1 Mageni Abiraami 99 wogga geyee wodda iso'n leelleexxi isoo hiyyee qici, «Ani Elishaadayi duuchchinxa dande'annoke Magenoni; ani edo mammaremi ci'mema bellonna hedhe. 2 Ati'a aagennexxa kako jabeessanno; horte atixanna birasa'isannon.»

3 Abiraaminna albik buttinake'ni gonbiseme; Mageninna isoo hiyyee qici, 4 «Kunnise ani ati'a aagaannexxi kako heddo gosa gosake anna kaddattoxxen. 5 Heddo gosa gosake anna atee assannaxxee telchinni elqi'a summa atik Abiraami* hiyyema gatteexxi Abirihaam kadaan.✝ 6 Horte atixxa hara bira sa'issannon; heddo gosa gosake arda atee assannon; boga galchaak moyanjuwwinna atenaa'n afemaan. 7 Ani ati'a, atibaa uduma atixxe horte'a ilatenaa'n ilati qici'a duuchchi wodddixxa kako aagannon; konnee qici atikennaa ati udumanna atixxe horteke Mageno kadannon. 8 Ta'a ati konnee keessummumma hexxetteka Kenaanika boga duuchcha ati'a, atiba udumanna atixxe horte'a duuchchi woddi'a qadaada kado'a uwwannon; insa'neke Magenonna kadannon.»

9 Higgeenna Mageni Abirihaamii hiyyee qici: «Ati'a aagennexxa kako ati, atiba udumanna atixxi horte ilatenaa'n ilati qico'n heqqexxinaan. 10 Atinna atibaa uduma horte atixxi heqqexxinaaxxi kako: labbak duuchchi jila ofo'lowwaan. 11 Tennexxe labbak ha'nok manji duuchchi jila ofo'laan; tinni jila ofo'lanna ha'noxxenna anxe oddo'n hexxeexxe kakoke beesisa kadaan. 12 Daggaaxxe ila ila'n ha'nooxxi labbaxxa oose duuchcha ilendeexxe saddeettixxe barra'n jila ofo'ldowwaal; iitanni mine atiba ilemeekinnaa gadhii'n maallaqik hiremeek alagi duuchchinna jila ofo'lowwaal. 13 Atiba mine ileekenna kadi atike maallaqinni hireemmek duuchchi jila ofo'lowwaal; biso ha'nooke'n kaddaaxxi tinni anxi kako duuchchi woddixxe kako kaddaan. 14 Biso ifika jila ofo'lebaak labbak duuchchi kako anxa diigemmaxxee arda ifike giddii'n fugussemowwaal» hiyye.

15 Mageni Abirihaamii hiyyee qici, «Edi'a Soora'a atixxe areka summa Soora hite yexxoxxe; telchinni uduma summi isek Saara* kadaan. 16 Ani ise eebbisannoni; labba beltonna isenaa'n ati'a uwwannon; heddo gosa gosaxxe ama kaddaashsha ani ise eebbisannon; arduwwiink moyanjuwwinna isenaa'n afemaan» 17 Abirihaaminna albik butta gonbiseme oso'lan godobi giddo, «Dhibba wogga manji dande'e finna i'laas? Saaranata sallane tomme wogga'n hitta finna ila dandeettata» hiyye. 18 Tennexxee Abirihaam Mageno «Isima'eeli calla eebbise ani'a isoo lubboti uggiteettele» hiyye.

19 Duuchchi Woddik Goottinna hiyyee qici: «Eloxxe, kadduun; yaane kinni are atinxe Saara labba belto ati'a ildaan; summa beltinkanna Yisaaqi* hite fulchittaton. Aninna isi uduma duuchchi woddi'a isixxe horte'a kaddaaxxa kako isi'a aagannon; 20 Isima'eeli'a kadhattettexxa kadha laqeennen; isonna eebbisannon; ile horaashsha assannon; laakkossa isikanna hara bira sa'issannon; tommenna lame hayyooleke anna kadaan; lumoke ardanna kadaan. 21 Yaane kinni anxa kako daggaaxxa wogga iitteexxa yanna Saara ati'a ildaake Yisaaqi'a aagannon» hiyye. 22 Mageni Abirihaaminni welti haaso'aammaka haaso'a bireechchi udumi'a iimi'a meye.

23 Eettene barra'ninni Abirihaami Mageni isoo ajajemmashshanni belto ifika Isima'eeli, isiba mine ilememmakaranna gadhii'n maallaqik hiremmaka labballo duuchcha jila ofo'lishe. 24 Abirihaaminna jila ofo'lee wodda wogga isixxi sallane tommenna sallanetemman. 25 Belt isik Isima'eelinna jila ofee'leek tommanna sakkaxxe wogga'nitemman. 26 Abirihaaminna belti isik Isima'eel laamiingi eettene barra'ninni jila ofolle; 27 Abirihaamike mine'n hedheek labballi duuchchi isiba mine ileemeke kadi gadhii'n maallaqik hiremeek isinni welti jila ofo'le.