1 Tinni yaane kaddeechchi uduma, Gibtsik moyanji'a ha'wa shiqishaammakinnaa isixxe itake minik manjichchi goota ifika Gibtseka moyanjo mufachchiseexxa yaane assine. 2 Feri'ooninna ifike laminiinge ja'laabuwwa'ni ha'wo shiqishaammake mannike sooresa'ninna itati minike ajajallo'ni yo'oshsha mufate. 3 Tennexxee Yooseefi usureme hedhemmake usuriinke mine'ni heqqaammak mannik ajajallike mine'ni insa'ne usuremmaashsha asse. 4 Usurriinke miniki ajajallinna konne lame manna Yooseefi'n uwwe; Yooseefinna insa'ne'a ergatema'nemman.

Insa'nenna usurriinke mine'n e'yineexxi heenoxxa barra turre.

5 Lamiingi usurreemmak manni, moyanjokee ha'wa shiqishaammakinna ita ra'isaammake mannik ajajalli mitte hashsha'n ifi ifixxa oojjo oojjonte; insa'ne lamiingixxe oojjo ifi ifinxe tika affeemmaxxen.

6 Langa baro gorsa Yooseefi insa'neeba maraa wodda lamiingi yaandaa'naa afe; 7 Isinna ifike goottike usuriinke min'ne isinni welti hedhemmaka Feri'oonika ja'laabuwwa, «Mayeeta telcho ha'no albi giddo yaaddineeshsha hexxineek?» Hiyye insa'nee qore.

8 Insa'nenna «No'o lamiingi oojjo oojjontenneni» yaane kinni «Oojjo no'oxxa tikaaka gonpheennen» hineexxi hiisine iso'n haasonne.

Yooseefinna, «Oojjo tikatixxa dande'a uwwaak Magenoken. Tennexxee ha'noo mitti mittiniigi oojjotineexxa oojje ane'n kulle» insa'nee hiyye.

9 Ha'wa shiqishammake mannik ajajalli hiyya'n oojjo ifixxa Yooseefi'n kulee qici, «Ani oojjoti ifi edo mitte woyinetika haqichcho afenne. 10 Kunne woyinetik haqichchi sase dame afe'emman; isinna ikki woddi kichcho fulche daraare, isixxe rodduwwaxxi gummanna raxxe. 11 Feri'ooni buuda anga abixxeenaa; woyinetixxa gumma qoce'e eettene buuda'ni miicennexxi buuda moyanjoke'n anga isixxe'n uwwenne» hiyye.

12 Yooseefinna iso'n hiyyee qici, «Yoona oojjotixxi tika: sase dame, sase barran. 13 Sase barra giddo Feri'ooni atee usurrakeena'n tikaan; edixxe atixxe hujebaanna atee hiissaan; edi wodda ha'wa isi'a shiqishsha'n ergatendatta woddishsha Feri'oonixxa buuda anga isixxe'n uutatton. 14 Yaane kinni duuchchiinxi ati'a eldaa wodda anee qaabbattettexxi ani'a ba'lati; anxa yaanenna Feri'ooni'n kuldettexxi konne usurriinke minenaa'n fulannoshsha assi. 15 Ani Ibiritotike boganaa'n kaba dageennechchi eeyyatite kaddebaak hunnatiten; ta'anna kaba anee konne usurri'a geessisseexxa mitte balleessanna hujebo'non» hiyye.

16 Ita ra'isendammake minik ajajallinna ha'wa shiqishammakixxi oojjoxxi tika eloxxe kaddeexxa afeexxi, ifixxa oojjonna Yooseefi'n hiyye kulee qici, «Aninna oojjo oojjoteennan; oojjoti sase ginbe golalooka buddeena umoke'n dulkeennan; 17 Iimi darreke ginbi giddo Feri'ooni'a ra'isendeexxe gargar hexxeexxe ita hexxemman; yaane kinni ci'a ookkone anke umo'n hedhemmake ginbinaa'n ita itta'nemman» hiyye kule.

18 Yooseefinna hiyyeexxi haaso'ee qici, «Oojjotixxi tika: sasi ginbi sase barran, 19 sase barra giddo Feri'ooni usurri minii'n atee fulcheexxi haqichchoke'n atee fannisaan; allaattetinna maala atika ittaan» hiyye.

20 Sakkaxxi barra Feri'oonixxe ilenshake ayyaanamman; isinna ifika ja'laabuwwa duuchcha itise ha'wisse. Eettene barra'n ha'wa shiqishammake mannika ajajallonna ita ra'issammake mannika ajajallo usurriinke minii'n ifike ja'laabuwwi edo shinqaashsha asse. 21 Ha'wa shiqishammake mannika ajajalli edixxe huje isixxe'n isoo hiise; isinna edishshanna buuda anga Feri'oonixxe'n uwwate'n ke'e. 22 Ita ra'issammake mannika ajajallo kinni Yooseefi insa'nee tikemashshanni isoo fanisse.

23 Yaane kinni ha'wa shiqisheemmake mannik ajajalli Yooseefi'i dedhee malee'e qaabbatebaan.