1 Barra saafo'a Abirihaami Maamirexxe songoxxe haqqe bira hedheeke ifixxe dunkaaniinxe hula edo ofo'lee'naa Mageni iso'n leelle. 2 Tammi asse uudaa wodda sasi manni ookko uurre'naa afe; hirba okkone'n dunkaaniinxe hulanaa'n ke'eexxi insa'ne yaansiso'a rake ookkone insa'ne uurineba mare; albik butti'anna gonbisemeexxi anga iimi'a ke'isse.✝ 3 Abirihaaminna hiyyee qici, «Anke gootta atenaa'n elle alfoonnole anee garbichcha atikenaa'n saxxe me'itoxxe. 4 Wode'e iyyedagee'na'a lekka anshexxine ookkone haqichchi hunda qiidiffatte. 5 Anee ha'nooke erganjiba daggineechchinni jabaattine ora me'itino'a ittinaachcho ha'no'a iyyedago; insa'nenna isoo, eloxxen hitetteshshanni assitaa» hine.

6 Abirihaaminna Saara hexxeexxe dunkaane giddi'a rakkee mareexxi isee «Rakke anga giddo eebbite sase hubbuqitte qore shaqaxxa bulle qushshite kebbis» hiyye. 7 Ookkoneechchi uduma Abirihaami hornba'a rake mareexxi hori giddii'n mitte munde afeeka kurkura jibichcha aadheexxi qixxeesso'a erganjo ifike'n uwwe; erganjikinna jibbichcha wiinamik duleexxi shiqishe. 8 Abirihaami keessummatee itichcha, mi'enna iittanni qixxeessemmake jibichchiinka maala shiqishe. Indaa wodda duuchcha Abirihaami insa'nee bira haqichchi hunda uurreemmaan.

9 Insa'nenna Abirihaamii, «Are atixxi Saara haba hexxe?» Hine qorre.

Isinna «Dunkaane giddo hexxeen» hiyye.

10 Insa'ne giddii'n mitti Abirihaamii'i, «Ani dagaa sane iittee wodda telchishshanni atiba dagannon; are atixxi Saaranna labba belto ildaan» hiyye.

Isi tenne haaso'aa wodda Saara isi udumi darre hexxemmaxxee dunkaaniinxe hula edo uurte laqqaamman.✝ 11 Okkone wodda Abirihaaminna Saara lamiingi cimme lumooshsha wogga goddine'emman; Saaranna ildaaxxi yanna saxxe'emman. 12 Saaranna godobi giddo, «Ani cime bututeennechchinni, gootti ank Abirihaaminna cimeechchi haba hedhennexxe anke aro'inni dhiipho yorannota?» Hita'n osolde.✝

13 Mageninna Abirihaamii hiyyee qici: «Saara ‹Cimennechchi udumata ilanno?› Hita'n osoldeechchi mayeete? 14 Isi Mageni dande'abaaxxi yaane hexxee? Dagaa sane iitteexxe yanna'n atiba'a illee iima hige daganon; Saaranna labbaka belto ildaan» hiyye.✝

15 Saaranna sodattemmaxee, «Aniqqa oso'lebo'no» hite waakkatte.

Isi kinni, «Waawwo'o osoldeetteqqa» hiyye.

16 Mannikinna me'aa ke'eexxi Sedoomike qachchibaa adadde uude; Abirihaaminna insa'ne geegesso'a welti me'e. 17 Duuchchi Woddik Goottinna, «Ani assannoxxa yaane Abirihaaminaa'n sho'annota? 18 Abirihaami lumokennaa worba arda kadaan; butta duuchchik arduwwanna isi darree'n eebbisemaan. 19 Qullittenna dhugaatixxa yaane assiyyot Duuchchi Woddike Goottika ora heqqexxo'a oose ifixxanna isiba'a uduma ifika mini hado ajajo'a isoo fileennen; tinninna isixxi oose tenne assitoole Duuchchi Woddik Gootti Abirihaami'a addachchiise haaso'emexa duuchcha muuxaminba'a iyyedago'aten» hiyye.

20 Higgeenna Duuchchi Woddik Gootti hiyyee qici: «Sedoomikanna Gomorake qachcha'n laqenda'neexxi raare hara bira saxxeen; hunja'neexxi cubbonna hara ha'urteexxen. 21 Insa'ne assineexxi yaane aniba gelteexxe raareshsha yaane kaddoole uudonna'a dirraannen; iittanna kada gophpholenna ege'nannon» hiyye.

22 Ookkoneechchi uduma kunni lami manni Sedoomi'a ke'e me'e; Abirihaami kinni Duuchchi Woddike Gootti edo uurreshshanni hedhemman. 23 Abirihaaminna Duuchchi Woddike Goottibaa shikki hiyyeexxi hiyyee qici: «Dhugaandinni qulliyye manna cubbaaleeyyet welti mittenba birtattota? 24 Qachchi konne giddo onde tomme qullichchi manni hedhoole okkone onde tomme qullichchi manni'a hitettexxi okkone qachchi'a gattowwaal hitaboxxoota? 25 Qullichcha manna cubbaalleeyyeti welti mittenba birtatton hiyye hedabo'no; tenne assitaboxxoxxa addataannen; tenne assitottole qullichchi manni cubballeeyyeti welt mitteba muddeeyyote'n; tinni hara kaddaxxebaan; ati butta duuchcha'n dhugaatixxa murte murtattoken» hiyye. 26 Duuchchi Woddik Goottinna «Sedoomike qachchi giddo onde tomme qullichchi manji hedhoole insa'neexxe hiyyennexxi okkonee qachcha duuchchi'a gattowwaal hiyyannon» hiyye.

27 Abirihaam higgeenna hiyyee qici: «Ani woyi fulabo'noke buttinanna bululoke kaddeenne hedhennexxi woldo hige atee gootta ankenni welt soda'abelo haaso'ennen. 28 Akimagaada qullichcha onde tomme ookkone giddii'n ondi xe'yoole, ookkone xe'yemmake ondi'a hite ookkone qachcha duuchcha balleessitatto?» Hiyye qore.

Isinna, «Shoole tommenna onde qulliyye manni qachchi giddo afemoole qachcha konnee balleessabo'non» hiyye hiisse.

29 Abirihaami higgeenna, «Akimagaada shooli tommi qulliyye calli afendoolena?» Hiyye qore.

Isikinni «Ookkone shoole tommi'a hiyye qachcha konne balleessa waalannon» hiyye hiisse.

30 Abirihaaminna «Anke Gootta ballo mufattoxxe'e higgeenna haaso'aannen; dedha kinni sasi tommi qullichchi manni calli afemoolena?» Hiyye qore.

Isikinni «Sase tomme afonnole balleessabo'non» hiyye hiisse.

31 Abirihaaminna «Atee anke Goottinni haaso'eena'a yoona woldo soda'abelo haaso'eennen, akimagaada lami tommi calli afendoolena?» Hiyye qore.

Isinna «Lame tomme calla kadoolenna insa'ne'aanni hiyye qachcha konnee gattowwaal hiyyanno» hiyye hiisse. 32 Abirihaaminna, «Duuchchi Woddike Gootta ballo mufattoxxen ta'a yoona mittele calla qoraanne; akimagaada tommi calli afemdoolena?» Hiyye qore.

Isinna «Okkone tommi'a hiyye qachcha konnee balleessa waalannon» hiyye hiisse. 33 Duuchchi Woddik Gootti Abrihaaminni haaso'ammaka haaso'a bireechchi uduma me'e, Abirihaaminna mine isikibaa illee iima hige.