diiphe gateen; atinna no'oo balleessa iyyedagge gattetten» hiyye. 11 Ookkonneechi uduma Abemelek, «Konne manjichchonna kadi are isixxa tuqaak manji shiyemaan» hiyye arda duuchcha ajaje.

12 Yisaaqinna ookkone boga'n sanne roke; Duuchchi Woddiki Goottinna isoo eebbisammale eettene wogga'n dhibba anga aassedhe. 13 Isinna hara dureessa manjo kadaa qico'n karra karrande'n lebenda'n me'ite. 14 Yisaaqinna heddo gedhebo heddo re'enna heddo lalo, iittanni heddo erganjuwwa afeemmaxxee Filisixeemik manni isoo gaabbe. 15 Tennexxee Filisixeemito anni isik Abirihaami lubbot hedhemma wodda Abirhaamik erganjuwwi qotemmaxxa wodi'iinxa baluwwa duuchcha buttina wonshine duuchchine.

16 Abemelekinna Yisaaqi'i, «No'o caala hara worbitettaxxee, no'o giddii'n ful» hiyye.

17 Tennexxee Yisaaqi eettene bakka waaleexxi Giraarixxe Dhooqa'n okko ofo'le. 18 Yisaaqi anni isiki Abirihaami lubbo hedhemma wodda qotende hexxemmaxxa, anni isik reyee wodda Filisixeemito duuchchiteemmaxxa wodi'iinxa baluwwa haaroba qotendaashsha asseexxi, anni isik edi wodda fulchemmanga summa tenne baluwwa'a langaxxa fulche. 19 Yisaaqik erganjuwwi dhooqa giddo qoteexxi eloka muummetika wode'e afe. 20 Yaane kinni Giraarike bogixxi allalisano, «kunni wodi'i no'oken» hita'n Yisaaqixxe allalisanon lolendeen; tennexxe Yisaaqi eettene baleka wode'e «Eseeq»* hiyye summa fulche. 21 Yisaaqik erganjuwwi langaxxa wele wodi'iinxa bale qote; tenne balexxe buuto'aanna weli loli ke'e; tennexxee Yisaaqi «Siixinna»* hiyye tenne baleka summa fulche. 22 Yisaaqinna eettene bakka waaleexxi wele bakka'n wodi'iinxa bale unsiise; eettene yanna kinni tenne balexxee ayinna loleek hedhebaan; tennexxee, «Duuchchi Woddik Gootti ta'a ba'laka boga no'aa uwween, no'onna horre butta wo'minannon» hiyya'n summa baletiinka Rehoboot* hiyye fulche. 23 Ookkoneechchi udma Yisaaqi Bersaabehi'a me'e. 24 Eetteneenni hashsha Duuchchi Woddik Gootti Yisaaqi'n leelleexxi, «Ani anna atike Abirihaamike Magenon; Ani atinni welti hedhenneni sodaattoxxe; Ani erganjo Anke Abirihaami'a aagennexxe kako'a hiyye'e atee eebbisannon; horte atixxanna bira sa'issanannon» hiyye. 25 Yisaaqinna eettene bakka'n tolchimalcho giisseexxi Duuchchi Woddike Goottika summa ye'edhe; dunkaanetanna okko olte; erganjuwwi isikinna ookko wodi'iinxa bale ume. 26 Abemelek Ahuzeeti hinaake ifike mari'etike manjichchinninna ifike loliinke mannike ajajallo Fikoolinni welti Yisaaqibaa Giraari'ni dage.✝ 27 Yisaaqinna, «Anee gibbine shorrtineechchi uduma ta'a anibaa mayee daggine?» Hiyye. 28 Insa'nenna hine hiissine haasonnee qici, «Duuchchi Woddik Gootti atinni welt hedheexxa ca'assine uundeennen; tennexxee no'o, ‹Atixenna no'oxxe oddo'n kakotixxe weli aaggo hexxuun› hine. Tinninna atixxenna no'oxxe oddo'n hexxaaxxe kakotixxe weli aaggonni. 29 No'o atee miinbo'noshsha yaane kinn eloxxa calla ati'a assinenneshsha nage'ik anee geegesinennesha atinna fuggoxxa no'o'n assitaboxxoshsha atixxennaa no'oxxe oddo'ni weli aaggotixxa kako assino. Atee woldonni Mageni eebbise'een» hine. 30 Ookkoneechchi uduma Yisaaqinna konne manni ite ha'waachcho qophpheese; insa'nenna inde ha'wine. 31 Langa baro gorsa ke'neexxi kakot weli aange; Yisaaqinna insa'ne me'inaashsha asse'naa insa'nenna nage'ik me'ine. 32 Eettene barra'ni Yisaaqik erganjuwwi dageexxi ummeemmaxxe balexxa iso'ni kulle; «Wode'e alfinenna» hina'n iso'n kule. 33 Yisaaqinna wodi'iinxe baleka summa «Saabehi»* hiyye summa fulche, tennenaa'ni kexxeexxa ookkone qachchik summi telchi qico'ni «Bersaabehi» hiyyeme ye'emaan.

34 Eesawu shoole tomme wogga geyee wodda Heexxichcho Bi'eerixxa belto Yooditi, iittanni Heexxichcho Eloonixxa belto Baasemati aadhe; lamiingi Hiititotemman. 35 Tinni Eesawu aadheexxi dubartexxe buutonni Yisaaqixxinna Ribiqaxxi qalbe gubaatamman.