1 Mageni Ya'iqoobii «Kexxettexxi alalle Beeti'eeli'a me'i; okkonna ofo'li; dayyo atike Eesawunaa'n baajje me'itetta wodda ate'n leellemmake Mageni'a okko tolchimalcho ijaari» hiyye.✝

2 Tennexxee Ya'iqoobi isika mini hadonna isinni welti hedhemmaka manna duuchcha, «Ha'no konne afineeka alaga magenuwwa fugusse; ca'ichake kadde; seemma ha'noxxanna jijjiidhe. 3 Ke'we alalle Beeti'eeli'a me'ino; ookkonna rakko anxi baro hiissichcho ani'a uwweekee, mare geyennebannaa aninni welti hedhemmake Mageni'a tolchimalcho ijaarannon» hiyye. 4 Tennexxee insa'ne anfe'emmaka alaga magenuwwa manshatika gutichchuwwa Ya'iqoobi'n uune; Ya'iqoobinna konnechchuwwa Seekemi bira hedheeke qilxi hunda moogge.

5 Isa'nenna ookkone booncho waale me'i'ne; Mageninna qarqara ookkone'n hedhemmake qachchuwwa duuchcha'n soda'annaa alaayyo insa'ne'ni ibisemmaxxee Ya'iqoobinna oose isixxi ookone booncho waale me'ine. 6 Ya'iqoobinna isinni hedhemmake manninni Looza hiyyemeebaa dage; Looza tinni Kenaanike bogi giddo Beeti'eeli hiyyendeexxe bakkan. 7 Ya'iqoobinna ookko tolchimalcho giisseexxi eettene bakkaka summa Eeli Beeti'eel hiyye fulche. Ya'iqoobi iitta hiyyeechchi dayyo ifikenaa'ni baaje me'aamma wodda Mageni iso'ni ifi ifiseek eettene bakka'n kaddemmaxxeeten. 8 Eetten yanna Ribiqaxxi erganjo Diboora rerte; Beeti'eeli aadi darre hedheeke qilxi hundanna moogende; Tennexxee okkone qilxika summa Elon Bakut hiyyeme.

9 Ya'iqoobinna Mesipheexomiyii'n ille iima hige uduma Mageni langaxxa iso'ni ifi leellisheexxi isoo eebbise. 10 Mageninna isoo, «Ta'i qico'n summi atik Ya'iqoobitemman, edi'a kinni Isira'eeli hiyyendatto malee Ya'iqoobi hiyyende ye'endaboxxon» hiyye. Tennexxee Mageni Ya'iqoobii, «Isira'eel» hiyye ye'e.✝ 11 Higgeenna Mageni Ya'iqoobii hiyyee qici, «Ani duuchchiinxa dande'annoke Magenon; hortee bira sa'i; atinna heddo ardike anna kadi; moyanjuwwikinna atike gudeedinaa'n ilemaan. 12 Ani Abirihaami'aanna Yisaaqi'a uwwenneka boga ati'a uwwanno, atiba udumanna konne boga atixxe horte'a uwwannon.»✝ 13 Mageninna isinni haaso'emmaxxee bakkabaa'n iimi'a me'e. 14 Ya'iqoobinna eettene Mageni isinni haaso'emmaxxe bakka'n sooddo kaase; ha'watika tolcha ise hana dune; zayitetanna ise'n dune. 15 Ya'iqoobinna Mageni isinni haaso'emmaxxa bakka Beeti'eel hiyye summa fulche.✝

16 Beeti'eelinaa'ninna ke'ne me'ine; Efiraata genno'a heenob gatee'naa Raaheeli ciniinfatte; ciniittote'ninna lumoshsha rakkatte. 17 Ciniintotinna lumoshsha wixxirri hitee wodda hobbassammaxxi manjichcho, «Ilda'etek kunninna labbaken, meeco'o sodaattoxxe» hite. 18 Ise kinni reyote'e wixiratta'ninni ifike beltika summa Beni'ooni* Hite. Beltiinki anni kinni Biiniyaam* Hiyye.

19 Raaheelinna rerte; Efiraataa me'ammake oriba Beetelihemi moogende. 20 Ya'iqoobinna Raaheelike hirreessi hana duufe'a giisse; telchi qico'ninna Raaheelike hirreessik beesis okkone duufe'an. 21 Isira'eelinna me'a'ninna dageexxi dunkaane ifixxa Gader hiyyendaaxxe kinjinxe xellebo widi darre olte.

22 Isira'eel ookkone boga'n hedha'neenge'n Roobel anxe garbitte are Baalanni welt diiphe; Ya'iqoobinna tenne yaane laqe. Isirea'eelinni tenne laqe.✝

Ya'iqoobi tommenna lame labbaxxa oose afe'emman:

23 Liyaxxi oose:

Ya'iqoobik anga belti Roobeli, Simooni, Leewwi, Yihuda, Yisakoorinnaa Zabiloniten.

24 Raaheelixxi labbaxxi oose: Yooseefinna Biiniyaami.

25 Raaheelixxa erganjo Baalaxxi labbaxxi oose:

Daaninnaa Nefitaaleemi.

26 Liyaxxa erganjo Zilifaanexxi labbaxxi oose:

Gaadinna Aseeri.

Tinni Ya'iqoobi Mesipheexoomiya hedhemma wodda i'leexxe oosemman.

27 Ya'iqoobi Kebirooni bira Maamire hinaaba hedhaamake anna ifike Yisaaqiba mare; iikki boonchinna Abirihaaminnaa Yisihaaqi he'nammaban.✝ 28 Yisaaqinna dhibbanna saddeeta tomme wogga ture. 29 Yisaaqinna cime woggatanna godde lummedheexxii ifike edike ardiba'a bukkiyye. Oose ifixxi Eesawunna Ya'iqoobi isoo mooge.