1 Abirihaami ookko'n kee'eexxi Negeebike boga'n me'eexxi Qaadesixxe'ninna Suurixxe oddo'n ofo'le. Shiixxoxxe yanna'anna Giraarim ofo'le. 2 Ookko Abirihaami are ifixxa Saara «Ise anxe dayyon» hiyya'nemman. Tennexxe Giraarik moyanji Abemeleki'n manjo ergeexxi Saara iyyedangaashsha asse; 3 Yaane kinni Mageni hashsha mitte oojjot Abemeleki'n dageexxi, «Tenne adhdhiteettexxe manjichchoxxe buutonni rertaaten; ise aro'o afe'eexxen» hiyye.

4 Abemelekinna isenni welt diipha gophemmaxxee hiyyee qici, «Anke Gootta, mitte balleessa afebaaka arda birtattota? 5 ‹Ise anxe dayyon› hiyyeek isotebaa? Iittanni isenna, ‹Isi anke dayyon› hiteexxebaa? Ani tenne assennechchi ca'ichcha yaadinninnaa qullitte anganniten» hiyye.

6 Mageninna Abemelekii oojjoti hiyyee qici: «Ee, tenne ca'ichcha yaadinni assite'ettexxa ege'neeneni; Tennexxeetemman ati ane'n cubbo hujabexxoshshanna isenninna dhiiphphabexxoshsha assaanak. 7 Ta'atenna kaddoole tennee manjichcho aro'o iseke Abirihaami'a hiissi. Isi wabeekote kaddeemmaxxee rertaboxxoshsha ati'a kadhataan. Yaane kinni isee isi'a hiissa gophphottole atinna atike kadeek duuchchi rertine muddinaaxxa ege'ni» hiyye.

8 Langa baro gorsa Abemelek ifika ja'laabuwwa duuchcha ye'eexxi kaddeexxa yaane duuchcha insa'ne'ni haaso'ee wodda insa'nenna lumooshsha sodaante. 9 Ookkoneechchi uduma Abemelek Abirihaami'i ye'eexxi, «Tinni no'o'n assitettexxi yaane maachcho? Maa balleessannalete ane'ninnaa anxe mootumma'n iitta hexxeexxa lumoxxa ba'ne iyyedagetteek? Assemiyyo hassissabaaxxe yaanen ane'n assitette» 10 Abemelekinna Abirihaamii'i, «Eger, atinni tennee assitettek maye'aatemma'a?» Hiyye qore.

11 Abirihaaminna Abimelekii hiyyee qici, «Konne booncho'n Mageno ‹dhugaat sodaata hexxebaaxxa, mannikinna anxe are'a anee shiyaaxxa hede sodaatennexxeeten› 12 Iseqqa dhugaandinni anxe godobixxe dayyo kada gophpho malee mitte annixxe oosen; udumi giddii'n ani isee aadhenne. 13 Mageni anee ajaje'naa anke annike mininaa'n fulee boga boga mammaremaanna wodda isee, ‹Ati ani'a affettexxa jaalala konne qicinni ani'a leellishi no'o marre gennenneke booncho duuchcha'ni isi anke dayyon hiyyi «ise'ni hiyyeennani.» › »

14 Ookkoneechchi uduma Abemelek Abirihaami'a gedhebo, lalo, labbakannaa meyyaka erganjuwwa uwwe; are isixxa Saaraanna isi'a hiisse. 15 Abemelekinna Abirihaamii, «Kunnise ank bogi atiken; eettetteba ofo'la dandeettatton» hiyye. 16 Saaraanna, «Kunnise dayyo atike Abirihaami'a kuma sibiljo birre uwweennen; tinninna ati busha yaane hujjeboxxoxxe qullitte manjo kaddettexxe atee uudeeke manni duuchchixxe ille'n ibbaboxxoshshaten» hiyye.

17 Ookkoneechchi uduma Abirihaami Mageno soodate; Mageninna Abemelekii'i isixxa are, isixxa meyyaaxxa erganjuwwanna fayyiseexxi finna illaashsha asse. 18 Mageni Saara Abirihaamixxe arexxe buuto'a Abemelekiki mini hadi duuchchika gadaameessa cufeemman.